نونو فى اول يوم مدرسة

Sunday, March 24, 2013

مات مسلم حق ليبقى المئات من مشوهى الاسلام ، لنا الله

 
 
مكنش صاحبى ، لكنى قابلته اول مرة وهو واقف ومعاه واحد زميلة فى أعتصام يوليو الشهير فى 2011 كان واقف ماسك بانر كبير قوى مكتوب عليه " احنا اللى بندفع المشاريب " تقريبا لفت نظرى الدقون ولوجو "سلفيو كوستا " وقتها كان ابتدى كرهنا لتصرفات الاسلام ...السياسى تنمو ، قربت منه وانا متحفزة كدا ليه ، وسألتهم مع بعض أنتم بقى مع الاعتصام ولا جايين تبع حد يعنى تقولوا رسالة معينة فيها رفض ، قالوا انهم مع الثورة جدا ، وانهم رافضين اللى الجيش بيعمله واللى الاخوان بيعملوه ، وان المشكلة ان السلفيين دايما اللى بيدفعوا تمن اللى بيعملوه الاثنين بحكم الصورة الارهابية المغعلوطة المتأخدة عن السلفيين ، فاحنا حابيين نقول ان السلفيين مش ارهابيين ، وقالى احنا لنا صفحة على النت ومعرفين نفسنا فيها ، ساعتها حسيت بفرحة ان فى ناس محترمة اوى كدا ، مش من النوع بتاع عبدالله بدر وابو اسلام ، انا اسفة يعنى على المقارنة ، بس فعلا شتان ما بين سلفى بمعنى الكلمة من رقى وأخر بمعنى الكلمة من دونية ، بجد أنا زعلت اوى اوى على الشاب الجميل اوى ده ، كنت متابعاه جدا جدا وبقول ان فى أمل كبير طول ما هو موجود ، وكان معبر عن الاسلام بصورته المتحضرة ، ومقالاته وتعليقاته كانت عاقلة ومؤثرة ، الله يرحمه ، ويصبر كل حبايبه ، واتمنى ان سلفيو كوستا ، يكون عندها حد فى ربع ذكاء وبشاشة وصدق محمد يسرى سلامة ، الله يرحمك بجد قلبى موجوع عليك يا أخى ، مكنتش عارفة انى بحبك اوى كدا الا لما عرفت الخبر ، فعلا انت انسان تستحق كل الخير ومن ضمن الخير ده انك تموت الموتة الملائكية دى ، ربنا يرحمك .

2 comments:

هناء محمود " يوميات فرن بالكهربا " said...

الله يرحمه أنا كمان حزينة عليه جداا , بس سعيدة جدااااااااااا إنى قرأت كلام منصف زى كلامك , لأنى بجد بتأذى جدااااا من التعميم إللى بقى زى اللبانة دلوقتى في أفواه الجميع و التشويه المستمر لصورة السلفيين والمتدينين بسبب بعض الأمثلة السيئية
ومتخافيش الأمثلة الكويسة للإسلاميين والسلفيين كتييييييييييييييير جدا بس محدش بيدى فرصة للكويس إنه يظهر والأضواء كلها مسلطة على الأمثلة السيئة
وربنا يدى كل واحد على أد نيته
أول مرة ازور مدونة حضرتك ومش هتكون آخر مرة إن شاء الله

Soha Zaki said...

اولا خطوة عزيزة يا هناء شرفتى مدونتى المتواضعة
ثانيا ، طبعا انا مقتنعة ان فيه متدينين محترمين جدا ومعبرين عن روح الدين سواء فى المسلمين او المسيحيين المشكلة زى ما انتى قلتى ان المتديين اللى بجد مش بيدهوم فرصة يظهروا ، انا وانت وغيرنا بنشوفهم وبنقعد معاهم وبنتعامل معاهم ، وهو ده اللى مجننا ان اللى ظاهرين على السطح وعلى الفضائيات بيشوهوا كل المعانى النبيلة ، سوا ء للاديان او للبشرية اصلا ، ربنا يحمينا وينجينا يارب