نونو فى اول يوم مدرسة

Saturday, May 12, 2007

فى السراء والضراء


وشك أحمر اوى من الكسوف والفرحة يا نهى

فى السراء والضراء



عارفين يا جماعة ايه اللى حصل فى يوم الاربعاء الموافق 9/5/2007 حدفت علينا نهى محمود كركوبة صغيرة من كراكيبها اسمها " الحكى فوق مكعبات الرخام " كان المفروض ان الكركوبه دى ها تتناقش فى ميريت كما هو معروف للجميع والمش جميع ... والمفروض انها حفل توقيع وتدشين لظهور مركب جديدة فى بحر الأدب ... ربما تغرق فى البحر وربما تسير الى لا ميناء وربما تعرفها كل الموانى ... نهى محمود بت جدعة قوى وصغيرة وشقية ودماغ ، وكمان من عيلة محترمة وابوها راجل فاضل واخواتها عيال جدعة قوى قوى ... وكل دا طبعا مش مهم فى الادب لكن الأهم هى بتكتب ازاى ، على فكرة هى مدونة رائعة جدا جدا ، لكن روائية دى فيها مشاكل شوية لغاية ما نشوف ايه اللى هايحصل فى المستقبل .... اصل الموضوع مش سهل زى ما انتم عارفين ، وطالما مراهن عليها كتاب كبار يبقى اكيد فيها حاجة ... حضر الحفل المبهج جدا .. اول ناس واهم ناس جم هما أصدقاء عمرها وهما دول الجنود المجهولة اللى ورا نهى محمود ، شيماء وهالة وعمرو ... مش ممكن حاجة تسحر اهم حاجة فعلا فى هذا العالم هى الصداقة ، يقفون بهالات مضيئة حول رؤؤسهم كالملائكة الحارسة ، ما أجمله من شعور فى وجود الاصدقاء المحبين بصدق ومن القلب ... هم وقود عالى الطاقة ... هم نفس وفكر وقرار ، هم عيون صادقة ترى ما لا تراه العين المجردة ...

هالة وشيماء وعمرو... انتم اجمل اصدقاء رأيتهم فى حياتى ، بس خلو بالكم انا عندى اصدقاء جامدة اوى برضه اه واسألوا نهى ... وهم جبلوها حهدية جميلة اوى ، دبدوب جميل وحمار ... دا غير المراكب الصغيرة اللى عملتها شيماء فى شيكولاتة اكلير مستندة لغلاف الكتاب الرائع اللى بينطق لوحده ... ومن هنا بوجه تحية حايرة طايرة للرسيم الجامد " أحمد اللباد " ربنا يسعده وما يلبده قادريا كريم ....

كمان حضر الندوة أهم حد فى حياة نهى ..بابا نهى .... حتة راجل سكرة وهادى هدوء محبب ويدخل الروح فورا وطبعا اخوها القمر طارق اللى كان فرحان بأخته فرحة مالهاش حدود ... وطبعا مننساش ان روح اغلى واهم من كل الموجودين كانت بترفرف بسعادة وشقاوة وايمان فى وش نهى المنور قوى فى الليلة ، روح ام نهى رحمة الله عليها ... كانت موجودة والله كانت موجودة واللى مشفهاش مش مشكلتى بقى ...

وطبعا زى ما انتم عارفين او مش عارفين ان السيد محمد هاشم هو مكتشف نهى الاول وان د. عبد الحكم سليمان هو الذى قطع الشريط وأطلق لنا الست نورماندى 2 .... وانا شايفة ان الراجل اللى اسمه محمد هاشم دا رجل ليس من هذا الزمان ... ما هذه الطيبة وما هذا الامل وما ما هذا الاصرار الذى يتنافى مع الطيبة والامل ... الله يخرب بيت كدا انا مش فاهمه حاجه من اللى بقوله ، لا والله هو الراجل دا طيب كدا ليه وبيحب يشجع الشباب واللى مش شباب كمان ليه ... وعلى فكرة دائما تلاقيه مصاحب ناس شبه وطبعا مالطيور على اشكالها تقع .. أو متقعش ...؟!

حضر بقى الليلة شوية كدا جامدين من نجوم السما اللى عند نهنوه محمود فى المدونة منهم الواد القمر الطويل العسل دا اللى انا اتلخبط فى اسمه مودى النودى كونودى اللى قام بالليلة تصوير وحركات جامدة ... وحضر شخص لطيف ظريف دمه خفيف بيصور فيديو اسمه وكمان جه نائل الطوخى عارفينو طبعا اللى هو أكبر عدو لطيف للأنسانية وكان نفسه يرمى كرسى فى الكلوب بس بصراحة كلنا قدرنا عليه وحوشناه ... وكمان كان موجود الفخرانى صاحب الرواية اياها ها عارفينها طبعا مفيش داعى نتكلم " فاصل لل...." وكان محضر ورقة مقلش منها حاجة ولا من غيرها وحياتكم .... دا غير بقى محمد صلاح العزب اللى متكلمش كلميتن على بعض ووائل السمرى الواد الاسمرانى دا اللى هو طول بعرض على فكرة الواد دا جدع بجد وخدوم لانه مبيسبش حد من صحابه الا ويكون موجود معاه بالطريقة اللى بيحبها ... عسولة وائل على فكرة ...
وطبعا العزيز ابراهيم معايا ومش معايا جه ونور القعدة ، يوووووه كنت هانسى صحيح الشاب الوسيم الامور باسم شرف العسل اللى حضر كدا زى النجوم المستخبية تظهر لما الدنيا تضلم اوى ... وعلى فكرة اتكلم كلام حلو محايد رغم انه بيقول انه مبيعرفش يتكلم لكن بصراحة هو بيعرف يتكلم اه والله ...

مين تانى ... مين تانى ... على فكرة عمنا الكبير الشاعر الخطير ابو قلب كبير أحمد فؤاد نجم كان منور القعدة لمدة 10دقائق وبعد كدا مستحملش ارواحنا التقيلة عليه وهو اخف بكتير من الشقاوة ..
غاب عن الحفل ناس اكيد كان نهى نفسها يجو ومجوش واختفى فى ركن كالعادة شحاتة العريان وانضم له المرة دى حمدى ابوجليل ... وسابولنا الملعب نلعب فيه يمكن نعرف نجيب اجوان ...

المهم ان الكلام اللى اتقال عن رواية " الحكى فوق مكعبات الرخام " لنهى محمود كلام يبشر وجميل ولكننا مستنين اللى جاى لانه هو الاهم ولا ايه

********
طبعا انا معرفش ليه الصحاب بيسندوا دائما ويبانوا وقت المصايب بس ، مع ان المفروض انهم يبقوا موجودين طول الوقت .... خاصة بتوع الوسط الادبى ... ميظهروش الا فى المرض والموت بعيد عنكم ... حاجة تجنن والله ....
ويارب يا جماعة مكنش نسيت حد ، لكنى اكيد نسيت

16 comments:

كراكيب نـهـى مـحمود said...

شكرا يا سهى على رؤيتك الجميله لليوم
لشكرا لوجودك الذي اسعدني جد
وكلماتك شكرا للجميع وللحب ذلك الأكسير السحري للحياة

shaimaa said...

متشكرة اوى يا سهى عن كلامك عننا
بجد ربنا يكرمك

نهى تستحق كل خير وانت كمان

على فكرة الظريف اللطيف اللى كان بيصور الفيديو اسمه احمد يوسف و من باقى قبيلتنا
ربنا يكرمك يا سهى

وكان معانا كمان فيفا ومحمود فوزى بس جم متاخرين شوية
ربنا يكرمك يا سهى

sherifmegid.blogspot.com said...

@سهي انتي نسيتيني مش عارف ليه دايما تحصل معايا الحكايه دي حاسس اناالعمر هيجري وماحدش هيفتكرني ابدامع اني والله بحاول دايما اكون قريب بس هو هوه ده القدر محمد الله يرحمه كان دايما يقولي يا شريف انت وانا هيفتكرونا ككتاب مهمين للقصه القصيره بس لما نموت والظاهر انه عنده حق ساعات كتير بتكلم معاه ولمه ابقي رايح ندوه التكعيبه يتهيئلي انه هشوفه عموما اتمنالك التوفيق دايما

KING TOOOT said...

الصداقة صخرة لكن ليها قلب
قلب نابض بالآمان و بكل حب
الصداقة صخرة لكن ليها روح
روح تفوح منها السعادة وقت كرب
وعجبي
___________
KING TOOOT

Ahmed Shafie said...

شكرا شكرا يا سهى
خلتيني أحس كأني ما حضرتش الندوة بجد

سهــى زكــى said...

يانهنهوه لا شكر على حركات وكدا

اما شوشو القمر ، فانا بصراحة لوقلت معلقات فيكى مش هايكفيكى انت هالة وعمرو واحمد يوسف كمان ياستى عشان متزعليش لانكم بجد قبيلة خير وجمال

يا شريف عبد المجيد ، انت كنت موجود ومش موجود لأنك يعنى مفيش داعى اتكلم مقرتش الرواية اصلا ساعتها وماكنش ينفع احشرك كدا والسلام ولا أيه ...ها

العزيز الشاعر كنج توت ... لا تعليق طبعا بعد كدا

ياعديقى الحبيب جدا جدا احمد شافعى أى خدمة و هاتحفك على طول كدا...

nael said...

الحاجة الوحيدة اللي بيثبتها البوست دا بقوة هو ان احمد شافعي مازال عبقريا

سهــى زكــى said...

ماشى يا نائل ربنا يخليلك العبقرى بتاعك ويباركلك فيه قادر يا كريم
وانت ازاى تحكم على بوست كدا من برا ها ها ها ....أيه ... اسكت خالص

Abul-banat said...

إزيك يا سهى
أنا عمرو إبراهيم إللي انتي كتبتي عنه الكلام الجميل ده

أولا شكرا جزيلا على كلامك ومشاعرك
وثانيا ده شرف لينا نتعرف على الكوكبة الجميلة دي - حلوة كوكبة دي؟ :)

بجد احنا كنا سعداء جدا بنهى الليلة دي
ربنا يكرمها ويكرمكم جميعا

وفرصة سعيدة

عمرو إبراهيم

سهــى زكــى said...

يا أبو البنات ربنا يخليلك البنات يارب ويديك الصحة والعافية وأفرح بالبنات يارب ... هما كام صحيح ... ولا مفيش اصلا ولا أيه ، على العموم انا بأشكرك جدا على ظهورك اللامع فى المدونة وعلى وجودك فى حياة نهى لان متهيألى انه فارق كتير اوى معها ...

Abul-banat said...

هاها
ربنا يخليكي يا سهى

همل حاليا بنتين
بس في خلال شهرين بإذن الله حيبقوا تلاتة

ده طبعا من غير ما أعد نهى معاهم :)

شكرا جزيلا على كلامك الرقيق

reem said...

ربنا يخليكم لبعض

Moody said...
This comment has been removed by the author.
sherifmegid.blogspot.com said...

اول مره اشوف ردح الكتروني وبعدين انا بحسبك واخده مني موقف وجودي طلعتي واخده مني موقف احمد حلمي ماشي يا نهي وبعدين ايه مش عايزه اتكلم دي انا حاسستيني اني عامل عامله

سهــى زكــى said...

يا أبو البنات انت عارف كدا يا لئيم انك على الجنة حدف صح ولا أيه ، على فكرة بقى انت تستاهل اكتر من كدا ...

يا ريم يا جميلة ربنا يسعدك بقلبك العسل دا ...

يا بنى يا شريف يا عبد المجيد انت ايه مالك فيك أيه ... أتكلم بسرعة ...خلاص مش شغلانة يعنى منستش البخارى ...اااام

مودى النودى كونودى فين هى الصورة انا مشفتش منك حاجة وحياة النبى يا شيخ تبعتها ... وانا هافضل مديونة مديونة اكتر ما انا مديونة بهذا الفضل العظيم ...

Moody said...
This comment has been removed by the author.