دراما الأستخفاف وغرام التكعيبة

لا أعرف لماذا يستخف بنا كتاب الدراما ومخرجوها ، لماذا اصرارهم
على وضعنا فى أخر صف من صفوف الحضارة ـ لعنة الله عليهم جميعا
والآدهى من ذلك انهم يُسخرون إستخفافهم بنا ويضاعفونه فى
رمضان بالتحديد
فهم يساهمون بشكل او بأخر بضياع صيامنا وتكفيرنا عمدا مع
سبق الاصرار والترصد ، قد أتعسنى الحظ السعيد بعد معاناة لمدة
عامين ان أركز فى التليفزيون بعد الشر عنكم ، وقلت وماله ألهى نفسى
بدل ما انا مركزة فى الموت وسيرته ورغم ان وحياة النبى
ياجماعة اليوم طويل ومش فاضى ومشغولة جدا جدا أه والنعمة أصلى
عندى ضمير اوى فى شغلى ، دا غير طبعا نهنوه وطلباتها النهارده
سخنت ، بردت ، جريت ، اتحرقت ، اه والله ، اصلها مرة مسكت المكوة
بأيديها وقعدت تعيط وتقولى أيه دا ماما ، وطبعا ميخلاش الامر
من التزامات اسرية دا غير عشيقتى ومعشوقتى ودنيتى الحقيقية
التكعيبـــــــــــــــــــة
ددددددددددددددددااااا
والتكعيبة للقليلين الذين لا يعرفونها هى اهم مقهى لكل حاجة
فى وسط البلد اللهم صلى على النبى عليها قعدة تشرح القلب
الحزين ، مبدئيا الشاى بـ50 قرش ودا وأى عصير 150 واللى
مسئول عنه استاذ اوزامه قصدى اسامة لانك لوشفته تحس كدا
انه استاذ تدبير منزلى الصبح فى مدرسة حكومية وبيحسن دخله وحجر
المعسل بـ50 وحجر التفاح بجنيه والشيشة بقى مسئول عنها اكتر
من فرد محمد المزاول الاكبر والمعلم سيد العترة ، يعنى قعدة دماغ
وملوكى برخص اللمؤاخذه التراب ، فلو أنت قايم بعد ثلاث ساعات مثلا تلاقى
نفسك دافع للمعلم الشاب أحمد صاحب القهوة قد 5 ج كدا واللى ممكن يعديك
من القهوة من غير ما تدفع حاجة
لغاية ما الظروف تبقى تمام ... دا غير قعدتك بقى نجوم
والله العظيم نجوم بتقعد هناك ، روح بس وانت تشوف بنفسك ....
تخيلوا بقى بعد القعدة الملوكى مع اصدقائى النجوم الجامدين اوى
فى عالم الكتابة واللى بصباع رجلهم الصغير يقدروا يعملوا مسلسلات
تضرب ام المسلسلات اللى تحفنا بها كتاب الدراما لهذا الشهر المسكين ....
وعموما انا هاعرض عليكم المسلسلات دى على حلقات ، ما ماكنش ينفع
الا لما على الاقل يعدى 20يوم عشان نحكم والا كنا هانسمع كلام
من نوعية ازاى تحكموا على حاجة مشفتوهاش للاخر.
المسلسل
حــــــــــق مشــــــروع
مسلسل صعيدى شحط محط ، بطولة نجمة ببراعة عبلة كامل
استاذة نهنهنة وشحتفة اصلى دايما دموع دموع
وموهبة خارقة عن حق فى اشعار الجمهور بالاحاسيس المستخبية
جوا الجلابية
عبلة كامل ، بجد ست الستات زى
ما كان مصباح اقصد النجم محمد وفيق جوزها المحترم الصعيدى
المثقف اللى بيقول كلام كتير من نوعية متجلجيش ، وربما ، ويجوز
كان بيجولها طول الوقت ، انها ست الستات ، ماشى يا عم وهى فعلا
كدا ومحدش ينكر ، بس الازمة يا عالم ، ان الصعيد دلوكيتى مبجاش
يتكلم إكده ، وكمانى الصعايدة ، ابسط من كدا بكتير ، يعنى صحيح
عندهم جصور واغنيا وكل شى بسى بتلاجى اشاره اكده على طباع
الصعيدية فى البيت ، اللى ما شفنا الحاجة كاملة طول العشرين
حلجة اللى فاتو واقفه مع صبيحة فى المطبخ وكان الست كاملة
دى مش صعيدية يعنى يا نسى عمرها ما عملت عيش شمسى
اما بقى نجم السيارات العظيم الاستاذ القمر الفذ اه والنعمة فذ
لأنه اجاد دور الداكتور طاهر خالس ، وكان مميز جدا جدا كشاب صعيدى
قمر علىفكرةانا بحب الصعايدة جوى جوى ، يا سلام بجى لو شبه الداكتور
اما الجان المعتبر الرومانسى بالأوى أبو سنة مميزاه وبصراحه محلياه،
الباشمهندس كريم كوجاك ، حبيب جامد جوى جوى
أدته الست كاملة على دماغه وفضلت واجفاله على الواحدة
وجال ايه بعد ما خطبها ممنوع ايجيها وكان السرقة كانت احسن
ونعم الاتقان فى الاقناع ، وهى مؤدبة ورزينة مبتعمليش حاجة
من ورا اهلها حتى الحديد فى التلافون ... احنا فى الجرن الواحد والعشرين
ومطاريد الجبل جاعدين ماعندهمش تلفزيون حتى ، يعنى
عيازين تجولولى انهم معنديهمش تلفون محمول ، والنبى ينفع برضيك
دا كلام ... عامة فى راجل امهم جوى نسيت احكيلكم عنيه ، حسين فهمى
رغم انتجاد الناس ليه فى المسلسل انه مش لايج ، بس انى شايفاه
لايج جوى جوى ، كمانى ابنه أحمد زاهر ممثل جامد جامد والنعمة
وامه الست سامية امين الست دى يا جماعة مش واخده حجها
خالص ، نيجى بجى للكباره المحترم جمال اسماعيل دور رايق رايق
وحاجة كدا شبه الافلام العربى الجديمة تمام ، بالتحديد ، "رد جلبى"
عبد الواحد الجناينى راح يطلب بنت الباشا فبدل ما يجله ياعينى
يا عبد الواحد أنت اتجننت ، يقوله
وماله تعالى دا انت الجناينى بتاعى وان مجوزتكش
بنتى هاتبهدلى الزرع اتقى شرك احسن برضه ، ههههها


طبعا الحدوتة مش كدا اوى بس والختمة الشريفة شبهها خالص ...
اما بجى الجماعة بتوع مصر والعياذ بالله واستغفر الله العظيم
اللى بيرحوا الجامعة ويحتكوا بالرجال ويعملوا تماثيل معالجة هذا الموجف جت نمطية وممللة ومدرسية تماما لا تليق بأيقاع المسلسل الرشيق جدا والمتلاحق رغم بطء الاحداث فبدأ الداكتور طاهر حصص من الوعظ والارشاد والمناقشات احسده على حفظها ، يعنى بصراحة استاذ ، لكن والله ما تيجى ابدا معالجة لموضوع بمثل هذه السهولة والسذاجة ، حتى الاخت حفصة كما ينطقونها التى ادوت دورها الاخت ايمان العاصى جاء باهتا وباردا تماما سواء فى بداية ظهورها او بعد ذلك فى مجرى الاحداث ، لولا عملاق مثل سمير صبرى وغولة التمثيل رجاء الجداوى بجوارها ووسامة احمد هارون وقبوله العالى ، وكذلك الشاب الجاد الواعد اللى بيمثل من جوا قوى احمد السعدنى لا تم فعص حفصة تماما فى هذه المسلسل العظيم لا مؤاخذه ، المهم يا دماعة رغم كل ده الا ان فارس احلامى لما كان عندى 14 سنة المطرب الساحر مدحت صالح كان دوره فى الاحداث مهم جدا وارتباطه بصوت ضمير حسين فهمى قاتل اخيه فى المسلسل عالى جدا ، حقيقى استاذ ، ومينفعش مسلسل عظيم زى دا ميكونش كاتب اغانيه الشاعر الكبير سيد حجاب وملحنه الملحن العبقرى عمار الشريعى ....
يارب ما كونش نسيت حد ، لكن دولاك علامات لامؤاخذه فى المسلسل كبيرة جوى جوى

تعليقات

‏قال كريم بهي
بعلق اول واحد
ودا حق مشروع
ولا ايه يا سهى

التكعيبة
فعلا بقت مهمة اوى صحيح مشفتهاش لسه لكن الكلام الكتير عنها خلانى احبها

وايه المتابعة الجميلة الجامدة دى
بجد تحليل للمسلسل جميل وبتركيذ
وعلى فكرة انا معاكى فى حاجات كتيير منها بالخصوص
حتة حفصة دى
وصوت مدحت صالح حبيبى
والصورة الجامدة للكتاب عن الصعيد
فعلا بحكم احتكاكى بيهم هم تمدينوا لدرجة كبيرة بس تقولى ايه
اما عن البطء فدا لتكملة 30 حلقة بأي منظر بقى


كل سنة وانت طيبة
ويابخت المسلسل بيكى
سلامى لنهنوه

كريم بهي
‏قال محمد رفيع
والله انت فدائية والعمل اللى بتعمليه فدائى حقيقى انك تتفرجى على الدراما التليفوزيونيه وكمان تركزى لدرجة انك تكتبى بتفصيل عنها بس التكعيبة قشطة سيبك انتى بلا دراما بلا هطل
‏قال Dr. Diaa Elnaggar
الحمد لله على نعمة المسلسلات أهي بتشغلنا في أيام رمضان، عن بعض العبادة، وفي غير رمضان عن كل العبادة التي فرضها الله علينا وهي الفكر.

وعلى فكرة عايزة تعرفي بشكل لا لبس فيه الفرق بين الدول المتحضرة والدول المتخلفة، سيبك من صراع الثقافات، والصراع بين الشمال والجنوب، سيبك من العولمة والعالمية، وسيبك من الجات وتحرير التجارة ، عايزه تعرفي أي دولة متقدمة من عدمه، بصي على التشكيل الوزاري فيها، إذا لقيتي فيها وزارة للإعلام، فثقى أنك تتعاملين مع دولة متخلفة، متخلفة، متخلفة.

أه وحاجة تانية، تعرفي منها تخلف أي دولة هي كم المسلسلات التي فيها.

تحياتي

ضياء

المشاركات الشائعة من هذه المدونة

العراف الاعمى

الشذوذ الجنسى

القنفذ