النداهة متعرفش فتحية من زيزى

مكنش فيه اى فرق بين الزراير اللى ابهرت ابطال النداهة .. زرار النور والاسانسير والباب والغسالة اللى ابهر فتحية الفلاحة اللى جاية مندوهة بعشق مصر الحلوة اللى فى خيالها واللى رفضت تشويهها من بنت خالتها اللى سبقتها لمصر و قابلت فيها الذئاب بس .. وزرار العقل الاليكترونى فى ايد الشاب الوسيم المتمدن مفيش فرق كبير بين ميرفت امين وشويكار القاهريات المتمدنات اللى انبهرت كل واحدة فيهن بزراير الكمبيوتر اللى سحبهم لسنة ٢٠٠٠ و فتحية .. كل واحدة انبهرت بالزرار اللى هايسحبها لزرار اعلى .. ومشيت ورا النداهة اللى هاتوديها دنيا جديدة .. بس الفرق المؤكد هو اختيار نوع الدنيا .. فتحية بتهرب من حامد عشان تروح لنداهة الدنيا الواسعة المدنية و بترفض تكون جارية مسحولة له او للمهندس اللى المدنية مندهتهوش رغم كل التعليم اللى اتعلمه ..وظل محبوس فى جلابية حامد بس من جواه .. نداهة كل واحد فى الفيلم ده وديته لطريق .. لكن النداهة الاقوى كانت نداهة فتحية .. نداهة قوية وعفية .. نداهة العلم والنور والارادة والاستقلالية والعيشة فى مصر الحلوة اللى شافتها وحلمت بها .. مش اللى وصفتها بنت خالتها ولا اللى فى العمارة اللى سكنت فيها مع جوزها .. 

النداهة فيلم من الافلام المهمة فى تاريخ ماجدة اللى انتجت ٩٠٪ من اعمالها عشان رغبتها فى انها تقدم ادوار استثنائية ..وقد فعلت وتركت مكتبة سينمائية مهمة تحتاج لدراسة .. 

النداهة قصة يوسف ادريس واخراج حسين كمال والاغنية البديعة اللى متتنسييش لصوت الفنانة ليلى جمال تأليف مرسى جميل عزيز والحان الموجى والموسيقى التصويرية لابراهيم حجايج .

ماجدة الصباحى .. المراهقات ، اين عمرى ، جميلة بوحريد ، السراب ، العمر لحظة ، هجرة الرسول وعشرات الافلام اللى ساهمت فى اثراء السينما المصرية .. نجمة من نجمات زمان وللان .. حبينا اداءها او اختلفنا عليه .. لكنها تركت بصمة حقيقية لاينكرها منصف .. سلام الله على ارواح المجاهدين فى سييل ثقافة المجتمع وهما فى الظل .