قلب امرأة مش قلب الهام شاهين

مسلسل قلب امرأة

مسلسل يخرج بنا من مرحلة السخرية لمرحلة الاستهزاء بمشاعرنا ، كاتب فذ ومخرج فلتة ، صنعوا لنا صينية كنافة بالقشطة والمكسرات محشوة بالملبن وقمر الدين والمهلبية ومزينة بالزيتون الاسود والفلفل الاحمر والاخضر والجبنة الموتزريلا ، يعنى ايه قلب امرأة ، يعنى احزان واوجاع وبهدلة وتنهدات لا تنتهى من هذه الامرأة مش كدا برضة ، يبدأ بنا مسلسنا القنبلة ، بالغلبانة المسكينة نوال اللى تجوزت مرتين اتبهدلت فيهم وطلع عين اهلها واللى بتمثله الفنانة الشابة اللى مصرة تبقى شابة طبعا زيها زي غيرها واشمعنى الباقيات ، عارفين الازمة مش ازمة احساس الشباب ، بس اللى مش واخدين بالهم منه
انه بيبان على الوش والله بيبان واللى مش مصدق منهم يقعد شوية كدا ميبصش فى المراية وينسى ايد الماكيير والكوافير ويجى يبص بعد كدا فى المراية وهو يعرف حقيقته ، مينفعش ابدا ، تطلعنا الهام شاهين شابة لسه عايشة حياتها كل سنة ياربى مفيش مسلسل مفيهوش حكاية حب ، دور ممكن تعمله اى بنت عندها 20 سنة ، تعملة الفنانة الكبيـــرة الهام شاهين ، ماشى مفيش مشكلة اصل الممثل الجامد ممكن يصغر نفسه واحساسه ، لكن للاسف جت تقيلة اوى اوى وعجوزة فى المسلسل دا واستخفاف واهانة لكل العقول اللى بتتفرج على مسلسل مش مفهوم اوله من اخره ، هى الحكاية حكاية مين بالضبط ، حكاية عايدة رياض وبنتها ولا احمد خليل وبناته ولا مروان بيه اللى هو ماجد المصرى ، نسيج متهرىء تماما ، مسلسل اقل ما يقال عنه انه لم يخرج بعد ، لماذا يجرب فينا الكاتب والمخرج ، لماذا لا تأخذ المسلسلات وقتها فى الصناعة ، هو رمضان شهر الصوم والعبادة والمسلسلات بس والا ايه

الرحمة يا اهل الرحمة، قال ايه بعد ما نوال اتبهدلت البهدلة دى كلها ، يحبها البيه الكبير ابن الحتة الشهم الجدع اللى مفيهوش غلطة واحدة وهى كاملة مكملة ، وبعد ما يحبها ترفضه وهى بتحبة وبعد ما ترفضه توافق عليه عشان الجندى المجهول اللى هو اختها الصحفية الفاشلة تماما اللى ادت دورها ريم البارودى ، اللى بتمثل فى اكتر من مسلسل نفس الشخصية الطيبة الغلبانة اللى مفيش فرق خالص ، غير شكل اللبس والبيوت اللى بتعيش فيها ، اما الاداء فلم يتغير اطلاقا ، عموما بكرا تكبر مفيش مشاكل اهى لسة بتشق طريق وايه يعنى لما تشقه فى وشنا ، امال مين اللى يستحمل ، المهم ان الجندى المجهول اللى هى اخت نوال الصحفية اتدخلت دشليون مرة فى المسلسل عشان تساعد اختها تقرب من مروان وتحقق نفسها كمصممة ازياء فجأة كدا ، دا غير استفزاز البنات العانسات والسيدات المتزوجات من رجال غلابة ، مفيش حد فيهم يقدر يجيب لمراته حتة نحاس حتى مش حتة دهب ، فما بالك بالاستفزاز بكل دقيقيتين فى المسلسل هدية قد الفيل ، وغير النحنحة والحب والهيام والرومانسية المفتعلة الفجة

بين بطلين عملاقين الجسم والملامح هما نوال ومروان ، بغض النظر عن ان المبالغة فى المشاعر والهدايا كانت فرشة للقلبة السودا اللى قلبوها على بعض بعد كدا وخاصة تغير الست الكاملة المثالية من النقيض للنقيض ، اللى بها بيضربلنا كل اخلاق ولاد الاصول فى مقتل ، والواد البراوى ابنها اللى مفيش اى ملمح واضح يدلنا ليه اتحول التحول المهبب دا لما اتنقل من الحارة للشقة الجديدة مفيش حتى رمز يدلنا على تحوله ، والفنانةالقديرة سميرة عبد العزيز ، ليه تطلع بس عشان تموت غضبانة على بنتها ، حاجة بصراحة ملهاش اي معنى واهانة لفنانة بهذا الحجم ، اما دور صديق البطل اللى قاعد على طول فى البازار مبيخرجش منه ، وكل دوره انه يقولنا اللى عمله البطل واحنا مشفنهوش حاجة تشل والله ، اما الصحفية فاكرينها اللى فوق ، متجوزة يا عينى دكتور ملهوش اي دور غير انهم يقعدوا يتكلموا مع بعض عن نوال بس ، هى دى حياتهم، لكن بصراحة وخلينا نكون عادلين ، فى ممثلة جامدة جدا جدا جوا المسلسل دا لو ركزت بجد هاتبقى نجمة فى خلال سنتين بالكتير ، الفنانة الجميلة دى اسمها "شيرى" شابة صغيرة جدا صحيح لكن ادت مشهد مع الشاب هيثم اللى عامل دور اسامة ابن نوال وهو بيحاول ياخذ حقه منها ، ومشاهدها مع امها عايدة رياض ، ومشاهدها مع الفنان الجميل سيد صادق لما كان بيطالبها بالزواج ، فنانة احساسها عالى جدا وحكايتها فى المسلسل هى الطاغية ، وتحول مسلسل قلب امراة من قلب الهام شاهين الى قلب عايدة رياض الجبروت والغباء والقسوة ، وقلب تلك الفتاة الرقيق التى تعانى من تلك الام الغانية المادية التى على استعداد لبيع بنتها ، قلب امراة هومسلسل ممل جدا فى حكاية الهام شاهين كلها أو نوال ومروان ، وممتع جدا وهى يحكى عن عضو مجلس الشعب والسيدة المحرومة الانتهازية عايدة رياض ..
ترى هل ترى الهام شاهين نفسها جيدا فى المسلسل ، هل مقتنعة تماما انها بطلته ، ربما ... اعلم انها ممن لا يهتمون بالكم وانما بالكيف ولكن الكيف فى هذا المسلسل لا يليق ابدا بتاريخ الهام شاهين الحقيقى خارج اطار المسلسلات الواقعة ....
اما ماجد المصرى ، فعملاق بشكل مبالغ فيها لان يكون جانا غنيا والتمثيل باين باين باين .....
اللهم ارحمنا من المسلسلات وصانعوها واكفينا شر منتجوها واهدى ممثلوها قادر يا كريم