الدكتور محمد

الولد الثالث

الولد الثالث موجود هنا

مفيش داعى طبعا اقول الاسم التانى من محمد عشان الفضايح لانه من عائلة كبيرة فى القليوبية منطقة اسمها باسوس ...
بعد ما حكاية هانى الثالث خلصت ابتديت اتحرك فى عوالم تانية خالص ، بدأت احضر ندوات لوحدى معرفش ازاى وصلتلها والله ما اعرف يمكن عن طريق العيال اصحابى اللى ابتديت اتعرف عليهم فى الاوبرا – مركز الهناجر اللى كان وقتها ملتقى فنى وثقافى مهم جدا ، كنت بشوف هناك هواة حقيقين ومدعين من الفنانين والكتاب وكانت متعتى الحقيقية وانا قاعدة فى المكان دا ، ما انا خلصت المعهد وشطبت حكايات الحبيبة وقلت ابنى نفسى بقى واعمل حاجة الكلام دا كان سنة 1994 تقريبا ، بدأت ادور على شغل بعد ما خلصت المعهد وفعلا اشتغلت الحمدلله الاول سكرتيرة فى مركز كبير للكمبيوتر ودى كانت حاجة جديدة وقتها ومهمة ، دا المكان اللى علمنى ازاى اتعامل كمستخدم على الكمبيوتر ، وبعدين ما قعدت 6 شهور زهقت من المكان لان كل الناس فيه كانت متدينة بشكل يخنق ومش حقيقى وكان صاحب المكان جاى من ايطاليا بعد رحلة كفاح ومعاه فلوس عمل بها المشروع دا ومراته وقفت جنبه كتير واستحملته وهى اللى ساعدته على السفر وهى اللى عملتله المشروع وهو هناك ولما رجع لقاه قائم ويعمل بالفعل وبعدين فجأة حب بنت فلاحة وعانس ومش جميلة بالمرة ، استغربت أوى من البنى أدم وكرهته من جوايا مع أنه حر طبعا حر ، بس يمكن لأن صعبت عليا اوى الست أم عياله دى والبهدلة اللى كانت فيها بسبب حبها العظيم له وهو على اصرارا بقهرها ، على فكرة المفروض انهم اتجوزوا عن حب .
نيو لوك 2003

المهم مطولش عليكم قولوا طولى ، سيبت المركز دا واشتغلت فى شركة مخصبات زراعية كان يملكها الشيخ على جاد الحق ابن الشيخ جاد الحق على جاد الحق شيخ الازهر الاسبق ودى كانت اول مرة اعرف فيها ان الدين بيكسب فلوس كتير اوى كدا ، ماشاءالله كانوا اغنياء جدا جدا ، وكان مرتبى وقتها حاجة محترمة بصراحة 250جنيه ، يعنى كنت بصرف على نفسى كويس اوى واجيب هدايا ليهم فى البيت واصرف على مواصلات الندوات بتاعتى وقعدتى فى الهناجر والحمد لله كانت ايام جميلة اوى اتعرفت فيها على ناس كتير اوى اوى يمكن عارفاهم لغاية دلوقتى منهم اللى اشتهر وبقى حاجة كبيرة ومعروفين جدا جدا ومنهم اللى اختفوا وراحوا مع الوباء لانهم مش حقيقين خالص ، وكنت تدخل الاوبرا فى الوقت دا تلاقى فرقة بتعمل بروفة فى الجراج وفرقة بتعمل بروفة فى الجاليرى وفرقة بتعمل بروفة فى كافتيريا الهناجر وهما قاعدين ، معرض فى الجاليرى وحفلات مستمرة بلا انقطاع مسرحيات من روائع المسرحيات العالمية وافتكاسات المخرجين الشبان اللى كانوا يعتبروا حداثيين فى الوقت دا ، بصراحة حاجة رائعة ، انشغلت كتير بيهم وركزت قوى فى الايام دى مع اصحاب المرحلة دى ومبقتش مهتمة انى اعمل اى علاقات بحد وكانت النغمة السائدة فى موضوع العلاقات بقى فى الوسط دا " الحرية " بلا قيد أو شرط " نمرة واحد لازم اتخلص من التخلف اللى اسمه عذرية ، نمرة أثنين مفيش حاجة اسمها الحب الوحيد ، نمرة ثلاثة ، لازم اعيش حياتى زى ما انا عايزا مش زى ما الناس عايزاها ، كلام جميل ومقنع جدا لكنى بصراحة طبقت الكلام دا بطريقتى انا يعنى فعلا موضوع العذرية بالشكل اللى هما يقصدوه منتهى التخلف يعنى العذرية مش حتة الجلدة اللى بتحمينا تحت من حاجات كتير ومن الاختراق الذكورى لا ، العذرية دى مشاعر واحاسيس تانية خالص موجودة عند الراجل والست والحب الوحيد فعلا مفيش حاجة اسمها كدا ، فى حاجة اسمها حب جديد طبيعته هى اللى بتخلينا نقرر يبقى اخير ووحيد ولا لا مش هو دا ؟ نمرة ثالثة ايو انا بحب اعيش زى ما احب مش زى ما يحب الناس انى اعيش وطبعا عشان كدا اتفقت مع كتير اوى منهم من غير اغير من قناعاتى الشخصية ومن غير ما انتقد سلوكهم فى الحياة ، طبعا فى كثير حاولوا معايا انى اغير منهج العذرية دا بالذات ، لكن الفشل كان مصيرهم ومصيرى لأن بصراحة انا مقدرتش أن يكون محطم هذا الغشاء مجرد عابر سبيل ومعرفتش اساسا احس بمشاعر من اللى هى سيكوسيكو الا بالحب والعشق ، وكنت برفض الحياة الحرة اللى بيقولوا عليها عتاولة وسط البلد فى الوقت دا باصرار شديد ، الحياة مش مفتوحة على البحرى كدا ، انا لسه عايشة فى قصة حب عذرى مخرجتش منها ، لما اخرج ، وفضلت كدا حرة زى العصفورة براحتى قوى محدش مقيدنى بأى احساس ، صداقات كتير من الجنسين نشاطات كتير فى كل حاجة ، مكنتش بقعد فى البيت تقريبا ، لغاية ما صادفت المجموعة اللطيفة اللى عرفت فيها الدكتور محمد واللى كان التعارف بينا عن طريق صدام ، كان متدين قوى قوى وانا عكسه تماما ، انا عارفه ربنا كويس اوى وبحبه اوى لكن مش بطريقتهم ابدا ، وبعد النقاش الحاد ابتدينا نتقابل كتير ونتصاحب اكتر لغاية ما حصل اللى حصل وحبينا بعض اوى اوى اوى ، وكان خجول جدا بشكل مرعب ، يعنى كان يتكسف حتى انه يمسك ايدى وهو بيعدينى الشارع ، لكن كان بيقول كلام جميل اوى شبه " انا معرفش اعيش من غيرك ، اليوم اللى يعدى من غير ما اشوفك احس انه نقص من عمرى ، حبيبتى انت وبس وماليش غيرك "
نظرات بقى من اللى تحرك الحجر وبصراحة كانت عينه جميلة اوى اوى بشكل مرعب ،حالكة السواد وبها حور جذاب وطبعا كان طويل ورفيع وبنظارة كالعادة ، اه اعمل ايه حظ بقى ، ابتدى يقولى عايزك ليا لوحدى ،
انسى الناس دى كلها انت مش بتحبينى ، خليكى معايا ، سيبك من دى وسيبك من دا واتحجبى ،
انا مش مقتنعة يا محمد مش عايزا اتحجب بصراحة
اتحجبى عشان خاطرى فارقة معاك ايه
مش فارقة حاضر ، عادى
فعلا لبست الطرحة اياها تانى ، وعادى بقى ، نتقابل على شيهان نقعد لوحدنا مبيحبش حد يقعد معانا خالص لانه بيغير عليا ، نقعد على قهوة صالح لوحدنا لانه بيغير برضه ، اى مكان فى وسط البلد او برا وسط البلد لوحدنا .
ولما حضرنا عيد ميلاد احدى صديقاتنا وسهرنا شوية عندها وقفنا فى البلكونة وكانت اول مرة احس انه بيبحبنى اوى كدا فى اليوم دا ، هو كان اطول منى كتير ، وقفنا نتأمل السما وفجأة لقيت اصابعه الرقيقة ترفع ذقنى لعينيه ، ارتعش كل جسدى وكأنى خطفت الى عالم اسطورى ، ثم قبل جبهتى ، وبنعومة وتسلل ذهب الى شفتى هكذا دون أستئذان ، وهل كانت تستدعى حالتى استئذان ، كل هذا العشق وكل هذا الوقت وأخيرا عانقنى وقبلنى ، القبلة اليتيمة ، حيث تملكتنى نعرة الفتيات الشريفات وقلت له فى مشهد تمثيلى من ورا قلبى طبعا :
أنت ازاى تعمل كدا يا محمد
انا اسف بس مقدرتش اسيطر على نفسى أصلى بحبك اوى
يا سلام واللى يحب حد يفاجئه كدا
انا اسف حقك عليا
انت ازاى يا اخى صابر كل دا ومبستنيش ولا مرة
ضحك من قلبه وحضنى تانى أخر حضن بينا
لانه اتقدم لى بشكل رسمى ، احضر اهله وعزوته وكل اللى يعرفهم من باسوس وجه يخطبنى وفعلا قرينا الفاتحة ، وبعد كدا فوجئت ان اهله رافضين تماما عشان انا قاهرية ومش غنية وهما محتاجين واحدة تقعد معاهم تخدمهم ويكون عندها طين اه والله طين فى ناس لسه كدا ، ماما وقتها حسيت بهم وعرفت وقضت ليالى تبكى من غير سبب وتحضنى وتقولى يا ميلة بختك يا بنتى وانا اقولها ايه يا ماما حاسة بأيه ، تقولى ، يارب يخلف ظنى ، وقلتلها انه واقف جنبى وبيحبنى فهديت شوية
هو بصراحة طلع شهم شوية قعد يقولى احنا هانتحدى الدنيا والدين ونعيش فى ايجار جديد ومالناش دعوة بيهم وشوية الكلام الحنجورى دا ، وشوية ايام كدا وهو مستحملش الضغط عليهم واتلكك بخناقة كبيرة قوى سببها قوى جدا وهى انى قعدت على افتر ايت وكان المفروض انى مروحش الاماكن دى وهو مانعنى منها ، طبعا قلت له يا حنين يا حبيبى انا بحبك اوى بس انا منفعكش انا ماليش فى الحجاب ولا ليا فى انى اتحايل عليك تسامحنى لانى غلط الغلطة الفظيعة دى ، خلاص يا عم روح اتجوزلهم اللى هما عايزينها وربنا معاك وانا مش زعلانة منك وفى ارض جراج الاوبرا سلمت عليه من هنا وهنا وقلعت الطرحة ، قلت له انا اتعاملت معها على اساس انها الدبلة اللى بينا ، اتفضل ادى طرحتك ، وقبلته من اليمين والشمال وقلت له انا موجودة فى اى وقت تحب تكلمنى وتشتكيلى من أهلك او من مراتك ، مع السلامة ، وطبعا مشيت وانا منفوخة تماما تماما لغاية ما دخلت كافتيريا الهناجر وفرقعت اول ما شفت سكن روحى وقتها صديقتى الحميمة واحتضنتنى وقعدت تهدينى وروحتنى معاها البيت وقامت برعايتى وكأننى طفلة فقدت امها ، بجد كانت ليالى سوداء تماما ، حزن لا حد له ، ودا كانت اول علاقة حب حقيقية هزتنى اوى كدا ، مش عارفة ايه اللى حصلى وقتها بس كل اللى انا فاكراه انى فضلت حزينة واصحابى معايا بيحاولوا ينسونى المرحلة دى بأى طريقة وعملت نيو لوك وقتها بسطنى اوى وريحنى جدا وكنت سعيدة اوى اوى ، لكن فى جوايا حتة ناقصة .