توكلنا على الله

توكلنا على الله ، أصطبحنا وأصطبح الملك لله

انا يا جماعة مدونة جديدة لسة وعايزا احشر نفسى كدا بالعافية عشان ما يكونش فايتنى حاجة فى التكنولجيا لمؤاخذه ...ادينى فتحت الجهاز ورشيت ادام الكى بورد وشغلت القرآن عشان يبقى نهارنا فل انشألله ...
أولا : أنا سهى زكى ام نهى محمد حسين بكر وزوجة الراحل محمد حسين بكر
ثانيا : أنا مستوظفة فى الحكومة فى جريدة الجمهورية فى مجلة فنية محترمة اسمها شاشتى ومحدش يعلق تعليقات ملهاش لازمة ماشى ...
ثالثا : اقسم بالله العظيم ان اكون فى اقرب وقت صحفية كبيرة فين مش مهم بس هايحصل ، أنا دلوقتى فى ثالثة اعلام – جامعة القاهرة – التعليم المفتوح وربنا معايا بقى ... اصلى انا كنت فاشلة شوية فى الدراسة ، واللى مش عاجبه ميدخلش المدونة بتاعتى ولا يكلمنى خالص ماشى ولا مش ماشى .. دى حاجة الحاجة الثانية ، أنا مش هاتكلم كتير وارغى كدا فى التعريف بنفسى ، كفاية اعتقد ان معظمكم يعرف بعض المعلومات عنى ويمكن يعرف بعد شوية ....
رابعا : انا بكتب قصة قصيرة ورواية واتنشر لى كتير هنا وهناك وعملت كتاب واحد وخدت جائزة واحدة وعندى بنت واحدة ....
خامسا واخيرا ، هاقلكم بقى الموضوع اللى هافتتح بيه المدونة بتاعتى وامرى لله وربنا يستر والنبى مش عايزا مجاملات ولا سلخانات ياواش ياواش على حديثة العهد بالتدوين

الحجاب الحجاب يا نخلى عيشتك هباب

أكثر حاجة بتضايقنى جدا جدا هو مطالبة أى حد لى بالحجاب ، خاصة من يرون ان لازم البسه ، وهما بيقولوا أنت كويسة أوى ياسهى ومحترمة مش ناقصك غير الحجاب ، وانا عمرى ما قلت لواحدة محجبة او واحد ملتحى بذبيبة كبيرة فى النص ، انت ليه متحجبة مع انك كويسة أو انت ليه عامل كدا فى روحك مع انك اخلاق مش عارفه موضوع الدين والايمان ايه علاقته بالضبط بالملابس وشكلها ، يعنى فيها ايه لما كل واحد يبقى فى حاله كدا ، ومفيش داعى نشرد لبعض ، المحجبات بيعملوا ايه وهما اد أيه مش مقتنعين بيه واللى اتفرض عليها واللى واخداه موضة واللى معندهاش بديل ، والملتحى دا اللى بيلزق فى القدامه ويبص بنص عين على الرجلين ، يعنى انا عمرى ما جبت سيرة الحاجات دى خالص ، يعنى اقصد يعنى انى انا عمرى ما اتكلمت عن الموظفين اللى لما ترحلهم تخلص مصلحة ، فيقولك دا بيصلى وأقول ما يجى يقول سلاموا عليكم وبعدين الخدمة اللى أنت طالبها ناقصها حاجة بسيطة فيقولك ، معلش انا مقدرش اخالف ضميرى ، ربنا يحاسبنى وانت وزوقك بقى فى اشارة واضحة من عينيه لدرجه المفتوح فتحة ضيقة جدا ، او سيدات المجتمع بكل الفئات والمستويات اللائى يجتمعن للنميمة الدائمة ونقد السيدات بالتحديد سواء المحجبات منهن او غير المحجبات ، وبصراحة كدا انا حرة واعتقد انى مش متطرفة ، فاللى يلبس حجاب يلبس واللى يلبس مايوه يلبس وكل واحد حر جدا جدا فى انه يشوف ربنا سبحانه وتعالى ويعبده بطريقته ، أنا ايمانى بالله سبحانه وتعالى انا شايفه انه اقوى من ايمان اى حد تانى زى ما اى حد تانى شايف ان ايمانه اقوى من اى حد تالت ، ومش عارفه امتى ممكن نبطل نتكلم فى الموضوع دا ... بداية من اخواتى مرورا بالمترو والبائعين اللى بيكتبوا عندهم التدخين حرام شرعا ونهاية بزملاء العمل اللى كل اللى بيعملوه عكس اللى بيقولوه تماما ، طب بالذمة اصدق مين دماغى دى لو محافظتش عليها هاتتحول لكوزنحاس مخرم من اللى كانوا بيعملوا بيه الكنافة زمان ، ولا هانفع نفسى ولا نفع بنتى ولا هانفع ابو المجتمع المنيل اللى احنا فيه دا ومعلش بقى انى بدأ بالموضوع دا واللى بالنسبة لى يمثل عقدة بشنيطة ...
وفرصة سعيدة اوى أوى أوى ، انا فعلا مبسوطة أنى اخيرا هاقدر اتكلم مع ناس مش شايفنى ، لكن فاهمنى ...

تعليقات

‏قال تــسنيـم
إنتس بتسألي يا سهى أصدق مين.. صدقي ربنا ياجميلة اللي طلب مننا نتحجب ولا نحتجب.. الحجاب يا حبيبتي ليس ذنبه أن ارتدته من لا تحترمه ولا يُسقط ذلك من فرضيته ولا من قداسته.. ليه متكونيش إنتي مثال نضيف مكتمل بعكس المحجبة اللي مش عاجبك سلوكها وعدم احترامها للحجاب.. مش معقول علشان اللي بيصلي ولابس الحجاب رياء أو تقضية فرض أو شكل اجتماعي مش كويس نتهم الحجاب علامة الصلاة إنهم السبب.. إنتي أكيد عارفة إنه لو كان عن اقتناع كان نها عن الفحشاء والمنكر..

دي مش دعوة للحجاب إنتي حرة زي ما أنتي بتقولي وزي ما أنا بسعى للحرية دي دي بس وجهة نظر حبيت أوضحها يا قمرايا.. قبلاتي لبنوتك الجميلة ومحبتي واحترامي ليكي
‏قال باسم شرف
مبروووك المدونة

وان شاء الله هتكون هايلة
‏قال maged stephen
ياريت ماتخديش كل حاجة على أعصابك
وأعملى اللى أنتى شايفة أنه صح
أوعى تنسى أنك عايشة فى مجتمع عمر الناس ماهتبطل فيه التدخل فيما لا يعنيها وعلى فكرة ده بيحصل من النساء والرجال أيضا
ياترى البوست اللى جاى عن ايه؟
‏قال soha zaky
العزيزة تسنيم ، أشكرك جدا على تعليقك الرقيق المحايد وانا بحب الطريقة دى فى المناقشة وعلى فكرة يا تسنيم انا فعلا لبست الايشارب دا 6 شهور واكتشفت انه ماينسبيش شخصيتى بالمرة وانا لى اراء خاصة بيا عاملة بيها ازمة مع الحواليا فلو انتى حابة نبقى اصحاب من غير موضوع الحجاب والمحجبش يبقى هاكون سعيدة جدا جدا ..وعلى فكرة يا تسنيم الأسم دا حلوى اوى أوى
‏قال soha zaky
الزميل العزيز / باسم
أشكرك جدا على مباركنك ويارب يكون فعلا عند حسن ظنك
‏قال soha zaky
العزيز/ ماجد ستيفن ويارب اكون قريت الاسم صح ، أنا باشكرك جدا ومن الواضح انك استشعرت فعلا ان الكلام خارج من اعصابى وان فعلا الموضوع دا مزعج جدا لى ... لكن للأسف الشديد انا باخد كل حاجة على اعصابى .. واشكرك جدا وهاتقرا النهاردة البوست الجاى ويارب يعجبك يا ماجد
‏قال تــسنيـم
طبعا أنا حابة نكون أصحاب.. وحجاب أو لأ دي حاجة بتاعتك إنتي وبس يا قمرايا..
‏قال غير معرف…
استاذة سهى
السلام عليكم
بجد انت انسانة راقية جدا وجميلة ومحترمة وبنت ناس واديبة مبدعة ببساطة انت من ارقي الناس وافضلهم ودة من واقع تعاملى معاكى بجد
اشرف

المشاركات الشائعة من هذه المدونة

العراف الاعمى

الشذوذ الجنسى

القنفذ