نونو فى اول يوم مدرسة

Saturday, February 15, 2014

الحمد لله على نعمة السرد

سألنى زميلى بالعمل الاستاذ محمد عبد العزيز وهو يبارك لى على كتابى الأخير 
لماذا تنشرين الكتب بلا مقابل ، ولماذا لا تنشرين فى الأماكن الذى تدفع مقابل مادى كبير للكتب ؟
- فقلت له أننى أنشر مع الدار التى تقرأ العمل وتتحمس له وغالبا ما تكون دار نشر لا تهدف للربح المادى ، لذلك يكون اتفاقنا 
ان ينشروا لى دون أن أدفع لهم كما يفعل 90% من الادباء ، ودون أن أحصل على مقابل بيع الكتب ، اهو مثلا الكتاب اللى فى ايدك ده من هيئة قصور الثقافة وب2 ج تفتكر هما لما طبعة تنفذ عندهم هايبعتوا يقولولى تعالى خدى مقابل ، ولا حتى هما هايسيبوها فى السوق اكتر من الاسبوعين المقررين لها ، وهوب ترجع المخازن برضه ، واللى قبله واللى قبله ولا اعرف عنهم وعن مبيعاتهم اى حاجة ، وعادى بقى متدقش

فقال لى : ولكن يا سهى من هم الكتاب الذين يحققون المبيعات ويحصلون على مقابل 
فقلت له : والله يا محمد دى حاجة بتبقى حسب الظروف والصدف ، فى ناس بتعرف تسوق نفسها كويس وتوصل لده حتى لو كاتبة ازيك يا محمد ازيك يا محمد ازيك يا محمد وفى ناس زى حالاتى كدا كتير مبيعرفوش يتعاملوا مع كتابتهم بمنطق الترويج والتسويق بيكتبوا وينشروا ومش بيتحايلوا على الناس يقروا ولا بيزنوا بالتلفون على حد ولا بيلحوا على النقاد انهم يكتبوا نقد ولا بيروحوا للجرايد هنا وهناك عشان يكتبوا عن شغلهم ، وكل دى حاجات بتسوق العمل وتخلى دور النشر تقولك بس هو ده الكاتب الجامد اللى لازم نخطفه ، وياعينى الدار تاخده من هنا وتنتح له الكتاب وتديله مقدم ، وتسوق له تسويق التنين وفى الاخر الكتاب يقعد فى المخازن ، ويكون هو بقى بنسخة واحدة شغل الكرة الارضية لصالحه ، عادى يعنى ، وفى كتاب محترمين كتير مش بيعملوا الحاجات دى والزمن هو اللى بيدور كتابتهم بين ايدين القراء وتتقرى وبعد عمر طويل يبقى مشهور واهم كاتب ، الحكاية ملهاش اى مقياس 

قالى : يعنى يا سهى هاتفضلى تكتبى لله وللوطن كدا وانت فى افا قرش ، ده ايه الغلب ده ؟
قلت له : ادعيلى ربنا ينزل على جائزة من هنا ولا هنا ، ولا كتاب مهم يفرقع ويعمل شغل ، هو الواحد يكره انه يكسب من كتابته برضه 
قال لى : طب ما تكتبى سيناريو كدا زيك زى غيرك ؟
قلت له : انا مبعرفش اكتب غير سرد وبس 
قالى : طب اعملى اى حاجة تجيب فلوس 
قلت له : لا يكلف الله نفسا الا وسعها ، هو انا ملاحقة على الشغل وبنتى ، والكتابة ، لما الاحق على اى هرس تانى الحمد لله على كدا 
قال لى : يعنى من الاخر انا لو فكرت اطلع كتاب مش هاكسب حاجة 
قلت له : جرب حظك يمكن يضرب
قالى حتى الادب كمان فيه حظوظ 
قلت له : طبعااااااااااااااااااااااااااااااااااااااااااا

No comments: