نونو فى اول يوم مدرسة

Thursday, June 7, 2007

فعلا أحساس مؤلم

أأأأأأأأأأأأأهه..لألألألأاااااااااا

فعلا أحساس مؤلم انك تتحمل اى حاجة "عشان خاطر"
أنا دلوقتى بكتب وأنا فى منتهى العصبية وحرقة الدم ، أنا كرهت الشغلانة المنيلة اللى أنا باشتغلها دى ، ملعون أبو كدا... أعصابى هاتنفجر، حاسة أن شرايينى هاتطق بمعنى الكلمة ، أنا باحاول أخذ قرارات مهمة فى حياتى ، واللى منها أنى بعد كدا معنديش أستعداد أنى أجامل حد وهانفض الطيبة والسذاجة اللى مغطيانى دى، لازم أتحرر من آسرالحساسية والشفافية والمثالية ..!
كان عنده حق زمان " أحمد شافعى " لما كنا قاعدين مع بعض مرة على "التكعيبة"وكنا بنتكلم عن الشفافية والحساسية والحاجات دى ، وان الدنيا جميلة وكل الناس طيبين وأن الحب دا بيرفرف كدا على العالم ، قالى :
- "انت عايشة فين ، إحنا بشر، بشر، والبشر الطبيعى لازم يكره ولازم يحس بكل المشاعر اللى أنت بتقولى عليها شر
- الشر الحقيقى أنى أضغط على نفسى عشان أتحمل حاجة مش قدى ، أو حد خانقنى أو أكدب ، والأنسان الصادق فعلا هو اللى ميكدبش على روحه ويخليها تشوف الحاجات عكس ما هى عشان ميحش بالمشاعر الوحشة اللى بتقولى عليها ...
أيوا رغم انى كنت باقاوحه كتير فى دا إلا أنه كان عنده كل الحق ، أنت كنت على حق ، أصعب حاجة أنك تكدب أحساس حسيته تجاه حد أو حاجة وتعدى الليلة ومعلش ويالا ... أصله غلبان ، أصله يمكن مش قاصده ، لا بس طيب ، وأنت أكبر وأحسن والطف ، أو أن الحاجة اللى بتحصل دى بتحصل لأنها أفضل حاجة بتحصل وما ينفعش غير كدا ، لا مؤاخذه ، دا كلام بنصبر بيه نفسنا على إحتمال البلا البشرى الخنقة ، أنا خلاص دماغى قربت تتفتفت فتافيت فتافيت ، يمكن مش قادرة أقول إيه المشكلة اللى خانقانى بجد ، لكن أنا كل شوية بكتشف انى لازم انزل ناس من على ودنى ، وناس من على دماغى ، وحاجات مجاملات كدا ملهاش لازمة .. ولازم ارجع لـ "الحراب المدببة " بتاعتى تانى اللى كنت ناسياها الفترة اللى فاتت دى واللى عايز يعرفنى على كدا يعرفنى واللى مش عايز خلاص هو حر ...
انا.. سهى زكى محبش الخنقة والعبودية والأحساس بالدونية ، ولا بحب اشوف ناس مستضعفة وعاملة فيها غلبانة ، ولا ناس مستعفية ومعندهاش حاجة حقيقة تعملها كرهت السلبية اللى انا فيها ، لازم بصراحة أتمرد شوية على الوضع اللى انا فيه ، بقالى 11 سنة بقاوم الملل الروتينى فى وظيفتى ، وعاملة فيها مقاوحة ودماغ ومبطلتش قراية ولا كتابة ولا قعاد على القهوة ، وقال عاملة فصل تام بين حياتى العملية وحياتى الشخصية ودا طبعا مش حقيقى ابدا ... لأن الاثنين بيأثروا على بعض جدا جدا... 9سنين مع "مدير عام مؤسسة دارالتحرير" كان أسمه "حلمى غيث" من عيلة غيث المشهورة فى الشرقية ، راجل زى العسل وكان بيحترمنى جدا جدا وبيحبنى جدا وبيثق فيا جدا جدا دا غير انه كان رجل شغل جدا من الفجر وهو فى المكتب وعقله عامل زى الشبكة كل خيط فى مكان وقادر يتحكم فى اكتر من اربع شركات بفروعهم فى كل المحافظات لا وايه كان دودة قراية وبيحب الفن قوى والكورة وكله مش ممكن كان بجد خسارة انه يبقى مجرد مدير مالى لمؤسسةكبيرة زى دى ، تخيلوا دماغ حلوة زى دى تمشى من الجمهورية لأنها اتخدت فى الرجلين فى عهد سمير رجب ولما مشى مبقاش ليا مكان طب واتعامل مع مين وبعدين نزلت على الأستاذة / رئيسة تحرير...ناعمة ورقيقة واى حد يتمنى يقعد معاها يتكلم معها واد ايه هى فعلا شيك وراقية ومن سيدات الثمانينات المتأنقات جدا جدا إلا ان المشكلة الحقيقية اللى باواجهها مع هذه السيدة المتأنقة هو التأنق فى حد ذاته ، انا بتخنق من التأنق ، خاصة لما اخذ كلمة مش تمام بمنتهى التآنق ويتحرق دمى بمنتهى التأنق ، وأى أهانة تطلع بمنتهى التأنق ، المهم انها بمنتهى التأنق لما تتأكد ان مكنتش استحق كل الحاجات المهينة دى بمنتهى التأنق ، لا تعتذر ولا تشعرنى انها عرضتنى لأى شىء جارح حدث لى بمنتهى منتهى التآنق ، وهى بالفعل رقيقة جدا لذلك فهى قليلا ما تنفعل وان انفعلت فالأذى هو مصيرمن يجعلها تصل لهذا الانفعال التى تكرهه ، وعلى فكرة انا قررت ان اى حد مش طايقاه ماتعملش معاه ولو الظروف اجبرتنى اتعامل معاه يبقى واصله كويس اوى انى مضطرة ... أصل خلاص مفيش وقت بجد الموت علمنى ان مفيش وقت كتير عشان اقعد اجامل واحايل وارسم ابتسامة مشرقة لحد مش مشرق
وامدح فى دماغ انا شايفها فاشلة
واحبب ناس فيا مش فارقين فى الحقيقة فى حياتى
واكره ناس عشان حد تانى بيكرههم
ملعون ابو الحساسية والذوق والادب
اللى يخلونى اتألم طول الوقت
فالشايف نفسه ممكن يضايقنى والنبى يبعد من طريقى عشان
معنديش استعداد استحمل
انا هادوس وهادبح وهألم
وساعتها هايكون احساس مؤلم انك تحسه منى
انا تانى سهى زكى بارنويا وحركات لا
لكن محبش حد يدوس على ديلى وانا ماشية
على فكرة انا كدا هديت شوية
ويمكن فى الآخر مقدرش اعرض اى حد لأى احسا مؤلم
ااعمل ايه فى روحى ياربى
حد عنده حل للمشكلة دى
************
صدقنى يا صاحبى ان خفت متقلش
وأن قلت ما تخفيش
الكدب طبعه الخوف الصدق ما يخونش
والكره يوم بيموت والحب ما يهونش
فوق الجبين مكتوب الخطوة فيك تمشى
تندم قلوب وتدوب وقلوب متندمش
امشى فى طريق الخير
فى الشر ما تمشى
دى الدنيا بحر كبير
والحال مبيدومش
صدقنى يا صاحبى ان خفت ما تقولش
وان قلت ما تخافشى

أحمد منيب

10 comments:

كريم بهى said...

آآآآآآآآآآآآآآآآآآآآآه
والف آآه يا سهى
انتى مدبوحه اوى ..
بس هى دى الدنيا ..والقسمةوالنصيب
انا شايق انتفاضة يأس جواكى
واحتلال وثورة وثوار
وبحر مش عرفينه فى دنيتنا
بيتولد على شطه فنار وكل فنار
ارجوكى تكونى صادقة زى ما انتى عاوزة
بس خلى بالك السكينه حاميه اوى اوى
وهتدبحى بيها الحلو والوحش كمان
خليكى سهى الصادقة جوانا ..

الطالب مش عاجبه اللى بيدرسه
والموظف خانقاه وظيفته
والام زهقانه من عيالها
والاب غرقان ف الهم وحيرته
وكمان الليل طهق من سواده
والنهار والنجوم والقمر والناس اللى تحت الشمس واللى ما تعرفهاش
سيبك من الدنيا .. ان اصلى محبتهاش
اصلها مش دنيانا...... ياااه ع الهم
ياه ع الاه بلحن الغم
عمرك.. شكاك قدرك
عمرك .. بكاك الدمع
عمرك بيت ف ليل
وصبحت ف ليل
والفجر مات على رمشى
طريقى مش بكرة
انا راجع تانى
لانبارح .. خلاص اتعلمت جروحه
وحفظت ملامحه الدايبة ف قدرى
وقلبى مسامح
طريقى مش بكرة

ارجوكى تمسحى الدمعة اللى عايشه جواكى
وتشوفى اللى جاى من عيون تانيه
عيون نهنوه بنتك .. ودنيتك البريئه
صدقينى بحس انى متفاؤل رغم كل الظروف
بس اتعلمت اغلب قدري بقدري
واكوى جرحى بجرحى

انتى شفافة لدرجة اعلى من الشفافية ذاتها
وصادقى لحد ما الصدق انكسف من ضعفه
وكأنك دخلتى جوانا .. وضربتى على الاوتار الملتهبه من الوجع
بلاش نكون اقسى م الدنيا
واضحكى شوفى شكلك حلو
اه .. شكلك حلو

كريم بهى

كريم بهى said...

elfagomy.blagspot.com
دى مدونه احمد فؤاد نجم
لو تسمحلى سهى بعرضها فى مدونتها
انا عارف انها بتموت فيه
زى ام بتموت فى كل حاجة رقيقة وجميلة
اصلها من كوكب تانى
ما انتوا عارفين

كريم بهى

reem said...

مش عارفة والله اقولك ايه؟ عارفة ان كل كلمة بتقوليها بحس انك بتتكلمى عنى
مش عارفة
وصلت لحاجة مؤخرا ان مفيش حد يجبرنى انى اعامل حد مش قادرة اتعامل معا بسبب تصرفاته ولا اجامل على حساب نفسى بقيت اقول انا كده واى حد مش عاجبه تصرفاتى او معاملتى ينسحب بكل هدوء من حياتى لانى مش هاجى على نفسى زى ماكنت بظلم نفسى عشان اى حد
البوست حسساه اوى وطالع منك من جواكى
فرحت اوى لما لاقيتك خرجتى اللى تاعبك بالكتابة ومتجيش على نفسك على حساب ناس تانيين ممكن تتعبى بس عشان ناس بتحبيهم مش تجامليهم بس تتعبى لانك عايزة تخليهم مبسوطيين ومرتاحيين وفى الحالة دى تعبك هتحسى انه مش تعب ولا حاجة فى مقابل انهم ناس كويسة
مش عارفة فهمتينى ولا لأ؟ بس ربنا معاكى واى وقت تكونى مخنوقة ومش قادرة اكتبى اكتبى هنا فى المدونة وهترتاحى بجد
ربنا معاكى

MOODY said...
This comment has been removed by the author.
loumi said...

يا شيخه
حاقولك بمنتهى التأنق
ملعون ابو اللى يزعلك
والا يدوس لك على طرف

دى زيارتى الاولى واتمنى ان لا تكون الاخيره
اصل جايز ما تستلطفيش خلقتى
فا تقومى بمنتهى التأنق
تروحى رميانى فى اقرب صفيحه زباله
حتلاقيها فى اخر التعليق عدل
:):):):)
انا موافقه على شروطك
حاقبلك بمنتهى التانق
زى ما انت كده سهى زكي

تحياتى

كريم بهى said...

انسه ريم ومودى
انتو بصراحه عجبتونى فى ردكم
وخاصة ريم ( روميه)ا
وطبعا سهى حبيبتنا لانها زعلانه ومخنوقه حبت تفضفض معانا حبتين
اتمنى انها تقدر تعبر بحر السواد دا
وعلى فكرة سهى حنينه اوى وطيبة اوى
اسألونى انا
لانى مش شويه مش كتير كنت زعلتها وبعدين وبكل رقة صالحتنى وقبلت اسفى
اصلها .... مش من دنيتنا
الحقيقة انا زعلان من اللى هى فيه اوى
وياريت تخرج قريب من الحاله ديا
لانى بحبها اوى وبخاف عليها زيكوا تمام

ادعو ربنا لها
اوى .. اوى


تحياتى لسهى وريم ومودى

كريم بهى

شيماء زاهر said...

إزيك يا سهى...
ما كنش إللي يزعلك ، و إللي توصلتيله ده متيهيألي هو الصح، الدنيا دي فيها ناس غريبة، وفيها ناس ما تستهلش البكا عليها، وفيها ناس فضة وناس ذهب وألماظ برضوا :)

روقي كده وكله حيكون خير إن شاء الله

بوسات وكده

سهــى زكــى said...

ياااااه ، مكنتش عارفه ان مجرد ما اقوله اه .. هالاقى ايدين كتير كدا بتقولى فوقى وروقى ، ومبيقولش معلش اللى انا بكرهها اوى ....
انا بجد حاسة انى قوية جدا دلوقتى واقدر انفذ اللى كتبته فى البوست بمنتهى القوة

كريم بهى ، عندك حق فى اللى قلته كله بس اهه الواحد بيجى عليه وقت بيتخنق بجد

ريم ... فعلا ممكن تتعبى عشان ناس بتحبيهم بجد وبتخافى عليهم حتى لو عندهم مشاكل فى شخصيتهم ، لكن مينفعش تضغطى على نفسك تتحملى حد عشان اى حاجة تانية غير الحب ...

مودى .... بجد خرجتنى من الحالة اللى انا فيها وضحكتنى أوى وى ميت طظ فى اللى يزعلنا كلنا

لوما ... قمر وسكر ودمك زى العسل ودى مش مجاملة والختمة الشريفة ، نووووورتى

شيماء زاهر يا مدونتى الرقيقة ، اشكرك على مشاعرك الناعمة كوردة تشبهك يا شوشو ...

هبة said...

السلام عليكم يا سهى ايه اخبارك احب اقوللك اني عايشه نفس ظروفك بس فيه فرق اني مبشتغلش بس الوضع ده من البيت نفسه زوجي مش راضي يخليني اشتغل مع ان حلم حياتي ان بعد مااخلص الجامعه اشتغل حسيت ساعتها بالقهر الشديد مفيش حرية راي ولا تفاهم ولا خد وادي عندي سي السيد في البيت واللي زاد وغطى كمان حماتي ست غريبه او نوعيه بشريه غريبه اوي قمة التخلف العقلي ست معندهاش في الدنيا الا الطبيخ وان حد يساعدها في شغل الشقه بس بالرغم من كد مبيعجبهاش العجب ولا الصيام في رجب من الاخر يعني انا جالي تخلف عقلي حاد واحساس حاد بالقهر معلش بقى يا سوسو انا تعبتك بكلامي معلش بقى بس المثل البلدي الشعبى بيقول اللي يشوف بلوة غيره تهون عليه بلوته
هبة محمود

سهــى زكــى said...

هبة ... على فكرة يا هبة ... اللى انت فيه ده فعلا بلوة تهون على بلوتى ... هبة لو فضلت كدا وانت موافقة على كدا هايحصلك حاجة من الاثنين يا هاتتحولى للست هبة أمينة يا أما هايجيلك مرض وحش تموتى بيه من القهر .. لو انت سعيدة كدا مفيش مشكلة لكن لو مش سعيدة ارجوكى اعملى حاجة والحقى انسانيتك مش كرامتك لأ انسانيتك ، ارجوكى ربنا سبحانه وتعالى لا يرضى باهانتك حتى لو عن حق ، فمترضيش انت تتهانى عمال على بطال .. اسفة ان كنت حادة لكن بصراحة انا عارفه اللى بتقوليه كويس وارجوك اتمردى ولازم تثبتى حقوقك المشروعة وتاخديها غصب عن عين التخين ... وربنا معاك ومعانا كلنا يارب