نونو فى اول يوم مدرسة

Wednesday, April 11, 2007

أه يا دماغى

أه يا دماغى

أزيكو يا جماعة عاملين ايه ... على فكرة انا سعيدة جدا أنكم اتعرفتوا على مدونتى وكمان فعلتوهالى بجد
النهارده هاحكلوا حكاية جميلة من حكاية الف نهار ونهار مابين الروتين وبائعين الخضار

1- حكاية الشهر العقارى

كان يا مكان يا سعد يا اكرام من معشر المدونين والمدونات
سيدة قصيرة القامة ممتئلئة الجسم رفيعة الصوت وفى يدها فتاة صغيرة تحمل فى يدها لعبة قطينة تشبهها تقريبا اسمها نانا ...ذهبت تلك السيدة فى شوارع الجيزة الجميلة الغناء الخالية من الاتوبيسات والتاكسيات والميكروباصات والتكتوك والبنى أدمين ، سارت تبحث عن مكان يدعى الشهر العقارى ، حيث اخترعه
" سيدنا عبده الروتين بن لامؤاخذه حق الشاى العقارى" لأن هذ الشهر العقارى هو المسئول عن كل الضمانات والامانات اللى فى ارجاء مصر المش محروسة وطبعا كان السيد عبده الروتين لامؤاخذه حق الشاى موجود على باب الشهر العقارى متمثلا فى سيدة طويلة سمينة وصوتها يشبه تماما صوت حمير السيد الوزير الذين يجرونه حتى باب المملكة وقت أن يطلبه اميرالمؤمنين ... وكانت ابنتى الصغيرة التى تجر "نانا" من شعرها بشعور سادى لا يتناسب وروعة المكان قد اصابها الضجر والملل من هذا الفراغ المزعج فى الشهر العقارى ، هذا بخلاف انزعاجى انا من فخامة المبنى ورقى التصاميم وروعة الالوان ، ورائحة المكان ، ولمؤاخذه نظافة بيت الأدب ورائحته التى تعلم الأدب
كل هذا وأنا بصلافتى وبجاحتى أقف انا وابنتى فى وسط هذا الجمال نشوهه
اصبر عليا انت عايز تعرف انا رحت ليه الشهر العقارى
طب على العموم انا رحت علشان ببساطة اعمل توكيل للمحامية الكبيرة بتاعتى حنان سلام
وفجأة صرخت فى الست العملاقة ام طرحة وجلابية وكأنها قعدة على باب الحارة
انت بتعملى توكيل لمين ... ها
قلتلها للمحامية عن نفسة بصفتى وعن ابنتى بصفتى وصية علشان اعمل اعلام وراثة وكدا
يعنى أيه .. أنت هاتعملى للبت الصغيرة دى وليه فين أبوها
ابوها مات ..
اه مات .. طب فين شهادة ميلاد البت وفين قرار الوصاية وشهادة الوفاة مش جايبهم معاكى ليه ... ردى عليا ...فين
متلعثمة من هول المفاجأة نتيجة صراخها المستمر
حاضر انا معرفش ، محدش قالى طيب ، براحة ، انا اول مرة يموتلى جوز يعنى
اه أول مرة ، طب يالا روحى هاتى الحاجة وتعالى
لا خلاص انا هاجى يوم تانى علشان لازم اودى بنتى الحضانة
حضانة ، طيب ياختى روحى وديها
يالا خسارة التوكيل اللى خططنا عليه يادى النيلة
***********
بصوا ياجماعة ... دا نموذج رائع لأحدى أماكن السيد المحترم
عبده الروتين لامؤاخذه حق الشاى
على فكرة يا جماعة انا هاعرفكوا النهارده على محمد حسين بكر الأديب وانشألله هاعرفكم عليا انا كمان
ويارب أعجبكم

No comments: