حقد وغل وزهق وقرف وحب

الفقير ،أو يعنى المتوسط او يعنى اللى ممكن يكون بيشتغل مع الحكومة
لما يعيا لما يحب لما يكون عايز يربى ولاده لما يتمنى يعيش عيشة حلوة يموت يموت يموت
احسن له بلا قرف هى ناقصة بنى أدمين
والنبى اللى عنده نصيحة من شأنها تفيدنى للوصول للعالمية
كأم وكأب وكأبنة وكأنسان يقولى ...
لأنى بصراحة ماشية كدا بالفطرة مع شوية نصاحة واحساس
ومتهيألى انهم مش كفاية مع الناس ، الا لو اتحولوا كلهم زى ماشين بوقود الاحساس
وانا عارفه انه مستحيل ، بالله عليكم سؤال مهم جاى اهه بس لانه طويل شوية اصبروا معايا ومتتخنقوش ...
أصحى الصبح الساعة 7.30 أنزل الساعة 8.30 أنا ونهنوه الصغنن بعدما نكون استحمينا وقعدنا عكينا فى الاكل بتاعها وتكون اثبتت وجودها فى كل مكان فى الشقة ،
فننزل بقى نطلع من ش الصفا والمروة بالتكتوك انا وهى لأن مفيش مواصلات اساسا بتطلع على ش فيصل ،
وبعد ما نطلع عل الشارع العمومى بالتكتوك ، نقف نشرب عصير من عند اللورد ،
عصير قصب لانها بتحبه قوى زى ما تحب الفول والكيك قوى قوى ،
وبعدين نعدى الناحية التانية نفضل رايحين جايين ان يقف ميكروباص ياخدنا حتى لغاية الكوبرى الخشب
- مترو – مفيش
وبعدين نركب واحنا مفرهضين من المشورة فى نفس المكان اى حاجة تخرج بينا من الحتة دى ،
ومن التعاون لاول فيصل بالضبط تقريبا ساعة وفى الزحمة الاوى بتبقى اكتر من ساعة ،
فين وفين على ما نوصل التحرير دا لوركبنا تحرير مش مترو ،
ننزل اركب ميكروباص نازل رمسيس ننزل عبد الخالق ثروت نمشى لغاية المعبد اليهودى مكان حضانة نهنوه أو نركب تاكسى لغاية هناك ب2 د ج لو الامور تمام ،
بعد كدا اروح الشغل ويعدى اليوم ،
أرجع على نهنوه أما مشى حسب الحر وحسب الجيب او بتاكسى ب2 ج برضه ،
اروح اخد نهنوه ، جاية تجرى عليا ، ماما ، مامى على حسب مزاجها كل يوم ،
فهى يوم تقولى مامى ويوم تقول ماما ويوم تقولى سهى كدا من غير القاب ...
تفتكروا نروح على طول مش نهدى شوية ، نروح هنا هنا ،
خاصة لما يكون لسة هانمشى للعتبة او للتحرير عشان نركب مترو لمحطة فيصل ،
ونعدى نركب الميكروباص اللى هايودينا للتكتوك ،
فنوصل البيت شبه مقتولين من رحلة العذاب والضنا ،
تفتكروا ممكن حد فينا انا وهى نعمل حاجة لما نروح ، ومع ذلك بنعمل ، هى بتفضل تقرف فيا وتزهق فى امى ، ماما ايه دا ماما خدى ماما هاتى ورايح جاى وراها لغاية ما هى تتهد يا عينى وتنام من الساعة 9 مساءا
وسبحان الله البنت ضبطط نومها لوحدها من غير اى معاناة منى
ما هى بصراحة مش ناقصة معاناة ضبط مواعيد النوم كمان ،
وبقت على كدا كل يوم نوم 9-10 بالكتير تكون مقلوبة على الارض على بطنها زى القطة السيامى الحرانة ،
اقوم شايلها انيمها على السرير وانسى بقى انها نايمة ،
الا لما تتقلب وتقول ماما .. وتنام تانى ، بعد اليوم دا ممكن اعمل ايه تفتكروا ،
ايوا محدش يفتح بقه انا عارفه ـ
اغسل بقى الغسيل اللى فى الغسالة واقعد اخلص كتاب نائل او محمد او زوسكيند او اى حاجة جديدة ،
وخلاص كفاية ، لأ ، افتح الكمبيوتر اللى لسه مبقاش نت ،
واكتب بوست او اشتغل فى الرواية او اكتب شغل محمد بكر اللى سايبه بخط أيده ،
اه نسيت صحيح أقولكم ان فى ايام بنقعد فيها انا ونهى فى الشارع مضطرين لاكثر من سبب ،
ان مفيش أو مستنين حد هايجيب حاجة ليا أو هاشوف حد اديله حاجة لمحمد أو اشوف اصحاب يمكن مشفهمش تانى ، كلها اسباب هاتخلص مع الوقت ، وبتكون يوم او يومين فى الاسبوع ، المهم انا وحبيبتى مع بعض 24 ساعة ، باين انا فى سؤال كنت هاسأله ، اه بالمناسبة عندى شوية أسئلة مهمة جدا عايزا اجابة عليه :
هى الام المثالية شكلها ايه
هو الاب المثالى بيعمل ايه
هو الابن المثالى سلوكه ايه
هى الابنة المثالية بتعمل ايه
هو الأنسان المثالى عموما
مثالى ليه وازاى وعامل ايه

تعليقات

العزيزة سهى- الفترة الاخيرة من العالم
اللي بيسميها المثقفين نهاية العالم
ابتديت اصدق ان المراة مخلوق خرافي
في ظل خنوع ومياعه الرجل
انتي ام مثاليه وكنتي زوجة واخت مثاليه لمحمد الله يرحمه
وجدعه اوي اللي استحملتيه مع محمد كان كتير واللي بتعمليه مع بنتك كتير
واحلامك البسيطة الصغننه زي احلامنا كلنا من حقها تشوف النور
ايه المرار اللي غرقان فيه كلامك ده
افرحي واصبغي بصمات نهى في شوارع وسط البلد بطولها وعرضها
مش محمد كان بيقولنا نهى بكر دي هتبقى اشهر اديبة في وسط البلد
كل التقدير لك
‏قال saadebaid
الام المثالية شكلها زيك كده
البنت المثالية شكلها شكل بنتك كده
‏قال أكرم يعقوب
بدايةً أنا فرحاااان عشان عرفت نونة بتحب أيه
و بعد كدا غريبة بجد يعنى غريبة مووووز يعنى إن أ\سهى زكى تسأل السؤال ده؟؟!!
معجوله
بس برضو أنا أقول إن الإنسان هايكون مثالى لما يكون زيك كدا سعيد فرحان عايش بأحاسيسه بعيداً عن طريقة البشر اللى بقت اعتيادية من حقد و ضغينة و حسد و كراهية الحاجات اللى انت مش بتحميليها دى عشان ببساطة

انت عايشة بروحك بنفك
من غير مايبقى فيه تمثيل ولا وشوش ولا نفاق
اكيد عرفتى مين المثالى بقى

:) :) :) :)


أكرم العوضى

و لزمن فى يوم اعلق الأول :)
‏قال كريم بهي
رغم انى زعلان منك
لكن مقدرش مكتبش الحقيقة اللى شايفها
حتى لو ..)

سهى انتى فعلا ام مثالية وانسانة مثالية لان الام المثالية دى مش تركيبة بنحضرها فى المعمل
دى روح من لحم ودم واحساس ورغم المعاناة اللى انتى فيها لكن حياتك فيها ضى الحب والرحمة ولاملائكية هو نهنوه
التعب ممكن يروووح الزهق ممكن الحقد ممكن لكن الحب ابدا مش ممكن يروح
طول مافى حاجة اسمها سهى ونهى
السؤال اجابته عندك
والمثالية لهاش تعريف لانها مش فى قواميسنا ولا معاجمنا
دى فى العالم التانى

كريم بهي
كان هذا على وشك أن يكون أفضل شيء كتبتيه في حياتك. لولا الأسئلة الأخيرة، كأنك تتسولين يا حبيبتي أن يقال عنك مثالية.
مسكينة يا نهى
‏قال nael eltoukhy
ننزل اركب ميكروباص نازل رمسيس ننزل عبد الخالق ثروت نمشى لغاية المعبد اليهودى مكان حضانة نهنوه


هي نهى بتدرس في المعبد اليهودي يا سهى؟
والله معلومة ظريفة

انا اقول البنت طالعة ذكية ليه كدا
‏قال soha zaky
نهنوه ... واضح ان الناس اللى بتحس قليلة قوى قوى قوى لكن اللى بيفهمو مفيش اكتر منهم ، يا بختهم بعقلهم ... مش عارفة انت فاهمة حاجة ولا لأ بس متشكرة اوى اوى لاحساسك الرائع بيا .

كريم بهى ... اشكرك يا كريم دائما مدينى اكتر من حقى

سعد عبيد ، فرصة سعيدة وشكرا لكن الغرض انى اعرف بجد المثاليين بيبقوا مثاليين ازاى فى الجو دا ....


أكرم العوضى ، الله يسعدك ويريح قلبك زى ما انت فاهمنى كدا ومريحنى فى الكلام يا اكرم ...

الصديق الحبيب أحمد شافعى .. اشكرك على مدحك المستمر .


صديقى الحبيب نائل الطوخى .. تفتكر لما انت تبقى صديقى اودى بنتى حضانة غريبة من عشان تذاكر لها ولا ايه ... حمد اللله على سلامتك يا نئنوء
‏قال كريم بهي
سهى
خطر ببالى سؤال
انتى ليه بدورى على المثالية دى وبتسألى عنها
السؤال اللى انتى ماسألتهوش هى اصلا ايه المثالية ؟؟
وانا فى الثانوية اخد الطالب المثالى على المحافظة وفوجئت لكن لما كان حد يبار ليا كنت بتضحك اوى لانه اكيد انا مش مثالى والمثالية عرفوها كدا بالمظاهر و لا ايه فى قاعدة حوالى ساعتين وبعدين قالوا دا مثالى

لا المثالية مش مظاهر ومش كلام ومش مقاييس
المفروض كل واحد يقييس مثاليته حسب ظروفة وفكرة وسنه
يبقى لازم انتى تجاوبى على سؤالك بنفسك

وبعدين الناس حباكى كدة مثالية مش مثالية
ونهنوه اكيك اكيد ملهاش ام غيرك يعنى انتى المثالية كلها
بصراحة الموضوع دا كبير اوى
وعاوز قاعدة وقراية وفكر

شكرا سوسو لانى هابحث فى الموضوع
كريم بهي
‏قال Dr. Diaa Elnaggar
العزيزة سهى،

خليني أحاول أضع تعريفا لما ليس له تعريف. المثالية، لها طبعا تعريف من أكثر من منظور، لكن أنا شخصيا بيعجبني تعريف الأستاذ المنفلوطي للخلق، وأراه منطبقا على المثالية: "أتدري ما هو الخلق عندي؟ هو شعور المرء أنه مسؤول أمام ضميره عما يجب أن يفعل.[...] الخلق هو أداء الواجب لذاته، بقطع النظر عما يترتّب عليه من النتائج."

وبالنسبة لنهنوه ربنا يخليها ليكي، ويخليكي لها، ويسعد أيامها،زي ما حماي دايما بيقول لأحفاده،اللي هما بناتي مريم وسلمى، وأنا أحب أزود الدعاء بكلمتين : ويخلي أيامها أسعد من أيامنا، المهم بالنسبة لنهنوه عايز أقول لك كلمتين قالتهم لي ذات يوم السيدة الزا ماهر، وهي ألمانية وزوجة استاذنا الدكتور مصطفى ماهر، مشرفي في الماجستير والدكتوراه، وأحد الاشخاص الذين أدين له بفضل لا يعلم مداه إلا الله، قالت لي هذه السيدة العظيمة عندما اشتكيت لها عبر الهاتف، حلوة الهاتف دي، من أن مريم لا تهدأ طوال النهار والليل، وأنها تريد دائما من يلعب معها، وجدتها تقول لي: لكن ضياء تذكر شيئا مهما، أن قرار أن تأتي مريم إلى العالم لم تتخذه مريم، بل أنتم، ويجب أن تتحملوا مسئولية هذا القرار بالشكل المطلوب، وهو ما يرجعنا مرة أخرى لموضوع الخلق والاستاذ المنفلوطي مرة أخرى: "فمن أراد أن يُعلِّم الناس مكارم الأخلاق فليُحيي ضمائرَهم، وليبثَّ في نفوسهم الشعور بحب الفضيلة، والنفور من الرذيلة بأية وسيلة شاء، ومن أي طريق أراد، فليست الفضيلة طائفة من المحفوظات تُحشى بها الأذهان، بل ملكات تصدر عنها آثارُها صدور الشعاع عن الكوكب، والأريج عن الزهر."
حاولي تربي بنتك تربية جمالية على قد ما تقدري، لإن الله يكون في عونك، في ظل الظروف اللي انتي حكيتيها. لكن السؤال الأكثر مرارة وايلاما: هل نفعل الخير بأولادنا عندما نربيهم مثل هذه التربية، في مجمتع أصبح ينظر لمثل هذه القيم على انه "الهبل" بعينه؟؟؟؟؟إنه حديث ذو شجون.

تحياتي لك ولملاكك الصغير

ضياء
‏قال أشرف حمدي
مدام سهي ساكنة في فيصل ؟؟؟؟؟
يالهوااااااااااااي
هههههههههههههههههه
بصرة ، بصرررررة ، انا بقى آآآآخر فيصل
من التعاون لأول فيصل ساعة ؟
امال انا اعمل ايييييييييييييه ؟
ههههههه
فرصة سعيدة جدا

المشاركات الشائعة من هذه المدونة

العراف الاعمى

الشذوذ الجنسى

القنفذ