قعدة الخزانى ولا جوازة الندامة

صباح الفل على الحبايب الحاضر واللى غايب ..معلش البوست ده موجه لان مرارتى على اخرها وفى ظل هذه الظروف العصيبة مكنش يصح بس بجد زهقت .. 

يا سيدى ويا ستى انا لا بتجوز متجوز ولا برتبط بمتجوز ولا اساسا برتبط بحد ارتبط بحد اعرفه وسابه او مرتبط عاطفيا لفترة وانا عارفة الطرفين انشالله طشاش ..م الأخر يا ستى متعرضيش على عريس متجوز باى حجة حتى لو كانت مراته امنا الغولة ولا تفكر تحاول تعرض على عواطفك وانت على ذمة المدام حتى لو كانت بتعلق لك مشنقة وتدلدلك منها كل يوم .. بصراحة وبكل اسف انا معقدة من وانا بقول يا مراهقة وبعتبر الست اللى بتحط عنيها على رجل على ذمة ست تانية خطافة رجالة وحرامية واسفة ماليش فى براح ورطرطة المشاعر وقبول الاخر وضد تفسير أية تعدد الزوجات .. حبيت بس اوضح ان الارملة والمطلقة مش مضطرة تتنازل تحت اى ظرف وتقبل تتجوز نص رجل بحجة انها مش عذراء يا عينى فتتنيل علي عنيها وتقبل اللى بجيلها من سكات ..لا يا فندم احنا نختار براحة راحتنا وحقنا اننا نعيش حياتنا مع رجل متفرغ مش عنده شيفتات طول النهار .. 

ملاحظة اخيرة : كل الرجال المحترمين هم اخوة اعزاء وكل رجل متجوز يفكر يعرض نفسه كمقهور حزين مظلوم بشوف ان رجولته فى خطر .. لان كامرأة على قد حالى بشوف ان كل امرأة تعيسة وراها رجل كئيب ونكدى ..فلما تشتكى من بؤس مراتك هاتأكد انك انت السبب .. 

س.ز ( تحييكم من قعدة الخزانى ولا جوازة الندامة )