نونو فى اول يوم مدرسة

Wednesday, September 28, 2011

فضفضة وبس

هى حاجات بسيطة مـش مستاهلة تتحكى
لما تكون مخنوق من الدنيا ومـش عارف
ايه الفرق ما بين التاكسى والاتوبيس
وتبقى مقرر انك تمشى على النيل
مع حد متعرفهوش
يمكن ساعتها تطلع عارفه
وهو اللى انت كنت بتدور عليه من زمان
لما الكون يتأمر على حزنك
ويقرر يعمل منك سلطة حزن متبلة بدموعك
اوعى فى لحظة تنسى انك قد الايام السودة
ولا تحس بالبرد والبطاطين مالية الدنيا الا على جسمك ..

****
كان فى زمان ولد وبنت بيمشوا مع بعض
ماسكين ايدين الحلم بسهولة
بيتندروا على الناس اللى اتجوزوا من زمان
وعملوا بيوت مخروبة بصراخهم
كان زمان الولد والبنت اللى تحولوا
دلوقتى لناس بيخربوا بيتهم بصراخم
شايفين الحلم تحقيقه سهل
لكنهم بينكروا عليك دلوقتى تحلمه
لانه مستحيل

****
عند الشجرة البعيدة هناك فى ظلين
لاثنين حاضنين بعض مش هايكملوا
رغم اعلانات النيون المبهرجة فى كل الاماكن
الا ان الاعلانات مش دايما بتنجح على السلع
المغشوشة ، ودا شىء غريب عايز توضيح
ايه الفرق بين السلع اللى بتبيع من غير اعلان
والسلع اللى مش بتبيع بالاعلان
عندك اسباب كتير تقدر تحصر من بينها
ان العشق الحقيقى جوا جوا اوى
مش برا
وان
استباحة الجسد زى استباحة الروح
فخلى بالك أوى من جسمك وروحك سوى
الاثنين مش منفصلين والدليل
ان لما الروح بتمشى منه
بيبقى فى عداد الميتين
بس

3 comments:

حسن ارابيسك said...

حاضر ياست سهى
هانخلي بالنا من جسمنا وروحنا سوى
بس انتي قلتي لما الجسد بتمشي منه الروح بيبقى في عداد الميتيين
لكن نسيتي تقولينا لما لما الروح تتخلى عن الجسد.. الروح بقى بتبقى في عداد ايه...؟

الكاتبة والإنسانة الجميلة سهى
تحياتي
حسن أرابيسك

حسن ارابيسك said...

أعمل زيك بقا

وحياة دى النعمة وحياة دى النعمة إنتي واحشانى موووت ، وانت غالية عندى جدا جدا يا سهى هانم

أيه ياست سهى
أيه ياأم نهنوه
ايه الحكاية طمنينا عليكي
عمرك ما هجرتي مدونتك بالمدة دي كلها
نتمنى من الله انك تكوني بخير انتي ونهنوه وتكون كل أمورك على مايرام أحسن غيبتك بالشكل ده عن مدونتك تدلل ان لاقدر الله في حاجه وإن شاء الله مايكونش في حاجه لكن ممكن على الأقل يكون المزاج مش عال وعلى فكرة ده شأن الدنيا كلها مفيش شئ عى حال واحد دائماً في فترة صعود وفي فترة هبوط في فترة اشتعال وفي فترة خمود في فترة اقبال وفي فترة إدبار وهكذا دواليك
ده بيبقى طبيعي لكن الأهم ان الجانب السلبي من كل معادلة مانستسلمش له
المهم نطمن عليكي
نطمن على ساحرة المدونات الطيبة جدا والجميلة، الجميلة في ملامحها وحروفها وقلمها ولغتها
وأسلوبها وقصصها ومقالاتها وفضفضاتها
قومي يالله فوق كده خدي حمام بارد واتوضي وصلي ركعتين وطولي في السجود وأستغفري وطلبي من ربك اي شيئ لأنه في اللحطة دي بيقا قريب منك قوي
هاتقومي بعده ان شاء الله صدرك منشرح
وخليها على الله
تحياتي
حسن أرابيسك

سهــى زكــى said...

اااااااااااااه يا حسن ، بالذمة ينفع الكلام ده ، طب وحياة دى النعمة ، انت خليت ضحكتى تملا المكان الفاضى اللى انا فيه ، وخليت روحى تطير فى السما ، وخليت الدموع تغرف الكى بورد ، انا بحبك جدا جدا يا صديقى يا محفزى ومشجعى الاكبر ، اشكرك جدا جدا جدا ، وماشى حاضر هانفذ فورا ، تحياتى يا صديقى الجميل