زعابيب

عارفين دلوقتى الجو عامل ازاى برا
موجه ترابية صفرا مع احتمال وقوع خسائر بشرية وحديدية وطبيعية فادحة نتيجة انعدام الرؤية اه والنبى ، كمان انا عارفه انها هاتبقى فرصة حقيقية لكل الكسلانين اللى انا عارفاهم كويس انهم يتحججوا بالجو ويقولوا لا لا انا مش رايح الشغل او الكلية شوفوا الجو عامل ازاى
على فكرة بقى انا جيت الشغل ووديت نهى الحضانة بتاعتها وقاعدة بكلمكوا ، شوفتوا بقى انا شاطرة ازاى ، لا لا اعوذ بالله الجو بيزيد ايه دا انا مش شايفه اى حاجة قدامى ، البيوت اختفت والشوارع ، طب انا مش هاعرف اروح ولا أيه ، طب اروح اجيب نهى منين ، لا فيه حاجة غلط ، الموضوع مش موضوع رياح ترابيه شديدة مش عارفين مصدرها ايه ، دا اظاهر عليهم ارواح ميتين كتيرة قوى بتقوم من مكانها بتحاول تاخذ حقها من اللى موتها ، محدش يقولى ربنا اللى موتها ، لا ، دا فيه بشر كتير ساهمت فى موت ناس كتير ونسيوهم فى المدافن الكتير الموجودة فى كل حتة فى الدنيا ، دى غير اللى اتقطعوا واتحرقوا واتبخروا ، ربنا يستر ، سامعين الصوت ، اه صوتهم باين قوى ، بيصرخ بصدى مرعب حقيقى ، يا جماعة خالوا بالكم اللى حاسس من جواه انه سبب جرح حد لحد ما مات يستخبى فى أى مصيبة بسرعة ، محدش ها يلحقه ، انتم طبعا عارفين أن الأرواح مبتتفهمش فى الحاجات دى ، ربنا يستر ، الريح بتزيد والغمقان بيزيد والصوت بيزيد ، يارب ارحم امواتنا من العذاب اللى هما فيه وارحمنا احنا كمان من الجو و ما فيه ، يارب خلى الجو صافى بقى وبلاش زعابيب وتراب ، نزلنا المطر الجميل اللى انت بتحبه واحنا بنحبه علشان يغسلنا ويغسل الطريق ويخلينا نشوف بعضنا ونميز خطواتنا واحنا رايحين لحبايبنا او جايين اشغالنا ، يارب كفاية كفاية زعابيب ترابية
وقلهم ميزعلوش أوى كدا ، احنا كمان مسيرنا فى يوم هانزعل زيهم ونقوم قومتنا بزعبوبتنا ونخوف بيها العايشين وقتها والحدوتة بتلف وميقلقوش
يالا بينا كلنا نقرا تعاويذ المطر كل حسب مذهبه
يالا بينا كلنا ندندن بتعاويذ الفراعنة اللى كانت بتحميهم من الجو دا
يا فرعوننا الكبير العظيم
ارفع عنا الريح
اننا نحبك بلا خجل وانت تحمينا
يا فرعوننا نسير حفاة عراه
على الحائط الكبير فى المعبد
نتلمس البركة من تمساح البحيرة
نرجوك كلم التمساح
ان ينزل فى البحيرة
يا فرعوننا العظيم هاهى قرابين الحب
بناتنا البكر وصبية عفية وأطفال برائحة اللبن
فى النيل رميناها علك ترضى
يا فرعوننا العظيم
انزل المطر



تعليقات

‏قال حسن ارابيسك
ايه الوصف ده
حسستيني إني قاعد قدام فيلم مرعب وبفكر اقفل التلفزيون عشان أخلص من الجو ده لكن أعمل أيه لابحبه ولا قادر على بعاده
وفجأة خطفتيني بقصيدة عليها تحفظ كبير مني
‏قال S H A H
ياااه يا سهى, و انا بقرا كلامك جه في بالي موقف يمكن داخل عليه 24 سنة كانت قعدة جدتي بتحكيلي فيه عن عروسة النيل و بتخوف اختي انها هتتاخد كقرابين

سلامي وبوسة كمان يا ريت لنهى القمر

المشاركات الشائعة من هذه المدونة

العراف الاعمى

الشذوذ الجنسى

القنفذ