نونو فى اول يوم مدرسة

Thursday, October 1, 2009

- تانى مرة نشر عشان اقول انى فعلا عملت اللى قلته ومش مصدقة ، بجد عملته فعلا أحساس مؤلم

انك تتحمل اى حاجة "عشان خاطر"
أنا دلوقتى بكتب وأنا فى منتهى العصبية وحرقة الدم ، ملعون أبو كدا...

أعصابى هاتنفجر، حاسة أن شرايينى هاتطق بمعنى الكلمة
أنا باحاول أخذ قرارات مهمة فى حياتى
واللى منها أنى بعد كدا معنديش أستعداد أنى أجامل حد و
هانفض الطيبة والسذاجة اللى مغطيانى
لازم أتحرر من آسرالحساسية والشفافية والمثالية ..!
أتحرر من عبودية المحبين
كان عنده حق زمان " أحمد شافعى " لما كنا قاعدين مع بعض مرة على "التكعيبة"

وكنا بنتكلم عن الشفافية والحساسية والحاجات دى ، وان الدنيا جميلة وكل الناس طيبين
وأن الحب دا بيرفرف كدا على العالم ، قالى :- "انت عايشة فين ، إحنا بشر،
والبشر الطبيعى لازم يكره ولازم يحس بكل المشاعر اللى أنت بتقولى عليها شر
- الشر الحقيقى أنى أضغط على نفسى عشان أتحمل حاجة مش

أو حد خانقنى أو أكدب ، والأنسان الصادق فعلا هو اللى ميكدبش
على روحه ويخليها تشوف الحاجات عكس ما هى عشان
ميحسش بالمشاعر الوحشة اللى بتقولى عليها ...
- أيوا رغم انى كنت باقاوحه كتير فى دا إلا أنه كان عنده كل

أنت كنت على حق ، أصعب حاجة أنك تكدب أحساس حسيته تجاه حد
أو حاجة وتعدى الليلة ومعلش ويالا ... أصله غلبان ، أصله يمكن مش قاصده
لا بس طيب ، وأنت أكبر وأحسن والطف ، أو أن الحاجة اللى بتحصل دى بتحصل
لأنها أفضل حاجة بتحصل وما ينفعش غير كدا ، لا مؤاخذه ، دا كلام بنصبر بيه
نفسنا على إحتمال البلا البشرى الخنقة ، أنا خلاص دماغى قربت تتفتفت فتافيت فتافيت
يمكن مش قادرة أقول إيه المشكلة اللى خانقانى بجد ، لكن أنا كل شوية بكتشف
انى لازم انزل ناس من على ودنى ، وناس من على دماغى ، وحاجات مجاملات كدا ملهاش
ولازم ارجع لـ "الحراب المدببة " بتاعتى تانى اللى كنت ناسياها الفترة
اللى فاتت دى واللى عايز يعرفنى على كدا يعرفنى واللى مش عايز خلاص هو
انا.. سهى زكى محبش الخنقة والعبودية والأحساس بالدونية
ولا بحب اشوف ناس مستضعفة وعاملة فيها غلبانة ، ولا ناس مستعفية ومعندهاش حاجة
حقيقة تعملها كرهت السلبية اللى انا فيها ، لازم بصراحة أتمرد شوية على الوضع
اللى انا فيه ، بقالى 14 سنة بقاوم الملل الروتينى فى وظيفتى ، وعاملة فيها مقاوحة ودماغ
ومبطلتش قراية ولا كتابة ولا قعاد على القهوة ، وقال عاملة فصل تام
بين حياتى العملية وحياتى الشخصية ودا طبعا مش حقيقى ابدا ...
لأن الاثنين بيأثروا على بعض جدا جدا، انا بتخنق من التأنق ، خاصة لما اخذ
كلمة مش تمام بمنتهى التآنق ويتحرق دمى بمنتهى التأنق ، وأى أهانة تطلع بمنتهى
المهم بمنتهى التأنق لما تتأكد ان مكنتش استحق كل الحاجات المهينة دى بمنتهى
لا تعتذر ولا تشعرنى انك عرضتنى لأى شىء جارح حدث لى بمنتهى منتهى التأنق
وعلى فكرة انا قررت ان اى حد مش طايقاه ماتعملش معاه ولو الظروف
اجبرتنى اتعامل معاه يبقى واصله كويس اوى انى مضطرة ...
أصل خلاص مفيش وقت بجد
- الموت علمنى ان مفيش وقت كتير عشان اقعد اجامل واحايل

وارسم ابتسامة مشرقة لحد مش مشرق
وامدح فى دماغ انا شايفها فاشلة
واحبب ناس فيا مش فارقين فى الحقيقة فى حياتى
واكره ناس عشان حد تانى بيكرههم
ملعون ابو الحساسية والذوق والادب
اللى يخلونى اتألم طول الوقت
فالشايف نفسه ممكن يضايقنى والنبى يبعد من طريقى عشان
معنديش استعداد استحمل
انا هادوس وهادبح وهألم
وساعتها هايكون احساس مؤلم انك تحسه منى
انا تانى سهى زكى بارنويا وحركات لا
لكن محبش حد يدوس على ديلى وانا ماشية
على فكرة انا كدا هديت شوية
ويمكن فى الآخر مقدرش اعرض اى حد لأى احساس مؤلم
ااعمل ايه فى روحى ياربى
حد عنده حل للمشكلة دى

**********
صدقنى يا صاحبى ان خفت متقلش
وأن قلت ما تخفيش
الكدب طبعه الخوف
الصدق ما يخونش والكره يوم بيموت
والحب ما يهونش
فوق الجبين
الخطوة فيك تمشى تندم قلوب وتدوب
وقلوب متندمش
امشى فى طريق الخير
فى الشر ما تمشى دى الدنيا بحر كبير
والحال مبيدومش
صدقنى يا صاحبى
ان خفت ما تقولشوان قلت ما تخافشى
أحمد منيب

8 comments:

حسن ارابيسك said...

هاتمرد عالوضع الحالي

أغنية لعمر دياب من فيلم أيس كريم في ديسمبر

أكثر ما يؤلم الإنسان ويرهقه ويتعبه نفسياً
ألا يكون على طبيعته مع الأخرين
ألا يعود الناس على طبائعه
ويصبح اسير طبائعهم هم
ألا يعلن عن رأيه بمنتهى الصراحه
أن يكتم إنفعالاته ويدفنها بداخله
أن يتنازل عن حقه في أبسط الأشياء
فيعتاد الناس من حوله على هذا التنازل والنزيف المستمر
والموضوع بمنتهى البساطة قولي أنا كده
أعلني في الجميع غائبهم قبل حاضرهم
أنكي نحلة
لديكي العسل ولديك العقص..اللدغ
فمن اراد العسل منكي يوماً فعليه أن يتحمل عقصك في يوم أخر
فمن إرتضى فعلى الرحب
ومن لم يرتضي فشأنه

المهم ياسهى رفقاً بنفسكِ قليلاً
تحياتي

واحد من الناس said...

اول مره بكتب تعليق على مدونه لانى اول مره اعرف قيمة المدونه بجد الانسان ممكن يشوف النور فى محبسه لكن مستحيل يشوفه فى جهله !!!!
الصديقه العزيزه طول ماانت عايشه فى مصر عمرك ماهتشوفى مصر
مصر دى حاجه حلوه قوى بكل مافيها من فقر واستهبال وشفافيه وقلة حيله وقلة عقل
لو جربتى الغربه ذى ما انا شوفتها لو حسيتى للحظه انك ريشه فى وسط بحر بيتخبط بيك الموج ومافيش حيله هتعرفى مصر
لونزلت دموعك مالقتيش حد يمسحها هتعرفى مصر
تعرفى اجمل شئ فى الدنيا ان الانسان يعيش وهو متاكد انه ضحى علشان ناس بيحبهم انه استهبل على نفسه واعتقد انهم بيحبوه ذى مابيحبهم ويفضل يحبهم المهم فى النهايه فى كلمة حب يعنى فيه قلب يعنى فيه ناس يعنى فيه مصر
من وسط نار الغربه
تحياتى

سهــى زكــى said...

صديقى الاعز
اولا لك وحشة من هنا للسما وفعلا صفحتى المتواضعة اشتاقت لريشك الرقيقة
بالمناسبة انا مفيش حاجة مضايقانى خالص خالص بالعكس انا بعيش مرحلة قوية ومثمرة ولكنى لو لاحظت بقول فوق ان البوست دا للمرة الثانية عشان كنت حابة انى افرح بانى نفذت كل اللى فيه وانى دلوقتى اهدى بكتير واعصابى مستريحة اكتر والحمد لله كل شىء هادى على الجبهة
حسن بالذمة مش عيب عليك تختفى لى بالشهور ومتظهرش غير لما ابقى مضايقة انا مبحبش الصحاب اللى بيظهروا وقت الزنقة ويختفوا دول ها الموضوع متساوى بالنسبة لى الصحاب يبقوا مع بعض طول الوقت ولا ايه ، صباح الفل على عيونك يا سونة ويارب يجمعنا على خير فى يوم من الايام بعد شهر بعد سنة بعد ميت سنة يوم القيامة المهم نتقابل على خير
ههههههههه
اطمن يا سونة

سهــى زكــى said...

واحد من الناس
تحياتى لك فى محبسك الغريب
بص بقى تصدقى انى حاسة بقيمة كل ذرة من تراب مصر وكل حاجة وتصرف وكل زبالة وكل جمال وكل تشرد وكل عز ، انا بحب مصر حب مرعب يخلينى كل مرة افكر انى اسافر احس انى رجلة تقيلة ويمكن يصيبنى شلل قبل ما اطلع الطيارة الكلام اللى بقوله دا رغم انه يبان عبيط شوية الا انه حقيقيى جدا انا ممكن اشجع الناس على السفر لاى مكان طالما هايقدروا يسيبوها لكن انا مش عارفة جسمى معجون بطينها تحولنى طوبة تحولنى تمثال تحولنى معجزة انا بحبها وبعشقها وناسى وقهوتى وبيتى وشغلى وعيلتى وحاجاتى الصغننة ونيلى بتاعى هو على فكرة النيلى بتاعى والسما بتاعتها بتاعتى والبحر والنور وكل حاجة فيها بتاعتى بحبها لانها معمولة ليا اما كل السلبيات المقرفة اللى انت قلت عليها فهى موجودة فى كل مكان على الارض ومش فى مصر بس الفرق اننا شعب جهور كدا وغاوى صياح واستعراض وعلى وشك يبان يا نداغ اللبان ، هو دا احنا واضحين لدرجة الفضح وانا بحبها بحبها بحبها وفى قلبى ساكن حبها
انا عارفة قيمتها يا صديقى واحد من الناس من غير ما اتحرك سنتى برا ارضها انا بعشقها بعشقها وبموت فيها

وان خدعتنى الامانى
او راح حبى فى زمانى
ارجعلك انت تانى تانى
ياصاحبة المكان يا اقوى من الزمان
يا حبيبيتى يا مصر

على فكرة لو حد قرا الكلام دا هايضحك عليا وعليك يمكن لكن بجد اللى انا قلته قاصدة كل حرف فيه بما فيه الاغنية بتاعة شادية " " اقوى من الزمان "

نهارك بلون قلبك ويارب يقصر ليالى الغربة على روحك

Anonymous said...

النفاق الاجتماعي دا كلنا عايشين فيه زي ما واحدة جارتي لسه شايفاني امبارح تقولي ايه دا انت كبرت كده وهي لسة مافيش امبارح
وفي الشغل مجاملات وبتاع
بس انا كنت مفكر ان وسط الفنانين والمثقفين غيرنا يعني
:!!

واحد من الناس said...

http://sofsafa.blogspot.com/
انا ارسلت عنوان مدونتى لانى نشرت فيها ردك على تعليقى ومنتظر تشريفك لها وزيارتها مع منحى شرف تعليقاتك عليها
واحد من الناس

KING TOOOT said...

لا في يوم حاتزعّلي حد
ولا حد حايزعل منك
ولا يوم حاتهيني بجد
و حاتنسي الجرح كأنك
عمر جنونك ما أتشد
ولا حد يطّلع جنّك
طول ما إيديكي بتتمد
بالخير من أول سنّك
لا في يوم حاتزعّلي حد
ولا حد حايزعل منك
___________________
KING TOOOT

حواء said...

انا من رأيى ان مجاملة شخص مش حاسة به ومش حاسة اصلا ان مفيش حاجة تستحق المجاملة يبقى ماتعمليش حاجة مش حاساها عشان فى الحالة دى بسميه نفاق او ضحك عالدقون والناس اصلا مبقتش على نياتها كل واحد بيحس بالمجاملة الحقيقية واللى مش طالعة مالقلب واللى يزعل يطق وده اللى بعمله عشان بكره حد يجاملنى وهو مش بيحبنى او مش حاسس انه اصلا عايز يجاملنى ... بجد انا كمان اتحرق دمى وده معناه ان كلمتك وصلت ....