جميعنا موصوم بالخطيئة

لماذا أبدو مسيحية


شىء غريب حقا يحدث معى منذ طفولتى تقريبا ، فى المدرسة كان يعتقد المدرسون وبعض الزملاء اننى مسيحية من شكلى وأسمى ربما ، وكانوا يأخذون منى موقف حتى يتأكد لهم اننى احضر معهم حصص الدين الاسلامى ، كان هذا الاحساس يضايقنى جدا و يقربنى عاطفيا من زملائى المسيحين بالفصل ، وبدأت أنجذب لهم عفويا واصبح لى أنتيم اسمه "حنا" لم نفترق طوال فترة الابتدائى ، كان فقط ما ينقصنا ان نحضر حصص الدين سويا ...
بدأت أقرأ فى كتاب الدين المسيحى كما أقرأ فى كتاب الدين الاسلامى الركيك الذى ندرسه فى الابتدائى ، وكان الاستاذ عيسوى زيه زى الاستاذ مينا ، سطحى تماما ولا يشرح ، انما يحفظ يحفظ فقط ....
لما دخلت المدرسة الاعدادى فرضت علينا المدرسة نلبس طرح ، لأن صاحب المدرسة الحاج احمد فراج الصعيدى اللى جه مصر عامل يومية لما سافر السعودية وجه بقى حاج هو ومراته ابلة نادية وتدينوا جدا فمينفعش خالص ان البنات يقعدون جنب الولاد ، لكن ممكن يكونوا فى فصل واحد ولازم البنات تلبس جلباب وطرحة وكانت اشبه بالمدرسه الازهرية رغم انها كانت مدرسة خاصة وبكدا ارتحت فى الثلاث سنين اعدادى من شكوك الناس كلها بداية من الناس فى الشارع وحتى المدرسين والتلاميذ انى مسيحية ، خلصنا الاعدادية وروحنا الثانوية ، طبعا انا واحدة باتخنق من اى حاجة تتحط عليا من بداية الرأس وحتى بعد الرقبة قليلا ، بحس انى بجد حد لافف على رقبتى حبل وحاطط على دماغى حلة كبيرة نحاس هاتوعج رقبتى من تقلها ، يافكيك قلعت الطرحة فى اجازة الاعدادية وماما وبابا معندهمش مشاكل ابدا فى الموضوع دا ، لانهم شايفين انى من حقى اختار طريقة حياتى وشكلها من زمان ، اتصاحبت على عيال جديدة فى المدرسة ، فيكون اول حاجة يقولهالى بعد ما نتصاحب ، على فكرة احنا كنا مسترخمينك اوى وفاكرينك مسيحية ، فيكون ردى الوحيد عليهم ومعرفش ازاى كنت عاملة فيها فاهمة وارارى ، مالهم بقى المسيحيين - دول اخوتنا ودمنا وحتا مننا ، احنا كلنا ولاد ربنا ...
- ولاد ربنا ايه انت كافرة ولا أيه ، ربنا لم يلد ولم يولد
- ما انا عارفه بس برضه احنا ولاده
- هما بيقولوا ان المسيح ابن الله
- طب وماله ما احنا كلنا ولاد الله
- يابنتى انت مجنونة ولا هبلة ولا كافرة
- انا مش كافرة انا بنى أدمة وعايزا أكد على ان الدين مفيش حد له ذنب فيه وتقسيماته دى ما انزل الله بها من سلطان ، ربنا هو اللى نزل كل الاديان ، ليه بقى مكنش مصدقاها كلها
- لأن الرسول قال ان الدين عند الله الاسلام
- الاسلام افهمه بطريقتى وانا حرة ، الاسلام بكل ما هو جميل وعظيم وخير ، الاسلام بما ينقى روحى ويطلق طاقتى الطيبة لكل الناس ويخلى الحياة كلها حب فى حب ، الاسلام يعنى اسلم بكل ما امر به من محبة وطاعة ورحمة وحاجات كتير جميلة قلنا عليها فى كل الاديان فكان تأكيد علينا بالاسلام يا جماعة حبوا الله ... وصفات الله هى صفات الجمال
- احنا مش فاهمين منك حاجة ، احنا مش هانقعد معاكى تانى باينك مجنونة وفى حاجة فى مخك
المهم فى واحدة طيبة من اصحابى حاولت تتتوبنى عن افكارى الكافرة وتبعدنى عن صحابى المسحيين اللى انا بحبهم اوى وبتاع ، لكنها فشلت فشل خلاها تشيع فى المدرسة انى اتنصرت وبقيت مسيحيية ...


خلصت ايام الثانوى بشقاوتها الساذجة فى المدرسة وبدات اتجه للمعهد ، نفس الانطباع طبعا هو أيه اللى هايتغيير ، وتاخدنى روحى بتلقائية انى اصاحب مجموعة من الشباب يكون من بينهم أشرف وياسر وميلاد وعزيزووليد ، كلهم شباب ، لأن تقريبا مكنش في بنات كتيروالموجودين مسلمات عاملين تليفزيون الوان فى وشهم وبيلبسوا حاجات مشخلعة اوى ، بقيت معاهم رايحة جاية ، لغاية ما خلصت المعهد سنتين محسوبة عليهم طبعا ...العيال المسحيين راحو ، العيال المسحيين جم ...بدأت اشتغل ، اول يوم فى الشغل لمدة 6 شهور يتعامل معى كل الناس بتحفظ شديد لأننى مسيحية ، أه البنت الجديدة المسيحية ، هى صيح مسيحية بس كويسة اوى ، دى احسن من المسلمات اللى معاها فى المكتب ...بت جدعة اوى
وابتديت اتحرك فى الحياة لوحدى، مرة يلمحنى ساعة وانا داخلة كنيسة قصر الدوبارة فى التحرير أو رايحة مارى جرجس ، او يلمحنى موظفة داخلة جامع السيدة زينت ، او جامع الفتح اللى جنب الجرنان اصلى فيه شوية قبل ما انزل اكمل يومى فى وسط البلد ، لغاية ما صابهم جنان واحتاروا ، ولقيت المدير بتاعى بيسألنى سؤال مباشر ، بقولك ايه ، انت مسلمة ولا مسيحية ، فقلت له ، الحمد لله كالعادة والحمد لله هذه عندنا معشر المسلمين يعنى مسلمة ، وكأن لو لى ديانة اخرى فليس هناك حمد لله ، ودخل معايا فى مناقشة كالعادة بس شكلك مسيحى وبتلبسى لبس مسحيين ، طبعا متفجئتش ، وقبل ما ابدأ معاه مناقشة عارفه نهايتها ، قلت له دى حكاية قديمة ...
وكل ما اركب تاكسى يا جماعة بالصدفة يطلع سائقه مسيحى يقولى " على فكرة انا ركبتك معايا عشان انت مسيحية " واتابع الحديث معاه عادى جدا وانزل وهو بيدعينى اروح الكنيسة اتعرف على ولاده يوم الاحد ...ويدعيلى كتير اوى ان ربنا يكرمنى ، لان متدينة وطاهرة ...
علاقتى بالسيد المسيح والسيدة العذراء كعلاقتى بسيدنا محمد تماما ، أنا أعشقهم واحفظ ما يقبله عقلى من احاديثهم ، وافضل الصلاة فى كنيسة القديسة مارينا ، كما افضل الصلاة فى جامع الكخيا ، اهيم بصوفية وانا اسمع القرأن الكريم بصوت الشيخ محمد رفعت وعبد الباسط عبد الصمد ، كما اهيم بروحانية وان استمع لترانيم الانبا كيرلس وابونا شنودة والقمس حزقيال ... لا يقبل عقلى ابدا افكار محفوظة تخص الاديان ، انا احب كل الاديان ، لأن كلها محركها ومبعثها الحقيقى الله ، البحث عن منقذ ، التشبث بشىء يحمينا ويساعدنا ، الله هو ابى اشعر به يسير بجوارى يحمينى ويحافظ على ، ويعنفنى وقت الغضب منى ثم يلحقنى بهدية يصالحنى بها ، لا يحتاج لعبادتى ، بل انا من احتاج اليها لتخصلنى من احاسيس الحقد والغل والشر والغيرة والغضب ، لا اقبل الا الصلاة بخشوع له ، بعشق برغبة فى ان يحتضننى ربى بحب فى اخر الامر ...
وفى اخر الامر ، ربما ابدو مسيحية لأننى كما قال لى احد الرسامين اصدقائنا اشبه ايقونات الفيوم ، او ربما اعشق مفتا ح الحياة الذى يعمدنى مسيحية حقيقية ، او ربما لاننى اصادق المسيحيين طول الوقت ، او لاننى مؤمنة ان روح الله تسكن كل الطيبين وانه ابى ...
لا اعرف ، لكن كل ما اعرفه ان افضل شىء على الاطلاق ان لا اسأل احد ابدا ما دينك ... فدينى لى فقط ، لا يهم غيرى .