رسالة من العالم الآخر

وصية
سهــــى
عارف من مبتدا الخطوة لمنتهاها
أن الجرح صعب
أن التعب زي شط المستحيل
وعارف العيون اللي فاهمه اللي فيها
وعارف ان رمش الموت علي العين تقيل
وزي مافيه دموع هتبكي بصوت
في دموع جوه العيون هتموت
عشان حزنها هيكون جميل
لما خطيت علي السطراول خطايا
كنت عارف
اني بانقش سيرة قصيرة للي كان نفسي اعيشة
لكن سن القلم سبقني في غنايا
زي طير في البيض نبت ريشه
مش عاجز أنا عن الدموع
ولا عاجز حتي علي الرجوع
لكني محروق الثقاب
ماليش صحاب
ولا عرفت احزاني يوم البكا جنب الشموع
لكن جوايا صوت فاكرينه انتحر
لكنه نابض
إني أموت موته حلوة واقف علي شط الحياة
زي النخيل زي الشجر
يا سـهي
إياكي تكوني ناسية
قلب شاف الملكوت
ركب السحاب.. سحب البساط
ومن الانبساط حشايا طق
ومن الهموم صدري اتفلق
اياكي تكوني فاكرة
اني زهقت من شر ماخلق
اصل اللي اتعود عليهم..
ممكن في ابتسامة شوق لأم..
أو في حلم رجوع لاب
او في قصة او قصيدة يغيرهم..
بجرة قلم
عاشق أنا للهدوم الجديدة
وفساتين البنات والبالونات
عاشق أنا لكلمة في قصيدة
محمد حسين بكر
معهد ناصر - الغرفة 742
15/1/2007

تعليقات

‏قال كريم بهي
الله يرحمك يا محمد
مات فى كفن الروح
روحى انا
وسهى .. والجروح
اعلن سكوته
بصوت البوح
الصوت المبحوح .. المدبوح
اللى سمعتوه عالى اوى
كان صوته
لكن زعلان .. هربان فوق السطوح
سطوح الحلم الوردي
اه .. ومش بيدي
على فين يا ولدي
من ايامك
من لياليك
على فين تروح
وصينى .. وصينى
احبك اكتر من احزاني
من دمعى من اشجانى
وصينى من العالم التانى
انطق اسمك
وصينى اقول بحبك
وصينى من اصلى بحبك

ايها القراء
اقفلوا الكراريس
الدرس انتهى
اكتبوا فى نهاية السطر
نحن ابطال الكواليس
قطعوا الكراريس
محمد مات .. ولسه بينبض
****
سهى دى مجرد ارتجال
وربنا يصبرك بحنين الفراق
وخربشة الزمن اللى مبتجرحش

ونهنوه بنت الادب والقصة والقصيدة

كريم بهي
‏قال تــسنيـم
يا وجعي ويا وجع القصيدة حين تكتبها أنامل



:(
‏قال Shaimaa Zaher
إزيك يا سهى..مهما قلت من كلام مش حاقدر أوفي محمد حسير بكر حقه...أظن إنه مناقشة البلياتشو في ندوة د.علاء كان أول يوم أراه فيه، والتقي بيكي أنت كمان، كانت الندوة طبعا لا تخلو من هجوم كعادة الندوات إللي زي كده، بس بعد ما رجعت البيت، أول تعليق لوالدتي كان :

أنا حسه إنه سهى ومحمد ملايكة جم مخصوص إنهارده عشان يدافعوا عنك وعن المجموعة..

بصراحة والدتي كان عندها حق، ولفظ الملايكة ده فضل عالق في ذهني في أي مكان أراكي فيه أو أرى محمد حسين بكر...

حتى في فترة مرضه، لا يمكن أن أنسى مثلا تحامله على المسك بالقلم ونظرته للأدب بإنسانية، تليق بإنسانيته ...ربنا يرحموا ويدخلوا فسيح جناته و يعوضك خير في نهى..

وبوسات وأحضان لكي ولها
‏قال soha zaky
كريم بهى ... دائما بتصدمنى بمحبتك الشديدة ليا ولمحمد ولنهى ...

تسنيم ...لو عرفتيه كنت هاتتوجعى اكتر من كدا كتير

شيماء زاهر ، أرق كاتبة قصة موجودة فى الوسط الادبى الان ، يا قمر انت بجد تستاهلى كل خير ، مش بس لانك كاتبة مميزة ولك اسلوب مختلف بغض النظر عن الاتفاق والاختلاف معاه ، الا انك عندك افكار مختلفة ومش شبه ناس كتير وعلى فكرة انا ومحمد كنا فعلا قاعدين مع بعض بنقرا البلياتشو واحنا بنتنافس على اعجابنا بيها ، وكنا حاسين انك هاتتفرمى فى اليوم دا فعلا لانك صوت جديد لانج بجد ... انت اللى ملاك يا شيماء انت وعيلتك الجميلة اللى الناس كلها بتحسدك عليها ، على فكرة انا بابا وماما الله يرحمها كانوا بيعملوا معايا نفس اللى بيعملوه معاك عائلتك دلوقتى ... انا بحبك اوى انت وعائلتك كلها يا شيماء ...

المشاركات الشائعة من هذه المدونة

العراف الاعمى

الشذوذ الجنسى

القنفذ