نونو فى اول يوم مدرسة

Saturday, October 27, 2007

للأسف أعيش


السائرين على الطريق يتجاهلون ذلك المتربص بهم تماما ، الغرور يصاحب خطواتهم ، لن يدركون ابدا ، الا بالوقوع ...مع ذلك يرفضون الاعتراف به، ذلك الذى اخذك بكل غرورك وغضبك وجمالك وبساطتك وعبقريتك ، اخذك بكل خيرك الذى زرعت به ايامك وأيامى ، بعيدا بعيدا ذهبت ولن تعود ، ما اصعب ان استمر فى رؤية حفل زفافنا ، وصورنا الناطقة بشجن العبرات ، صور ميتة ، هل تعرف شيئا ، لا أعرف ما الذى يدفعنى للأحساس بأننى فراشة ، أطير فرحة ما بين الآلوان المبهجة للأزهار الربيعية ، ربما لأننى وجدتك نورا يجتذبنى وتجعل من لمعة العين الحزينة انعكاسا لنظرتك الآمنة
ذات يوم منذ زمن بعيد ، ربما لم اكن ولدت بعد ، أخبرتنى القابلات الساحرات أنهن اجتمعن فى يوما مشمسا حارا … نادتهم أمرآة جميلة قالت لهن ، استعدوا لى ، سألد ولدا لم ترى النساء شبيها له ولن ترى الارض فى بهاؤه …
قالت لهن ، هيا يا نساء اشعلن النيران وسخنوا الكثير من المياه ، فمن سألده يعشق الماء والنار والهواء
فى الليل حضرت أنت .. قمن بهدهدة برائتك التى لم تزول ، ومسحن فوق جبهتك بعصارة عطور الجنة وطهرن جسدك بزيت زهرة عباد الشمس حتى بدأت تتفتح بين أيديهن ، أصبهم الذعر عندما لمحوا فحولة مبكرة ، تهامزن وتغامزن ، ما هذا الولد يبدوا انه مسكون ، توحدت فيك أرواح أبطال اشهر قصص العشق فى التاريخ .
هل تعلم أن لنظرتك بريق حورس ، وللمستك أحساس فالنتين الشرير ، ولحضنك الواسع براح الشيطان راسبوتين
كل ما اعرفه حقا ان القابلات عندما جاءونى ليخبروننى ببشرى وصولك للدنيا فرحت فرحا لم أكن أعرف سببا له الأن عرفت لماذا بشروننى كن على يقين أن وجودك فى الحياة تتنفس وتتحرك وتلهو وتعشق وتغضب وتثور وتكتب وتصور وتغرق وتحلق ، هو طاقتى ووقودى حتى إن لم تكن فى حضنى كما كنت دائما أنت لى ، وأنا لك ، أنا لك وأنت لى .....فلا تعتقد يا حبيبى أنك هجرت مقعدك بجوارى ، فكفانى فقد ... خذنى لذلك البراح المذهل بين ذراعيك فقط أنى أخاف أن اكون مجرد قربانا لرائحة جديدة فى قارورات عطور "جان باتست غرونوى " التى لا تنتهى ، لأننى لست مجرد رائحة !
لا تغضب منى ان اصابنى العبوس ، لا تغضب ان فاجئنى الحزن
انا للأسف اعيش

Tuesday, October 16, 2007

عيد ميلاد البنت التى طارت

ثلاث شهور
بنتى حبيبتى ضنايا روح قلبى نهنوه تخيلوا سنتين عدوا بسرعة من عمرها النونو ورغم كدا متهيألى انها من الاطفال القليلين قوى اللى فقدوا ناس قريبين منهم قوى وهما فى السن دا
ستو فى 5/1/2006

بابا بكر
فى 21/2/2007

وللقليلين اللى ميعرفوش نهى اتولدت امتى اتولدت يوم
19/10من سنتين يعنى 2005 كان يوم أربع مش جمعة زى المرة دى ، أول ما نزلها الدكتور من بطنى وكانت عملية قيصيرية مؤلمة ، فجأة أفقت من البنج وانا أشعر بوخز الخياطة فى بطنى على صراخ طفلتى وانا اصرخ فى مشهد لا اصدقه انا حتى " بنتى بنتى "



سنة و10شهور فى اسكندرية

ثم دخلت فى البنج مرة أخرى ، لقد كسر لها الطبيب رجلها اليمنى من عند الورك بالتحديد وتخيلوا معرفتش امسكها خالص ، ولا ارضعها زى الناس ولا اغيرلها ولا اى حاجة ، ووقت ولاتها كعادة القدر الشهيرة كانت ولادتها تمهيدا لموت أمى رحمة الله عليها


نهى تشاغب وهى عام تمام

، المهم كى لا استرسل فى تفاصيل تخرجنى من احساسى بفرحتى بعيد ميلاد ابنتى جميلة جميلات الكون كما اراها وهى البنت التى قاومت كسر قدمها النونو فطارت كما تنبأ لها محمد بكر الله يرحمه


نهنوه تصلى وهى 9 شهور

فى كتاب الاطفال الذى اهداه لها خصيصا قبل وفاته بعنوان " البنت التى طارت " يارب يا نهى تطيرى لاحلامك يارب وتكون ايامك احلى من ايامى ويكون اصدقائك اوفى من اصدقائى وتكون امناتك محتملة
التحقيق يارب
يخليكى ليا ويخلينى ليكى
بس


نهنوه تدعوفى اسكندرية

نهنوه عام ونصف فى ماك



نهنوه تعانى من اخى محمد


نهنوه تنتقم من خالو امد


نهنوه تتسأل

نهنوه تتخذ قرارا

نهنوه تنفذ القرار


نهى ونهى تانى
















Wednesday, October 10, 2007

قلب امرأة مش قلب الهام شاهين

مسلسل قلب امرأة
مسلسل يخرج بنا من مرحلة السخرية لمرحلة الاستهزاء بمشاعرنا ، كاتب فذ ومخرج فلتة ، صنعوا لنا صينية كنافة بالقشطة والمكسرات محشوة بالملبن وقمر الدين والمهلبية ومزينة بالزيتون الاسود والفلفل الاحمر والاخضر والجبنة الموتزريلا ، يعنى ايه قلب امرأة ، يعنى احزان واوجاع وبهدلة وتنهدات لا تنتهى من هذه الامرأة مش كدا برضة ، يبدأ بنا مسلسنا القنبلة ، بالغلبانة المسكينة نوال اللى تجوزت مرتين اتبهدلت فيهم وطلع عين اهلها واللى بتمثله الفنانة الشابة اللى مصرة تبقى شابة طبعا زيها زي غيرها واشمعنى الباقيات ، عارفين الازمة مش ازمة احساس الشباب ، بس اللى مش واخدين بالهم منه
انه بيبان على الوش والله بيبان واللى مش مصدق منهم يقعد شوية كدا ميبصش فى المراية وينسى ايد الماكيير والكوافير ويجى يبص بعد كدا فى المراية وهو يعرف حقيقته ، مينفعش ابدا ، تطلعنا الهام شاهين شابة لسه عايشة حياتها كل سنة ياربى مفيش مسلسل مفيهوش حكاية حب ، دور ممكن تعمله اى بنت عندها 20 سنة ، تعملة الفنانة الكبيـــرة الهام شاهين ، ماشى مفيش مشكلة اصل الممثل الجامد ممكن يصغر نفسه واحساسه ، لكن للاسف جت تقيلة اوى اوى وعجوزة فى المسلسل دا واستخفاف واهانة لكل العقول اللى بتتفرج على مسلسل مش مفهوم اوله من اخره ، هى الحكاية حكاية مين بالضبط ، حكاية عايدة رياض وبنتها ولا احمد خليل وبناته ولا مروان بيه اللى هو ماجد المصرى ، نسيج متهرىء تماما ، مسلسل اقل ما يقال عنه انه لم يخرج بعد ، لماذا يجرب فينا الكاتب والمخرج ، لماذا لا تأخذ المسلسلات وقتها فى الصناعة ، هو رمضان شهر الصوم والعبادة والمسلسلات بس والا ايه

الرحمة يا اهل الرحمة، قال ايه بعد ما نوال اتبهدلت البهدلة دى كلها ، يحبها البيه الكبير ابن الحتة الشهم الجدع اللى مفيهوش غلطة واحدة وهى كاملة مكملة ، وبعد ما يحبها ترفضه وهى بتحبة وبعد ما ترفضه توافق عليه عشان الجندى المجهول اللى هو اختها الصحفية الفاشلة تماما اللى ادت دورها ريم البارودى ، اللى بتمثل فى اكتر من مسلسل نفس الشخصية الطيبة الغلبانة اللى مفيش فرق خالص ، غير شكل اللبس والبيوت اللى بتعيش فيها ، اما الاداء فلم يتغير اطلاقا ، عموما بكرا تكبر مفيش مشاكل اهى لسة بتشق طريق وايه يعنى لما تشقه فى وشنا ، امال مين اللى يستحمل ، المهم ان الجندى المجهول اللى هى اخت نوال الصحفية اتدخلت دشليون مرة فى المسلسل عشان تساعد اختها تقرب من مروان وتحقق نفسها كمصممة ازياء فجأة كدا ، دا غير استفزاز البنات العانسات والسيدات المتزوجات من رجال غلابة ، مفيش حد فيهم يقدر يجيب لمراته حتة نحاس حتى مش حتة دهب ، فما بالك بالاستفزاز بكل دقيقيتين فى المسلسل هدية قد الفيل ، وغير النحنحة والحب والهيام والرومانسية المفتعلة الفجة
بين بطلين عملاقين الجسم والملامح هما نوال ومروان ، بغض النظر عن ان المبالغة فى المشاعر والهدايا كانت فرشة للقلبة السودا اللى قلبوها على بعض بعد كدا وخاصة تغير الست الكاملة المثالية من النقيض للنقيض ، اللى بها بيضربلنا كل اخلاق ولاد الاصول فى مقتل ، والواد البراوى ابنها اللى مفيش اى ملمح واضح يدلنا ليه اتحول التحول المهبب دا لما اتنقل من الحارة للشقة الجديدة مفيش حتى رمز يدلنا على تحوله ، والفنانةالقديرة سميرة عبد العزيز ، ليه تطلع بس عشان تموت غضبانة على بنتها ، حاجة بصراحة ملهاش اي معنى واهانة لفنانة بهذا الحجم ، اما دور صديق البطل اللى قاعد على طول فى البازار مبيخرجش منه ، وكل دوره انه يقولنا اللى عمله البطل واحنا مشفنهوش حاجة تشل والله ، اما الصحفية فاكرينها اللى فوق ، متجوزة يا عينى دكتور ملهوش اي دور غير انهم يقعدوا يتكلموا مع بعض عن نوال بس ، هى دى حياتهم، لكن بصراحة وخلينا نكون عادلين ، فى ممثلة جامدة جدا جدا جوا المسلسل دا لو ركزت بجد هاتبقى نجمة فى خلال سنتين بالكتير ، الفنانة الجميلة دى اسمها "شيرى" شابة صغيرة جدا صحيح لكن ادت مشهد مع الشاب هيثم اللى عامل دور اسامة ابن نوال وهو بيحاول ياخذ حقه منها ، ومشاهدها مع امها عايدة رياض ، ومشاهدها مع الفنان الجميل سيد صادق لما كان بيطالبها بالزواج ، فنانة احساسها عالى جدا وحكايتها فى المسلسل هى الطاغية ، وتحول مسلسل قلب امراة من قلب الهام شاهين الى قلب عايدة رياض الجبروت والغباء والقسوة ، وقلب تلك الفتاة الرقيق التى تعانى من تلك الام الغانية المادية التى على استعداد لبيع بنتها ، قلب امراة هومسلسل ممل جدا فى حكاية الهام شاهين كلها أو نوال ومروان ، وممتع جدا وهى يحكى عن عضو مجلس الشعب والسيدة المحرومة الانتهازية عايدة رياض ..
ترى هل ترى الهام شاهين نفسها جيدا فى المسلسل ، هل مقتنعة تماما انها بطلته ، ربما ... اعلم انها ممن لا يهتمون بالكم وانما بالكيف ولكن الكيف فى هذا المسلسل لا يليق ابدا بتاريخ الهام شاهين الحقيقى خارج اطار المسلسلات الواقعة ....
اما ماجد المصرى ، فعملاق بشكل مبالغ فيها لان يكون جانا غنيا والتمثيل باين باين باين .....
اللهم ارحمنا من المسلسلات وصانعوها واكفينا شر منتجوها واهدى ممثلوها قادر يا كريم

Monday, October 8, 2007

دراما الأستخفاف وغرام التكعيبة

لا أعرف لماذا يستخف بنا كتاب الدراما ومخرجوها ، لماذا اصرارهم
على وضعنا فى أخر صف من صفوف الحضارة ـ لعنة الله عليهم جميعا
والآدهى من ذلك انهم يُسخرون إستخفافهم بنا ويضاعفونه فى
رمضان بالتحديد
فهم يساهمون بشكل او بأخر بضياع صيامنا وتكفيرنا عمدا مع
سبق الاصرار والترصد ، قد أتعسنى الحظ السعيد بعد معاناة لمدة
عامين ان أركز فى التليفزيون بعد الشر عنكم ، وقلت وماله ألهى نفسى
بدل ما انا مركزة فى الموت وسيرته ورغم ان وحياة النبى
ياجماعة اليوم طويل ومش فاضى ومشغولة جدا جدا أه والنعمة أصلى
عندى ضمير اوى فى شغلى ، دا غير طبعا نهنوه وطلباتها النهارده
سخنت ، بردت ، جريت ، اتحرقت ، اه والله ، اصلها مرة مسكت المكوة
بأيديها وقعدت تعيط وتقولى أيه دا ماما ، وطبعا ميخلاش الامر
من التزامات اسرية دا غير عشيقتى ومعشوقتى ودنيتى الحقيقية
التكعيبـــــــــــــــــــة
ددددددددددددددددااااا
والتكعيبة للقليلين الذين لا يعرفونها هى اهم مقهى لكل حاجة
فى وسط البلد اللهم صلى على النبى عليها قعدة تشرح القلب
الحزين ، مبدئيا الشاى بـ50 قرش ودا وأى عصير 150 واللى
مسئول عنه استاذ اوزامه قصدى اسامة لانك لوشفته تحس كدا
انه استاذ تدبير منزلى الصبح فى مدرسة حكومية وبيحسن دخله وحجر
المعسل بـ50 وحجر التفاح بجنيه والشيشة بقى مسئول عنها اكتر
من فرد محمد المزاول الاكبر والمعلم سيد العترة ، يعنى قعدة دماغ
وملوكى برخص اللمؤاخذه التراب ، فلو أنت قايم بعد ثلاث ساعات مثلا تلاقى
نفسك دافع للمعلم الشاب أحمد صاحب القهوة قد 5 ج كدا واللى ممكن يعديك
من القهوة من غير ما تدفع حاجة
لغاية ما الظروف تبقى تمام ... دا غير قعدتك بقى نجوم
والله العظيم نجوم بتقعد هناك ، روح بس وانت تشوف بنفسك ....
تخيلوا بقى بعد القعدة الملوكى مع اصدقائى النجوم الجامدين اوى
فى عالم الكتابة واللى بصباع رجلهم الصغير يقدروا يعملوا مسلسلات
تضرب ام المسلسلات اللى تحفنا بها كتاب الدراما لهذا الشهر المسكين ....
وعموما انا هاعرض عليكم المسلسلات دى على حلقات ، ما ماكنش ينفع
الا لما على الاقل يعدى 20يوم عشان نحكم والا كنا هانسمع كلام
من نوعية ازاى تحكموا على حاجة مشفتوهاش للاخر.
المسلسل
حــــــــــق مشــــــروع
مسلسل صعيدى شحط محط ، بطولة نجمة ببراعة عبلة كامل
استاذة نهنهنة وشحتفة اصلى دايما دموع دموع
وموهبة خارقة عن حق فى اشعار الجمهور بالاحاسيس المستخبية
جوا الجلابية
عبلة كامل ، بجد ست الستات زى
ما كان مصباح اقصد النجم محمد وفيق جوزها المحترم الصعيدى
المثقف اللى بيقول كلام كتير من نوعية متجلجيش ، وربما ، ويجوز
كان بيجولها طول الوقت ، انها ست الستات ، ماشى يا عم وهى فعلا
كدا ومحدش ينكر ، بس الازمة يا عالم ، ان الصعيد دلوكيتى مبجاش
يتكلم إكده ، وكمانى الصعايدة ، ابسط من كدا بكتير ، يعنى صحيح
عندهم جصور واغنيا وكل شى بسى بتلاجى اشاره اكده على طباع
الصعيدية فى البيت ، اللى ما شفنا الحاجة كاملة طول العشرين
حلجة اللى فاتو واقفه مع صبيحة فى المطبخ وكان الست كاملة
دى مش صعيدية يعنى يا نسى عمرها ما عملت عيش شمسى
اما بقى نجم السيارات العظيم الاستاذ القمر الفذ اه والنعمة فذ
لأنه اجاد دور الداكتور طاهر خالس ، وكان مميز جدا جدا كشاب صعيدى
قمر علىفكرةانا بحب الصعايدة جوى جوى ، يا سلام بجى لو شبه الداكتور
اما الجان المعتبر الرومانسى بالأوى أبو سنة مميزاه وبصراحه محلياه،
الباشمهندس كريم كوجاك ، حبيب جامد جوى جوى
أدته الست كاملة على دماغه وفضلت واجفاله على الواحدة
وجال ايه بعد ما خطبها ممنوع ايجيها وكان السرقة كانت احسن
ونعم الاتقان فى الاقناع ، وهى مؤدبة ورزينة مبتعمليش حاجة
من ورا اهلها حتى الحديد فى التلافون ... احنا فى الجرن الواحد والعشرين
ومطاريد الجبل جاعدين ماعندهمش تلفزيون حتى ، يعنى
عيازين تجولولى انهم معنديهمش تلفون محمول ، والنبى ينفع برضيك
دا كلام ... عامة فى راجل امهم جوى نسيت احكيلكم عنيه ، حسين فهمى
رغم انتجاد الناس ليه فى المسلسل انه مش لايج ، بس انى شايفاه
لايج جوى جوى ، كمانى ابنه أحمد زاهر ممثل جامد جامد والنعمة
وامه الست سامية امين الست دى يا جماعة مش واخده حجها
خالص ، نيجى بجى للكباره المحترم جمال اسماعيل دور رايق رايق
وحاجة كدا شبه الافلام العربى الجديمة تمام ، بالتحديد ، "رد جلبى"
عبد الواحد الجناينى راح يطلب بنت الباشا فبدل ما يجله ياعينى
يا عبد الواحد أنت اتجننت ، يقوله
وماله تعالى دا انت الجناينى بتاعى وان مجوزتكش
بنتى هاتبهدلى الزرع اتقى شرك احسن برضه ، ههههها


طبعا الحدوتة مش كدا اوى بس والختمة الشريفة شبهها خالص ...
اما بجى الجماعة بتوع مصر والعياذ بالله واستغفر الله العظيم
اللى بيرحوا الجامعة ويحتكوا بالرجال ويعملوا تماثيل معالجة هذا الموجف جت نمطية وممللة ومدرسية تماما لا تليق بأيقاع المسلسل الرشيق جدا والمتلاحق رغم بطء الاحداث فبدأ الداكتور طاهر حصص من الوعظ والارشاد والمناقشات احسده على حفظها ، يعنى بصراحة استاذ ، لكن والله ما تيجى ابدا معالجة لموضوع بمثل هذه السهولة والسذاجة ، حتى الاخت حفصة كما ينطقونها التى ادوت دورها الاخت ايمان العاصى جاء باهتا وباردا تماما سواء فى بداية ظهورها او بعد ذلك فى مجرى الاحداث ، لولا عملاق مثل سمير صبرى وغولة التمثيل رجاء الجداوى بجوارها ووسامة احمد هارون وقبوله العالى ، وكذلك الشاب الجاد الواعد اللى بيمثل من جوا قوى احمد السعدنى لا تم فعص حفصة تماما فى هذه المسلسل العظيم لا مؤاخذه ، المهم يا دماعة رغم كل ده الا ان فارس احلامى لما كان عندى 14 سنة المطرب الساحر مدحت صالح كان دوره فى الاحداث مهم جدا وارتباطه بصوت ضمير حسين فهمى قاتل اخيه فى المسلسل عالى جدا ، حقيقى استاذ ، ومينفعش مسلسل عظيم زى دا ميكونش كاتب اغانيه الشاعر الكبير سيد حجاب وملحنه الملحن العبقرى عمار الشريعى ....
يارب ما كونش نسيت حد ، لكن دولاك علامات لامؤاخذه فى المسلسل كبيرة جوى جوى