ثلاثة نهى و2 سوسو وواحد رفيع

بعد التحية والسلام اللى عمره ما هايكون ختام بينى وبينك
يا اجمل ما خلق احب اعرفك انى فى احسن حال
وانك عرفتى تربى ، تصدقى انى مش لوحدى فعلا
انا بطمنك اه ، متقلقيش ، ومتجليش فى الحلم زعلانة ابدا
انا مش مضايقة ولا زعلانة ابدا ، اه بجد مش مصدقة
طب انا هاحكيلك على حاجة انت عارفة من يوم ما مشتى
ملحقتش ازعل الزعل اياه بتاع الناس اللى بتزعل على الناس لما تموت
طبعا مش لانك ممتش والشعار اياه لا خالص
رغم انه حقيقى اصلك عايشة معايا بشكل غريب
بطلى مراقبة فيا بقى وقلق عليا وفراشتك
اللى محاصرنى هديها شوية عارفة لو انا عارفة
انك بتقعدى مطمنة كدة ومفيش قلق كنت هاقلك
خليكى على طول فى بالى ، لكن انا عارفاكى يا فاطمة
محبتش فى الكون اكتر مننا
بابا وانا ونهى وصلاح ومحمد
اطمنى يا حبيبتى احنا تمام وزى الفل اه بجد
انت فاكرة انت عملتى ايه ، فاكرة صح
ربتينا بجد ، عملتى مننا ابطال فى الحياة مناضلين
مكافحين بالفطرة زيك انت وبابا
الشغل مبيقفش لكن بينى وبينك انا تعبت
أه تعبت شوية من النزول كل يوم وكدا يعنى
حاجة ممللة مرهقة ، فاكرة لما دعيتلى وانت فى المستشفى
اخر مرة لما بصيتى لفوق وقلت لربنا خليها ترتاح بقى
وبلاش نزول كل يوم ، قلت لك قولي له ياماما
الشغل ماشى بس الكتابة لا مرتحش منها
بصيتى لى بصة كلها آلم من الوجع ومن الفراق
وانت بتقولى ، يابت متخافيش هاترتاحى هاترتاحى
من غير شغل وهاتكتبى ، ورحت باصة لربنا تانى وقلت له
ارحمها من وجعها يارب ، عارفة انه رحمنى من وجعى فعلا
بجد بس لسة موضوع الشغل ده اما نشوف مفاجأت الزمن اللى جاى
انا بصدقك اوى

نهى هانم بنتك الصغننة الدلوعة بتاعتنا كلنا خلاص بقت
يمينية السلوك ام متسلطة وشديدة وقوية وايه قادرة أخر حاجة
الاول نهنوه كانت بتخاف منها وتعملها حساب لكن دلوقتى
ايه لما تقولها اسكتى ترد عليها تقولها اسكتي انتى
عارفة يا ماما ، مش ناقص غير انها تجيب هى كمان نونو
عشان نهنوه تنتقم منها فيه ، اه هاتشوفى
ما انت عارفة كله سلف ودين لا وايه
الاثنين حاطين رأسهم ببعض كل ما واحدة فيهم
تعمل حاجة التانية تقلدها لما بيروشونى هما الاثنين يوم الاجازة
انا انا مقلتلكش ما نهى اتجوزت وقعدنا مع بعض
جوزها زى العسل مطرب يمنى لبسها النقاب وهى
موستكيفة اوى من الحكاية دى والواد بينطلق زى الصاروخ
وبيحب نهنوه اوى لدرجة انها مسمياه عمرى اه والله بتنده له
"تعالى يا عمرى" كدا
فى الوقت نفسه البت سلوى اه معلش مبقتش بت دى
بقت ام لحبيبة وسارة عاملة معايا واجب متين اوى يا امى
سوسو جدعة من يومها ما انت عارفة
بتحب نهنوه حب غريب تتصورى انها بتروح تجيبها
من المدرسة كل يوم وتجيبهالى
واى مشكلة تقابلنى فى الحياه مهما ان كانت
الاقيها فى ضهرى زى العمود الفقرى
ماانت عارفة سوسو بقى من زمان
هى كمان اتحجبت بس مبسوطة ومعها جوز طيب
وبيحبها وبتحبه الحمد لله
اما بقى الواد محمد رفيع اللى مبقاش رفيع ومبقاش افيه
اصلك عارفة زمان كنا دايما بنتندر على حكاية
انه اسمه رفيع وهو مش رفيع
اسكتى يا ماما مش دلوقتى خس خالص
وبقى رفيع بجد لا ووسيم وقمر
خلف سيف على فكرة واميرة عسل مراته امورة وهادية ومريحة
وبتحب نهى برضه اوى وهو بقى مأمن نهى بشكل غريب
وبيحمينى انا وهى وكأنه اب تانى
وانا كمان بشوفه ابويا وابنى اه والله اصلك عارفة
انت وابوه الله يخليكم لينا وحوالينا يارب ويرحمنا
احنا عشان نحصلكم فى هدوء
ورثتنوا احاسيس جامدة أوى عن الأمومة والأبوة
الواد ورث أبوه سحله سحل كدا
وانا شفط روحك جوايا حتى انى ابتديت ابقى شبهك
زى الناس كلها ما بتقولى انت بقيتى شبه "لل"
دلعك ده يالوله فاكرة يا فطومتى
على فكرة نهى بقى ليها تؤام كبير
اسمها نهى برضه البنتين مجنننى
لما محمد جى وراكى بسرعة وكأنكم متفقين
عملتوا انتم الاثنين مش عارفنى قال ونفضتو لى بالآوى
أنت استخبيتى فى كفر الشيخ عشان تشوفى
هاعمل ايه لوحدى مع البنت
وهو قال مش لاعب دى بنتك وانت حرة فيها اه
وراح قال ايه نام هو كمان فى الاباجية
حتة جديدة كدا لطيفة بيناموا فيها الناس
اللى بيريحهم اخينا اياه من الدنيا وما فيها

المهم لقيتلك البت نهى محمود طالعالى من تحت الارض
متفهمش ازاى
لقيت تؤام ليا وللبنت وليكى كمان انت مش مصدقة صح
هاقولك انت عارفة ان نفس هدومك اللى انت بتلبيسها
ام نهى كانت بتلبسها ونفس الاغانى اللى كنت بتحبيها
كانت "نوجه " أم نهى محمود بتحبيها ونفس النفس فى الأكل
والريحة والبيت وشكله حتى الدواليب واوض النوم والصالة والمطبخ
حتى انك انت ونوجة مشيتم فى نفس السنة وبنفس الطريقة
كل حاجة فى البيت ده بحس انك موجودة هناك مش عارفة ليه
المهم هى وابوها واخواتها عملولى استنساخ للبيت القديم
ونهى الصغيرة لقيتنا بنقول لبابا نهى بابا راحت
هى كمان ندهت له بابا زى ما بتنده لجوزك زيكو
بابا برضه لانى بنده له بابا
عارفة يا فاطوم نهى شالت نهى وهى نونة
ومكنتش بتعرف تشيل اطفال اصلا ما هى نهى اساسا طفلة جميلة
بطوطة شقية عاملة فيها كبيرة كدا وعاقلة
بس لسة معقلتش ، متشعلقة فى حبال دايبة كدا
وتعبانى معاها زى ما انا كنت تعباكى زمان فاكرة
فاكرة طبعا ، محستش بالحيرة ولا الخوف ابدا
لدرجة انى قلت لها انا يا نهى لو جرالى حاجة
ربى انت اختك نهى الصغيرة وخلى بالك منها
رغم انهم بيغيروا من بعض بيتخانقوا على التوك والالوان
وقصص قطر الندى اللى بيديها طاهر الشرقاوى
وسحر عبدالله لنهى الكبيرة
بصراحة مش بدخل بينهم ما انتى عارفة العيال بقى
باختصار نهى ام طفلة بتسعد اى مخلوق
بتقعد معاه بابتسامتها اللى بتحدف
كل انواع حلوى الاطفال المبهجة

ماما وحشتينى اوى وموحشتنيش انت معايا مبتغبيش

نهى كمان عرفت تيتا وبتكلمك زى
ما بتكلم ابوها فى الصور وبتلعب مع الفراشات
اللى فهمت انها انتم معرفش منين
والله مش انا لوحدها كدا عرفت ان الفراشات الجميلة
هى ارواح ناس طيبين بيحبونا جايين يزورنا
انا بقيت ام معرفش هانجح زى ما انت قدرت و ولا لا
بس اهو اختبار تقيل اوى ، ربنا يقوينى عليه .

تعليقات

‏قال حسن ارابيسك
الساحرة الشريرة
العزيزة/ سهى
تعيشي وتفتكري
ندعو الله للراحلة العزيزة الأم الجميلة الصدر الحنون والقلب الطيب ست الحبايب بالرحمة والمغفرة وأن يجعل قبرها روضة من رياض الجنة وأن يجعلها في علاها راضية عنكي بكل أدعيتها السابقة لكي في الدنيا فرج لكي من كل هم وغم
وقل ربى ارحمهما كما ربيانى صغيرا
الرائعه سهى ذكى
تعيشى وتفتكرى
وربنا يغفر للجميع
جميله اللمه والاصدقاء كثير هم قليل منهم من يتعدى حدود الصداقه ليرث اماكن فى القلب
يارب دايما فى حب وسعاده وصداقه مفيده ومخلصه
تحياتى
‏قال мαησηα
تعيشى وتفتكرى يا حبيبتى وربنا يارب

يغفر لمامتك الجميلة الرائعة ويغفر لها ويرحمها ويسكنها فسيح جناته

بجد انتى جميلة اوى ربنا يحميكى ويسعد قلبك دايما
‏قال soha zaky
اصدقائى الاعزاء

تحياتى لكم جميعا ويارب يخلى لكم كل اللى بتحبوهم ومتتحرموش منهم ويارب تفضلوا اصدقائى ويخليكوا ليا وميحرمنيش منكم

والله العظيم تلاتة انا بحبكم اوى اوى ومعرفش ليه رغم انى معرفكمش واقعيا بس كفاية انكم بالروح الجميلة والشفافية المخترقة دى

نهاركم بلون قلوبكم البيضاء يا اجمل اصدقاء

المشاركات الشائعة من هذه المدونة

العراف الاعمى

الشذوذ الجنسى

القنفذ