نونو فى اول يوم مدرسة

Wednesday, May 28, 2008

تاج د. زين

أستجابة للتاج الممرر لى من الصديق العزيز . د.زين عبد الهادى


استهلال لابد منه

هكذا أختمر الشر داخلى
سأقتل مائة شخص فداء لك يا جميلتى
حتى تتجمع ارواحهم فى العالم الآخر
ويستبدلهم الله بك يا أجمل أم
كم أفتقد ذلك الحضن الواسع
أريد البكاء على صدرك
اتوق لسماع ذلك الصوت العالى من حولى
" أيه يا خايبة زعلانة على أيه "
ثم تخلدين لنومك باكية كاتمة نهنتك على حزنى
ربى ردها الى بعد نجاحى فى قتل 100 روح
***********
أما عن التاج

هواياتي : تفسير الاحلام – التنبؤات – رقص الباليه (أه رقص باليه ) – الغناء الأوبرالى ( فى الحمام )

ثانيا اشهر عيوب: أنى طوبة فى ردود أفعالى ، لما بزعل باخد فى وشى من غير تفاهم ، لانى ببقى معتمدة على احساسى بان المرة دى أخر مرة ، مينفعش حد يجرحنى اكتر من مرة ، فبسكت اسكت اسكت وطخ ، اخبط الطوبة بتاعتى فى الأزاز واختفى زى العيال المجرمين بالضبط واهم حاجة انى عمرى فى حياتى ما هاجى ادق على الازاز تانى او اخبط طوبة تانية خلاص الغضب طلع وانتهى ، وكمان عندى عيب خطير تانى أنى متهيألى أنى بعرف كل اللحواليا بيقولوا ايه جواهم وهما قاعدين وبضايق لما يكدبونى ، مع انى ببقى متأكدة من اللى سمعاه من جواهم وشايفاه الا انى ممكن اصدقهم لما يكدبونى ، دا غير العبيب الخطير اللى عندى انى حاسة انى فراشة اه والنبى حاسة انى فراشة مع انى عاملة زى المربع وانا ماشية فى الشارع لو لمحتنى جنب كابينة الكهرباء متفرقش بينا



ثالثا حاجات بكرها جدا : بكره اوى ان الواحد نظراته تقول حاجة وجواه حاجة ويتصرف حاجة تالتة خالص ودا بلاقيه مع أغلب الناس تقريبا ، كنت الاول فاكراه موجود فى الشغل بس وبعدين اكتشفت انه موجود فى الوسط الادبى اللى كنت موهومة جدا وفاكراه ارقى الاوساط واكتشفت الكلام دا من حوالى 6 سنين يعنى من فترة مش قليلة ، ودا خلانى ابطل اعمل صداقات حقيقية لان الناس مش حقيقية وبكره الحكاية دى لانه غصب عنهم مش بمزاجهم بيبقوا كدا ، كل واحد بيخدم على مصلحته بطريقته



رابعا حاجات بحبها اوى ومش بمل من تكرارها : يووووووه كتير أوى ، يعنى انى اشوف اصحابى كلهم طول الوقت فى اى مكان يتفقوا عليه معنديش مشكلة خالص ، انى اروح مكان اتعودت عليه كل يوم برضه ، انا بعمل حاجات كتير اوى فى اليوم الواحد ، وعمرى ما مليت من الحكاية دى ، بروح الشغل وافوت على القهوة وبعدين اخد نهنوه واروح ، انى ابص على الفيس بوك والمدونتين بتوعى كل يوم ، اشوف نهى محمود وسلوى وطه كل يوم كل يوم ، بالزمة مش حاجة تخنق ومع ذلك مبملش ، انى اقرا واكتب كل يوم برضه أزاى معرفش ، انى افكر فى ماما ومحمد طول الوقت والاقى متعة فى دا ازاى معرفش ، انى اروح كل جمعة لمحمد الصبح فى نفس الوقت من غير ما يتغير ، حاجات كتير صعب حصرها بعملها كتير ومبملش منها ابدا …



خامسا سؤال بيستفزنى جدا : أنت دراستك ايه عشان انا بنى ادم فاشل فى الدراسة ولسة فى ثالثة اعلام فى التعليم المفتوح بقالى ثلاث سنين ...
سادسا امنيتى فى الحياه: أنى أشوف نهنوه بتحقق كل أمنية هاتتمناها انشألله ويدينى ربى الصحة والعمر عشان اقدر أكمل معاها المشوار بتاعها وبس .
سابعا حاجه مؤمن بيها جدا :ستظل تلهث وتلهث ولكن لو تتريث لجاءت لك الأشياء تلهث، مؤمنة أوى أن ربنا سبحانه وتعالى لا يفعل لى الا الخير ، اساسا انا مصدقه انه هنا ومصدقة انه معايا وانه بيختار لى افضل مما أتمنى ، الشىء الحقيقى بجد اللى مخلينى عمرى ما بحزن انى ببقى متأكدة أن كل حاجة بتحصل عشان حاجة أجمل هاتحصل بعدها ، وان الدافع للى يخلينى ارفض شىء او امشى من مكان هو دافع لا أرادى عشان تحصل الحاجة اللى انا مشيت عشانها …



ثامنا اكثر حاجه فاشل فيها: حاجات كتير يمكن بس بصراحة مش عارفاها ، اكيد الناس التانية هى اللى تقدر تشوفها ، زى بالضبط ما يقدروا يشوفوا انا ناجحة فى ايه ، صعب اوى الواحد يحكم على نفسه بالشكل دا



تاسعا وظيفه بحبها : الصراحة الصراحة بحب وظيفتى اوى سكرتيرة رئيس تحرير شاشتى ، او السكرتارية عموما ، لانى عارفة كويس اوى يعنى أيه تبقى كاتم أسرار ومنجز مهام محدش يقدر يعملها غيرك ، موضوع كبير اوى ، غير الفكرة الشائعة عن السكرتيرة والمدير ( ههههههه) عارفينها طبعا .



عاشرا وأخيرا وصلت للنهايه مثلى الاعلى فى الحياه الله يخليه ويديله الصحة يارب ،أبويا رقم واحد عمرى فى حياتى ما شفت زيه ، رجل علمنى يعنى ايه الحب والتسامح والامانه والصدق مع النفس بجد ، مهما ان كانت اخطائه الا انها بالنسبة لى دروس مستفادة ، ابويا اجمل اب فى الكون واحن اب فى الكون ، مهما ان كان غضبى الا انه بيسامحنى ويعديلى ، وياما سامحنى وعدا لى بجد ، ويجى بعده فى المثل الأعلى استاذنا الكبير الكاتب العظيم والانسان الاعظم بجد / علاء الديب ربنا يديله الصحة وطول العمر يارب ..

امرر التاج الى


نهى محمود
شادى آصلان
محمد ابراهيم محروس
أسماء ياسين

هانى ياسين

12 comments:

fawest said...

أه يا سهى

مش بقولك أحرفى اللى... وعندى حق
لما يكون لهيب الحريق يصهرك و يطلعلنا أستهلال زى اللى فى الاول دا

أه يا بت ده

مبدعه والله
واللى يقول غير كدا أفخت عينى
وأمشى أعور
بس هلاقى معجبات ساعتها؟؟

Shaimaa Zaher said...

إزيك يا سهى..

حلو موضوع رقص البالية والغنا

:)

ربنا يسعد أيامك ويخليلك نهنوه الصغيرة وتحقق لها كل إللي عايزاه

وحشاني جدا...

اميمة عز الدين said...

اه يا سهى , كل كلمة اعتبرتها فضفضة وتعبير عما يدور بداخلك , مازلت اراكى طفلة كبيرة تلهو بالكلمات والحروف وتجعلها كلعبة المكعبات وبجوارها طفلة اصغر منها دائما ممسكة ذيل فستانها , الاثنتان تقريبا كالتوأم السيامى , ملتصقين للابد
يارب لا تفرق بينهما وامنحهما رحمة من لدنك انك انت السميع العليم
محبتى
اميمة عز الدين

Reham R. said...

مساء الخير
أنا أول مرة أعلق هنا
المدونة لطيفة
والتدوينة دي كمان لطيفة
هواياتك حلوة
بالنسبة للعيوب: أنا مش شايفاه عيب بصراحة، أهم حاجة الواحد يعملها لما يحب يقطع مع حد انه يديله ف وشه، ويطلع تلاتة دين أمه بالقديم والجديد، وبعدين يمشي ميوريهوش وشه تاني، أنا شخصيا بزعل أوي لما أفوت على نفسي الفرصة دي، وأقطع علاقتي بناس بهدوء كدا، بتغاظ!، وبالنسبة للفراشة ده مش عيب طبعا! أهم حاجة برضه ان الواحد يكون متسق مع نفسه، ومش حاسسها تقيلة عليه
بالنسبة للحاجات اللي بتكرهيها: أنا معاكي، وبكرهها برضه، للأسف انه من أوسخ الأوساط إن لم يكن أوسخها على الإطلاق، انما أنا مش معاكي ان دا غصب عنهم، مفيش حاجة اسمها كدا، منا ممكن أعرفك مصلحة أو شغل مثلا لكن أكون واضحة معاكي ف ده، إيه المشكلة؟ أنا مكرهش قد اللف والملحسة
رابعا وسادسا: ربنا يخليهالك :)
سابعا: جميل أوي، أنا متفقة جزئيا معاكي، بمعنى اني مبندمش على حاجة بعملها حتى لو غلط وودتني ف داهية، لأن أسوأ التجارب بتمدني بأفضل الخبرات، أنا مقتنعة بكدا، ودا قريب من فكرة ان ربنا مبيديناش حاجة "وحشة"
تاسعا: أنا مامتي اشتغلت سنتين سكرتيرة، وبابا مكنش المدير هههههههههه
عاشرا: ربنا يخليهوملك :)
تحياتي :)

سهــى زكــى said...

فاوست العزيز

اشكرك يا صديقى فانت أدرى بالانصهار ومعناه
حقا ، لانك قريب منى الان

سهــى زكــى said...

شيماء زاهر ،
والله قلبى بيفرح اول مالاقى ليك تعليق عندى ، بتنورينى جدا جدا برقتك يا بمبونية انت

على فكرة الشغل اللى انت عاملاه فى مدونة الشهيدات رائع

تحياتى

سهــى زكــى said...

أميمة عز الدين
كلنا لم نتخلص منه ، ذلك الطفل المعذب بمرور الزمن عليه

د\أسماء علي said...

أجمل حاجة ان ردوك تلقائية إلى حد الوصول إلى القلب بسهولة ..
قريت ردودك حسيت اننا قاعدين بندردش واودامنا كوباية قهوة كده ..
...
سهى انتي حد جميل اوي بجد ..
...
الأجمل إنك مررتي التاج لناس بحبهم جدا
و أولهم محروس باشا
...
شكرا انك متعتيني بتلقائيتك

سهــى زكــى said...

ريهام

انت متقدريش تتصورى اد ايه انا ممتنة وسعيدة جدا جدا بردك دا وعلى فكرة
دمك خفيف وزى السكر وشكلك كمان شخصية دماغ وصعب حد يتسلل كدا سرقةو ويملاها ، اه بجد ، عموما اكتر حاجة بسطانى دلوقتى ان الكلام عجب العقلية المتينة دى
نورتينى بجد وياريت متكونش الاخيرة

سهــى زكــى said...

د/ أسماء على
اولا اهلا وسهلا وخطوة عزيزة جدا جدا والله لولا الملامة لكنت عزمتك على حاجة تشربيها وانت واقفة على الماشى كدا ، عموما انت متقدريش تتصوى اد ايه ببقى فرحانة انى الاقى حد ميعرفنيش شخصيا ويشوفنى كويس من كتابتى ، اجمل حاجة فى الكون انك بجد متبزليش مجهود كبير فى انك تورى اللى قدامك ايه جواك
وواضح انك من الناس اللى بتقرا من جوا قوى من جوا السطور وعلى قد ما حاجة تفرح على قد ما هى حاجة تخوف لان دا معناه انك حساسة جدا جدا
على فكرة انا بحترم الاستاذ محمد ابراهيم محروس جدا جدا لانه ورغم عدم تعارفنا شخصيا حتى الان الا اننى اتابع كتابته وهو كذلك وهذه اجمل صداقة لم نرتب لها ، ولك كل الحق فى محبته
تحياتى لك
ودمت زائرة مش عزيزة يعنى على طول كدا ها ماشى

طارق إمام said...

يعني أنا مش مثلك الأعلى يا سهى؟؟؟؟
)))))):

سهــى زكــى said...

يا طارق انت مثل اعلى لجيل كامل جاى بلاش طمع بقى
ايه انت مش عاتق طالع واكل قراء نازل واكل ادباء
الرحمة شوية وبعدين انا استاذى استاذ ناس كتير قوى مش انا بس
بس ابقى ربعه بس
لكن انت مالكش مثيل يا جميل
ربنا يديم المرعوف بينا يا صديقى العمر المتنى والمفروض والسادة والمزبوط واللى بفوم والمفسود