نونو فى اول يوم مدرسة

Monday, April 23, 2007

كوابيس وأحلام ونيلة

اجلس بين اختى وابنتى الصغيرة نهى الكبيرة ونهى الصغيرة ، ارتعد لسبب غريب ، رأيت قططااصغيرة جدا جدا مولودة حالا ، نظرت فى فزع وانا ارتعد واقول لنهى الكبيرة ، ايه دا يا نهى حرام عليكم دول شكلهم وحش اوى ، طب شيلهم من الارض او خرجوهم برا على السلم ، فاتفاجىء ان القطط المولودة دى بتموت واحدة بعد التانية وكانوا اتنين بالتحديد اللى ماتوا ، قمت مفزوعة من النوم وانا بقول اعوذ بالله من الشيطان الرجيم ، وحاولت افسر لنفسى الحلم اللى مالوش غير تفسير واحد مالهوش علاقة بيا ان فى حد حامل او هايولد وطفله هايموت ، وماكنش على بالى ابدا ان مرات اخويا الحامل فى شهرين هى المقصودة بالحلم وفعلا اخر النهار لما رجعت البيت قالت لى نهى اختى انهم راحو للدكتور وقالهم ان الجنين واقف نموه عند شهر ونصف ولن يكتمل ودى حاجة غريبة شوية لكن حصلت وان الجنين دا عبارة عن تجمع دموى جوا كيس وممكن ينزل لوحده وكانت خيبة امل للكل ان الحمل راح ،وهو يعتبر تانى حمل يروح لمرات اخويا فى 6 شهور، طبعا كدا حلمى اتحقق وانا بقول لنفسى اعوذ بالله منى ومن احلامى وهكذا يا جماعة احلامى كلها بتتحقق والنبى ينفع كدا ومين كدا واللى كدا يقولى عشان يطمنى على روحى ومبقاش لوحدى حاسه ان مصيبة متحركة على الارض ....لأن صعب اوى انك تحلم بحاجة جميلة ومتتحققيش وتحلم بكابوس مرعب ويتحقق ، تصدق دا ... أكيد كل حد فيه حته خزعبلية زى كدا ها يصدق ، وعلى فكرة في احلام حلوة بتتحقق بس بتاخد وقت طويل اوى
المشكلة الحقيقية اللى بتواجهنى طول الوقت أن النوم عندى مش نوم ، انما كأنى بروح اقابل الكائنات المستخبية فى السما السابعة القاعدين تحت ايده سبحانه وتعالى بياخدوا منه الاوامر وينفذوها ، باقابلهم يدوهالى بدرى شوية عن باقى الناس ، فالاقى نفسى شفت حاجات محدش شافاها مينفعش احكيها الا لحد بحبه قوى ويكون طيب جدا ، فتتحقق ويكون شاهد على انى عرفت قبل الناس ، فيه حاجات كتير حلمت بها واتحققت ، فى منها اللى جه فى شكل كوابيس ومنها اللى جه فى شكل احلام نوم عادية وفى اللى جه فى اليقظة ومتهيألى ان كتير مننا عنده الحتت دى ، لكن يمكن مش واخد باله منها
يعنى مفيش يوم بيعدى الا واكون شايفه قبل ما اقوم هايحصل ايه فيه اه والله ومش مهم حد يصدقنى ودا احسن عشان الحسد والنحس والحاجات اللى بيقولوا عليها بتضعف الموهبة اللى من النوع دا ... دى لو كانت موهبة من نيلة منيلة ...

5 comments:

تسـنيم said...

إزيك يا سهى..
مش هتصدقي إن انا كده بالمللي وإن أنا من كتر ما الأحلام الوحشة اللي بشوفها ما بين اليقظة والمنام بتتحقق بقيت أدعي في الصلاة وأطلب من ربنا إن يحرمني من الهبة دي على أساس إن ذهبت النبوات وبقيت المبشرات بس إحقاقا للحق كان فيه كمان احلام حلوة شفتها بس دي كل فين وفين .. عارفة انا مش بعرف أنام خالص لأني من النوع اللي نومي نوم قطط بقلق بسرعة جدااا ومخي بيسترجع كافة الأحداث اللي بتحصل في يومي بمشاكله وحوراته وأقعد أسترجع فيها وأنا نايمة وبصحى مرهقة اووووي.

طولت عليكي بس حلو انك تلاقي حد زيك في حاجة زي دي وتفضفضي معاه بوسيلي بنوتك كتير.

شيماء زاهر said...

فيه مرتين بس إللي حلمت بحاجة واتحققت فعلا..كنت في تمهيدي ماجستير وكان فيه دكتورة باحبها أوي تعبانة، كانت ست عظيمة لدرجة إنها وهي تعبانة، كانت بتصلح لنا المقالات عادي، المهم حلمت يوم إن فيه عزاء في القسم والسكرتيرة موجودة فيه، الصبح كلمتها لقيتها بتقول لي د. عفاف توفت
الحلم التاني كان خاص بواحد زميلي عزيز علي، حلمت إنه اشترى قال إيه عربية لانسر حمراء، بعدها بفترة قال لي إنه اشترى عربية بس كانت 128.

دي كل تجاربي مع الأحلام ، بس باحس إن إللي إنت بتحكي عليه ده نعمة من عند ربنا، حتى لو فيه وجهين، الكويس وإللي مش كويس أوي..
صباحك ياسمين وفل وكده :))

سهــى زكــى said...

تسنيم العزيزة اشكرك جدا على تعليقك الجميل دا وانا من ساعة ما ردتى عليا اول مرة وانا حاسه انك فيكى حاجة شبهى ، نهى بتسلم عليكى وبتبوسك بوسة كبيرة قد كدا

سهــى زكــى said...

عارفة يا شوشو ان موضوع الاحلام والاحاسيس دا موضوع معقد بجد وبيخلينا نروح فى حتت ملناش فيها ، لكن ايه الحل غير اننا نحس ، اشكرك جدا على احساسك العالى بيا دا

خواطر شاب غاضب said...

ممكن اقول ايه الجمال ده