فاطمة

الجمال فى روحها كان آسر بجد ، حبيبتى ، مؤمنة بحرية كل الناس ، وعمرها ما اجبرتنا على اى فعل او احساس ، وكانت بتستغرب من الناس اللى بتبرق لعيالها ويخافوا منهم ، ويتفاخروا بأن عيالهم بيخافوا من النظرة ، وتستغرب أكتر لما تلاقى حد بيضرب عياله .

كانوا بيلومها انها مدلعانا ، فكانت ترد عليهم تقولهم ، انا مربيش ولادى على الخوف والجبن ، كفاية اللى هيعمله فيهم الزمن والناس ، لسة هايقابلوا ، مبقاش انا بدايتهم ، ده بجد ، وكانت بتخاف علينا وبتترعب لما نخرج او نتأخر بس مكنتش بتمنعنا فتخيل بقى التضحية بأنها تفضل انها تبقى قلقانة على انها تمنعنا من حاجة بنحبها ، وتستحمل توبيخ بابا والجيران ، وتقولهم مالكوش دعوة ، انا واثقة ف عيالى كويس ،هاقول ايه ولا ايه ؟
كانت بتعيش معايا حكاية الحب اللى بعيشها وتفرح من قلبها زى فرحتى وتبكى وتتألم طول الليل مع نفسها لما أتألم ، الحنية والطيبة والجمال الربانى والفطرة اللى ملوثتهاش كل الفضائيات اللى اخترعوها ، وبراءة وثقافة حقيقية من غير اعتبارات ، تتصور كان نفسها تشوفنى ممثلة او مذيعة مثلا وتفرح لما تلاقينى مهتمة بنفسى وجميلة وانثى ، وتقولى افرحى ، وخليكى فرحانة ، مفيش حاجة تستاهل ولا حد يستاهل ، انت احلى من كل الناس ، الدعم المجانى لكل فكرة او حركة بتحركها وهى مصدقة انى هابقى حاجة مهمة ف يوم من الايام ، وكانت تقعد تسمع قصصى اللى انا نفسى دلوقتى مش عارفة ازاى هى استحملت تسمعها رغم انها كانت سيئة فعلا ، وتقولى الله ، انت هاتبقى حاجة كبيرة يا بت ، ياه ، فاطمة دى كانت قمر ، بشرة برونزى بخدود حمرا ، وضحكة تهبل شكل وصوت يرن لاخر الدنيا ، ومسبتنيش لحد اللحظة دى ، دعم لى ولبنتى اللى شالتها وهى عندها 40 يوم وسألتنى انتى فرحانة يا سهى ، قلت لها اه يا ماما ، قالت لى طيب ، وماتت بعدها بساعات ، ودعت لى ربنا يريح قلبك يا بنتى ربنا يريح قلبك
الله يرحمها ويجمعنى بها على خيرمشاهدة المزيد