رحلة السيدة "س"
- يا مدام القرشين اللى معاكى دول ميجيبوش عشة فراخ فى المنطقة
- يا عم الحاج معلش دور كدا يمكن تلاقى حاجة لقطة ونفاصل ، ولا اى حاجة
- والله عينى لو لقيت حاجة هاقولك
- تعالى يا مدام لقيت لك حاجة لقطة
- أنا : معلش هو أيه التعبان المقتول ومرمى على ارض الشقة ده
- لا ده خرطوم
- لا ده تعبان يا عمنا
- أأأأأأأأه معلش اصل العيال فى مولد سيدى البيومى كانوا مأجرين الشقة دى وقاعدين فيهاوكانوا بيلاعبوا بالتعابين وكدا ، تلاقيه مات منهم ولا حاجة
- اه طيب معلش قلبى اتقبض من الشقة شوف لى حاجة تانية
- عينى
- السمسار التانى : بصى بقى شايفة دى أوضة برا وأوضة جوا وصالة وأوضة مفتوحة فى الشارع ناحية القصر التحفة اللى انتى شايفاه ده
- اه يا عم بس دى منط
- لا ما انتى قافليها بحديد كدا يمين وشمال وامان والمنطقة امان متخافيش
الست صاحبة الشقة فى محاولة منها لاقناعى ، بصى انا كنت بنياها طوب بس النصارى اللى فوقيا اشتكونى وبلغوا المحافظة وهدوهالى منهم لله
- ليه اشتكوكى بس
- عشان كنت بشغل القرأن طول الليل
- انا : والنبى معقول
- أه والنبى
طبعا انا اول ما دخلت شميت ريحة بخور زى اللى بيولعوه فى الترب بالضبط والست مشغلة قرأن ، مع البخور ده والشقة اصلا مقفلاها ومش عايشة فيها ومفيهاش هوا خالص ، فتحس انك دخلت تزور ميت عايش فى المكان ، مش تتفرج على شقة تعيش فيها ، وهى بقى جت عندى انا اللى نصى مسلم ونصى مسيحى روحيا طبعا ، وتقولى نصارى وبتاع ، لا وايه ، تأكيدا على التطمين تقولى
- وعلى فكرة انتى هاتعجبيهم اوى اصلك شبههم
طيب يا عم محمد يالا بينا ، شد حيلك شوية وشوفلى حاجة تانية بدل الشقة بتاعة الست المهوسة دى
- بصى يا استاذة ، انا هاجيبلك من الآخر ، القرشين اللى معاكى دول ميجيبوش غير حاجات زى دى
- يعنى انت شايف كدا
- اه
- روحى اقعدى فى مدينة من المدن الجديدة وجيبلك حتة عربية وريحى نفسك
- تفتكر كدا هى الراحة
- اصل بصراحة انت مش عاجبك الحاجات اللقطة اللى انا بجيبها ده غير انى عمولتى لوحدها هاتبقى 3الاف جنيه اقل حاجة
- ماشى يا عم محمد
سلام
سلام يا استاذة
ومازال البحث مستمرا ، وربنا يرحمنا من السماسرة واصحاب الشقق غريبى الاطوار ، هو انا مكتوب على وشى ، للتعامل فقط مع غريبى الاطوار واصحاب المزاج المتغير والموتى مؤقتا لحين قيامتهم .
تعليقات