السعادة بتسعد

السبت 21/4/2007
اجمل حاجة فى الدنيا انك تشوف حد فرحان اوى كدا من قلبه وتحس بفرحته ، عارف طبعا هاتحس بايه ، هاتفرح طبعا من غير كلام ، هاتلاقى نفسك بتقول ياه ربنا يسعده كمان وكمان ويفرحه اكتر بكل حاجة ، ولما تكون واحدة بيضا اوى كدا زى نهى محمود متقدرش تعمل حاجة تانية غير انك تقولها مبروك يا نهى وتحاول كمان تفرحها اكتر واكتر لان كل ما بتضحك وشها بيحمر وعنيها بتضيق وتمطر دموع سخنة ملهلبة على حمار خدودها فتنور قوى ، يعنى باختصار بتتحول كتلة نور جاية من مدينة الملائكة ، نهى محمود الف مبروك وقلبى فرحان قوى بيك ومحمد حسين بكر بيقولك الف مبروك يانهى واجدعنى بقى عايزين ندوات وحركات من دى واخبار هنا وهنا وحركات ، ها شدى حيلك يا جميل
************
موضوعنا بقى اللى احنا المفروض نتكلم عنه النهارده واللى بالصدفة انه مناسب جدا وقت صدور احدث رواية فى الوسط الادبى "الحكى فوق مكعبات رخام " لنهى محمود ، هو انى هاحكى لكم ندوة علاء الاسوانى اللى كانت فى نادى الصيد يوم الخميس 19/4/2007 ....
الندوة كانت شبه الندوات السبعينية او الستينية تقريبا .... ادارها اثنين من مسئولى النادى ، قراء شاطرين يعنى بس مسئولين يعنى نقولهم لأ ... لازم هما اللى يديروا الندوة ...
المهم بعد التقديمة المناسبة للدكتور علاء الاسوانى وبعد ما اتكلم عن مشواره الادبى واللى بدأ من أكثر من عشرين سنة وقتما كان يحاول النشر دائما وكانت جهات النشر الحكومية ترفض نشر اعماله وكيف تحمس له اصدقائه وكونوا من انفسهم جمعية لنشر بعض اعماله الاولى التى سبقت يعقوبيان وشيكاجو .. وقد صبر كثيرا ولم ييأس حتى كانت يعقوبيان هى الرواية العمدة التى كللت صبره بالنجاح المعروف لها ... ومن المعروف لدى الكثيرين وهذا ليس على لسانه بل على لسانى ، أن يعقوبيان تحمس لها محمد هاشم كثيرا ونشرها عنده فى اول الامر وقد لاقت نجاحا مبهرا مع العلم ان انتشارها لم يكن سريعا كما يعرف البعض ، بل تحدثت عنها فى البداية اخبار الادب فى ذلك الوقت هى الجريدة الحكومية الوحيدة تقريبا المتحمسة للكاتب الشاب علاء الاسوانى وبدأت تتنقل فى الوسط الادبى اولا على نطاق محدود نوعا وواحدة واحدة سمعت الرواية بسرعة جدا نتيجة شكر الادباء نفسهم اللى هم دلوقتى مستكترين اوى النجاح الجامد دا معرفش ليه التحول بس دا اللى حصل فعلا ، ولا يمكن المثقفين اوى بيضايقوا لما يلاقوا ان القارىء العادى بيفهم اللى همو فهموه وحبوا دى تبقى مصيبة سودة على كدا ...
المهم ان كان حضور الندوة حاجة تفرح اوى اوى ,وناجحة قوى قوى زى ما قلت قبل كدا ان فرحة اى كاتب انه يلاقى ناس كتير قوى بتقراله واتمنى يارب لكل اديب يجيله كمية الناس اللى جت فى اليوم دا لعلاء
الاسوانى وعارفين ايه الاجمل ان كل الناس دى قارية اعماله كلها وبيتخانقوا مع منسقين الندوة عشان يتكلموا كل واحد باسلوبه وبعقله .... لدرجة ان د .علاء بعد ما الندوة خلصت وجد صعوبة شديدة فى الخروج من المكان نظرا لتجمع الناس حوله بشكل غريب ، ياترى دا ليه ... يارب اوعدنا يارب
كمان كان حاضر شاهد على كلامى على فكرة وكنت سعيدة اوى بظهورها شيماء زاهر ... وهى تقريبا من رواد الندوة الدائمين زيى كدا ...
خلاصة الندوة .... كانت احتفاء بعلاء الاسوانى وموهبته فى الرواية وموهبته فى الحديث والكاريزما الواضحة اوى فى شخصيته
وطبعا لم تخلو الندوة من اسئلة عن الجنس فى رواية شيكاجو وتناوله باختلاف تناوله فى رواية يعقوبيان وكأن هو الوحيد اللى كتب جنس فى رواية وانا معرفش يعنى ايه جنس اصلا حاجة غريبة الناس دى بتتكلم فى ايه ...
وطبعا ازاى يتجرأ ويخلى شيماء المحجبة احدى بطلات شيكاجو تحب وتنام مع حبيبها من غير جواز وازى كرم دوم دا المسيحى يبقى احسن واحد فى الرواية ومحصلتلوش مصيبة ...
على فكرة الرواية تقيلة ، سواء تعجب او متعجبش بس فيها كلام
بعد ما الندوة خلصت كعادة معظمنا ، نتلم كدا شويات شويات ، او شلل شلل يعنى ، ونقعد مع بعض نتكلم عن اللى حصل واللى هايحصل واللى المفروض يحصل ، قعدت مع عبير وخالد ود.محمد عبد المعز ود. عبد الهادى سعد ... وقعدنا نتكلم نتكلم وبعدين رحنا كلنا فول عند سعد الحرامى وقعدنا شربنا شاى وشيشة.
**************
اليوم اللى بشوف فيه سكن روحى ودى صاحبتى الانتيم ، بحس انى مش ناقصنى حاجة وببقى سعيدة قوى قوى من غير سبب حتى لوكنت فى قمة احساسى بالغضب والاحباط زى الصبح بدرى قوى كدا ..
**************
يوم الجمعة 20/4/2007 صحيت بعد صلاة الظهر انا ونهنوه ولبسنا مع بعض ونزلنا نتمشى انا وهى رحنا حديقة الأزهر وبعدين رحنا انا وهى جامع السيدة زينت صلينا انا وهى المغرب ودعينا لله يكرمنا انا وهى فى الدنيا الواسعة دى ... واتمشينا فى السيدة زينب وكلت انا سوبيا من عند الرحمانى بس هى معجبهاش طعمها خالص ...انا نفسى الاقى انشالله اوضة وصالة فى السيدة زينب بحبها اوى اوى ، مربع وسط البلد الساحر دا ، خلاب ويخطف ...
*************

تعليقات

‏قال شيمـــــاء
تسلم ايديك يا سها
.. احلى حاجة انك بتحكى كانك مع حد قدامك عشرة
و ده حلو اوى

تسلمى
‏قال soha zaky
اشكرك جدا يا شوشو ياقمر ويارب دايما أعجبك كدا ..

المشاركات الشائعة من هذه المدونة

العراف الاعمى

الشذوذ الجنسى

القنفذ