نونو فى اول يوم مدرسة

Saturday, July 7, 2007


أخيرا بقى عندي بيت
أخيرا بقى عندى بيت ، أنا بصراحة خايفة أموت من الفرحة
ياااااه اجمل احساس انك تقعد فى مكان تحس انه ملكلك ،
محدش يقدر يقولك امشى من هنا ،
ورغم انها أيجار لمدة طويلة إلا انها أمان برضه ليا انا ونهنوه ،
ورغم ان الراجل سلمهالى ناقصة حاجات مهمة وخطيرة لأنها كانت مجرد منظر يا جماعة ،
قلت مفيش مشكلة اوضب وارتب واظبط ما لازم شوية تعب ،
لكن تأتى الشقة دائما بما لاتشتهى السفن....
إذا أن يا اصدقائى الصنايعية والعمال والبواب أتفقوا اتفاق غير معلن " الست دى لوحدها
، دى لقطة ، يلا بينا"محدش يفهم غلط ها اقصد انهم اشتغلونى جامد جدا ،
واللى يقولى السباكة عايزا تتغير واللى يقولى الكهربا دى يادوب تنور لمبة جاز قديمة ،
وطبعا النجار العظيم لازم يثيت وجودة ويكسر حاجة فى الشقة ،
و ما بين نجارا وسباكا وكهربائيا داخت سهى المسكينة ،
ولكن " لا اصحوا فوقوا ... مش انا اللى يضحك عليا اااه ، انا ناصحة أوى امال ايه" ....
بعد ما اهدرت ما اهدرت من مال مع هؤلاء الصنايعية الاندال ،
قلت والنبى لا انا عاملة الحاجات بنفسى ،
ووحياتكم رحت مشمرة كمامى واديها لما خليت الشقة ايه ...
عـــــــــروسة ، اه والله وطبعا البيه البواب بيتعامل معايا معاملة فاكرنى الست الهانم وكدا ،
طالع واكل نازل واكل ،
مفيش حركة الا انت عارفه يامدام هو الواحد هايكسب كام من البوابه ،
لازم اللقط رزقى ، وبعدين انا مراتى مبطلعهاش عند حد ،
مراتى دى انا شاريها ليا أنى ، بس طلعتهالك عشان شكلك بنت ناس !!... لا تعليق طبعا ... !!
المهم مش عايزا اطول عليكم السبب فى انى اسكن هذا السكن
واطمئن كل هذا الاطمئنان هم أهلى وأصدقائى الذين وقفوا بجانبى وشجعونى على ان استقل
كى أركز فى ابنتى وعملى وكتابتى ومذاكرتى .....
هما دول عزوتى
عزة بنت الفضالى "سكن روحي "
فهــد بـــن نايـــف الدبــــوس "ذو الروح الطيبة والقلب الفياض الذى آسرنى وطمأننى "
مودى بن خليفة "عالم من التمرد والصخب والعطاءوالحب" "
منال بنت يوسف " تمرد حتى الموت "
محمد بن رفيع " قلب لايتأكد لك أصالته الا كلما مر الوقت
" نهى بنت محمود "الحبيبة الكبيرة اوى ،
نائل بن الطوخى "العدو اللطيف التائه حتى يعود" ،
محمد بن صلاح العزب " ذلك الولد الذى لا ينحنى تحت أى سقف ،
وائل بن السمرى " عملاق شعر أحترس من الاقتراب منه
" هانى بن فضل "ذلك المندهش الذى يدهشنى بوقوفه المستمر جانبى بلا ملل
" محمد بن أبو زيد " امير شعراء سهى "
محمد بن الفخرانى " صانع الدهشة الحقيقية "
وتسنيم وأمير كذلك أحمد شافعى ،محمد عبد النبى ، شيماء زاهر ، عمر حاذق ...
دا غير أصدقاء غير مرئيين أشعر بهم تماما يساندونى ويذللون لى العقبات بفضل الله .... الحمد لله
أما أساتذتى والكتاب الكبار الذين ساندونى ،
فلهم بوست اخر ، لأن الموضوع معاهم كبير بجد ،
مش بسهولة اتكلم عنهم ....فأحتراما لهم هاكلمكم عليهم المرة الجاية ،
ايه رأيكم مش بجد الاصدقاء اللى انا رصتهم دول يقدروا يعملوا حاجات كتير جميلة لو فعلا انا استاهل ...
اشكرهم بجد ويارب ابقى قد وقفتهم الكبيرة أأأأأأد كدا جنبى

11 comments:

كراكيب نـهـى مـحمود said...

مبروك البيت وعقبال تحقيق كل امنياتك انتي ونهى الصغننه
سهى الصعب كله عدى الجاي احلى ان شاء الله
خلي بس عندك يقين ان بكرة احلى اوي وانتي هتشوفي
محبيت وامنياتي الطيبة لكي

MOODY said...
This comment has been removed by the author.
Vampire said...

هيه اللي في الصورة دي الشقة ؟

تحفة بجدددد

fawest said...
This comment has been removed by the author.
fawest said...

بتفكرينى
بمقولة من رواية ن لسحر الموجى
الملاية اللف ضرورة قومية
عاوزك تتمسكى بيها فى العالم المغيب اللى عامل زى علبة الكبريت
مش زى علبة السالمن
على رأى ن

هبة said...

مبروووووووووووووووك
وعقبال باقي الاحلام والطموحات
سلامي لنهنوه الصغنونه وقبلاتي لكليكما
وحشتيني مووت
هبة محمود

reem said...

مبروووووووووووك الشقة ربنا يسعدك ويسعد نهى ربنا يخليكم لبعض

ان شاء الله تكون كل التدوينات الجديدة تكون كلها مليانة باخبار تسعدنا وتطمنا عنك

تستاهلى كل الخير ياسهى

تحياتى ليكى

سهــى زكــى said...

كراكيب... انت عارفه اد أيه انا خايفة من الجاى .. صح

مودى ... الفتة والساقع فى الفرحة الكبيرة لو كانت جاية انشألله

vampire طبعا دى مش صورة الشقة لكن قول يارب ...هى فيها منها كدا حاجات بسيطة

هبهوب ... وحشتينى يا قمر أوى أوى ونهنوه بتسلم عليكى وبتبوسك من هنا وهنا وانشألله نتقابل واعزمك فى البيت الجديد ...

ريمــــــــــــو الجميلة ايه بقى الحكاية خرجنا ولا لسة ، على فكرة رغم ان مشاعرى وهنانة ومدغدغة جدا الا انى بحاول بجد اعمل حاجات جميلة ايه رأيك ؟

تسـنيم said...

هو موودي كده يا سهى ما يروحش في بلوج فيها لمة إلا لما يسألأ عن الفتة والساقع..

أنا مبسوطة كتييييييير أوووي يا قمرايا وكأن أنا اللي بقى عندي بيت

شيماء زاهر said...

مبروك يا سهى ...وعقبال كل حاجة كويسة في الدنيا :)))

حسن ارابيسك said...

الف الف مبروك عالشقة
ويارب كده تكون وش السعد عليكي إنتي ونهنوه
وخليها على ربنا
شوفي كل مشكله وليها حلال
يفضل الإنسان يدور ويبص حواليه وجواه ويتعب ذهنه ومايلقيش ليها حل
وفجأة ينزل له حل من عند ربنا ماجاش خالص بالمرة على باله
واضح انك بنت بلد وجدعه
وان شاء الله ربنا يقف جنبك
وخليها على ربنا وماتشليش همه
لان الهم بيقتل البني أدم وبعديم هوب مايلقيش نفسه
لكن الصحة ما تكون موجودة تقدري تعوضي حاجات كتيرة
ومفيش حاجه بتفضل على حالها كلنا بنحزن وبنفارق ونتفارق لكن ربنا رحمته واسعه جداً بعباده ورؤوف بيهم
وربنا بيعوضنا بناس تانيه حلوة في حياتنا وبيعوضنا بحاجات تانيه جميله
وان شاء الله تعمري شقتك بالخير والتقوى والصلاح والفرح ونهنوه تملى الدنيا عليكي ودي كفاية بالدنيا