س.ز ( من وحى الأمانة والحب للفن اللى بيحترم عقول وارواح المشاهدين فيعيش ويخلد طول السنين - نجيب الريحانى )

صباح محبة ونور على صانع السعادة والفكر اللى كله نور ..
على اللى ضحكنا واحنا بنفكر .. وشاور على عيوب النفس البشرية المشوهة
على اللى اصر يكون طيب حتى الموت 

وصباح الخير على البنات اللى اداءها مكنش تمثيل مبتدئين فى مشهد الفصل بفيلم غزل البنات

وعلى الممثل القدير اللى عمل دور مريى الكلاب وهو باشا باشا 

وصباح اصيل ابن اصول على رفيق طريق حافظ على الصاحب بديع خيرى 

صباح فيه رقة واحساس على اللى كانوا بيرققوا قلوب الناس بالفنون وهما متهمين بالجنون
على ليلى مراد و انور وجدى اللى وافقوا يكونوا مساعدين البطل وهما فى عز نجوميتهم
ويا سلام على الجنة لما تكون برفقة الحبيب سليمان بك نجيب صديق النجوم والصفوة وكاتم اسرارهم بنبله وشهامته .
ورحمة ونور على الارواح الهائمة فى شوارع مصر تدور على سينما ومسرح اهل مصر اللى كانت فى كل حى .. حى حى ابداعكم يا رواد الابداع والفكر والنور .. 

ورحمة على روح هند رستم اللى كانت بنوتة صغننة فى أغنية اتمخطرى يا خيل ياترى كانت عارفه انها هاتكون مارلين مونرو الشرق .. وعلى البنوتة اللى مرة قالوا انها وداد حمدى ومرة سناء يونس .. المهم انها بقت نجمة .. 

صباح الامل والحلم والطموح والبدايات المنسية والنهايات العادية والمآساوية
واخيرا ..صباح الخير على العلماء والاطباء اللى اخترعوا علاج التيفود اللى كان مرض قاتل تسبب فى موت فيلسوف الضحك صديق روحى وانيسها نجيب الريحانى .. اللى كان اخر مشهد له نظرة وداع مسلمة للرحيل ..مبتسمة لعشاقه اللى مكنش يعرف انهم هايبقوا ملايين .