من الشهيدة الملائكية الى المجهول الشرير

بجد مش عارفة اعمل ايه فى الملهمين بتوعى

وأدى بوست من بوستاتى الشهيرة

وخروج أخر من الوحدة المؤلمة

أهىء أهىء أهىء

(دافعت عنك باستمامتة عند كل من يراك مغرمة بعيش دور الشهيدة ..ضحية دائما و ابدا..ولكن من الواضح انك تحبين هذا بالفعل وأرجو ان لا تفقعينى بوست من اياهم انا كمان ...أصل لاحظت ان كل ما حد يضايقكتنزلى بوستاتك الشهيرة لمحاكمة الشياطين الذين تجرؤا على ملائكيتك ال مش عارف اية....تاجرتى بما يكفى بمشاعر الاخرين..و استثمرتى ما يكفى منها لصالحك..الى متى ستلعبين دور الفراشة الرقيقة و تفصلين الاحداث على مقاسك..خاصة اذا كان مقاسك يحتاج لبراح اكثر قليلا مما تحتمل الحقيقةانا واحد بتشوفى امة كل يوم على ام التكعيبة..بس هو اجبن من انة يقولك دة فى وشك سلام يا...ملاك)

اهلا بيك
والله انا كنت ناوية اريح شوية من الكتابة فى المدونة علشان عندى حاجات اهم (التكعيبة مثلا ) لكن اشكر المجهول أو المجهولة لاستفزازى لخوض معركة وهمية عظيمة جديدة لاننى بمجرد قرأتى التعليق فكرت اعمل منه نسخ كتير وانزل بيها على التكعيبة واطيح فى اصحابى كلهم بشخط ونطر وعصبية وبكاء شدييييد واشحتف وانا ببربر واتف وانف واقولهم يا خونة مين فيكم اللى كتب التعليق المهين دا ، لكن بصراحة لما هديت شوية من الصدمة وشربت كوبية شاى بلبن مع موسيقى موتسارت عبد العزيز ، وضوء عظيم موحى من لمبات النيون الكتييييرة حواليا قلت ما بدهاش دا يابت حد عايز يشتهر على افاك وطمعان فى هدومك اللى نصها شحاتة وانا بصراحة ماليش افا ، وغير كدا فعلا الهدوم اللى بالاقيها يادوبك على قدى لانى تخينة ودى طبعا حاجة مش مستخبية ، انا سعيدة سعيدة سعيدة بجد سعيدة انك يا مجهول حاططنى فى دماغك اوى كدا بجد فى قمة سعادتى لو كنت متابعنى كويس كنت عرفت ان من اهم حكمى العظيمة هى ....

"يتأكد وجودك بوجود من يكرهك"
أشكرك اوى انك مركز معايا للدرجة دى والنبى ابقى تعالى قاسمنى فى مكسب المشاعر اللى تاجرت بيه واستثمرته فى المضاربة فى البورصة واللى خلانى ايه حاجة مفتخرة .
يعنى قصيدة شعر لسالم الشهبانى مع قصيدة لخالد عبد القادر وقصة لاسماء ياسين وحكاية رائعة لطارق امام مع قفشة فكاهية لباسم شرف ، ومعركة جديدة لطه عبد المنعم ، او فى بوست جديد لازم تقراهلنا نهى محمود حالا ، شاركنا مكسبى التجارى وانا بتخانق مع طه على الكتب اللى معاه وهو يقولى هاتى اللى عندك الاول قاسمنى مكسب المتاجرة فى مشاهدة مسرحية فى روابط او حضور ندوة مهمة فى ورشة الزيتون اوندوة جبريل و صالون علاء الاسوانى فى الخميس المقدس بتاعى ، أو حفل توقيع فى عمر بوك ستور وديوان ، شاركنى مكسب المتاجرة بمجموعتى القصصية الجديدة والرواية ، هيا تعالى شاركنى مكسب المتاجرة بمشاعر الناس الذين رحلوا عن عالمى تماما وهم احياء يرزقون لا أعرف عنهم شيئا ولا يعرفون عنى شيئا ، انت بالفعل تعرفنى جيدا ؟!
ههههههه
واللى انا متأكدة منه أنك مش من الناس اللى بيقعدوا فى "التكعيبة" اصلا ، لأنهم كلهم مش محتاجين يقولوا حاجة زى دى من غير ما يقولوا هما مين ، على فكرة كمان المساحة اللى بينى وبين الناس اللى بقعد معاهم واصحابى كويس اكبر بكتير مما تتخيل ، يعنى يجى اد من هنا للمنصورة كدا ، او من هنا لشارع الحوسة والخيبة الكبيرة اللى هو شارع الضباب.. وابقى قعد معانا مرة وانت تتأكد بنفسك يا جميل ..
والله والله والله والله انا فى قمة نشوتى حالا ، يمكن يكون حد مسلطك تفرح قلبى عشان ابطل احس بانى مسكينة مسكينة وغلبانة
هه هه هه هىء هىء هىء